Մանե Թանդիլյան

Մանե Վանյայի Թանդիլյան
ՀՀ ԱԺ 6-րդ գումարման պատգամավոր
2017 ապրիլի 2 - 2018 մայիսի 12
Աշխատանքի և սոցիալական հարցերի նախարար
2018 մայիսի 12 - 2018 նոյեմբերի 14
Նախորդող	Արտեմ Ասատրյան
ՀՀ ԱԺ 7-րդ գումարման պատգամավոր
2019 հունվարի 14
Կուսակցություն՝	«Ապրելու երկիր» կուսակցություն
Կրթություն՝	Հայկական պետական մանկավարժական համալսարան, Հայաստանի ամերիկյան համալսարան
Մասնագիտություն՝	Պատմաբան, հաշվապահ
Ազգություն	Հայ
Ծննդյան օր	1978 ապրիլի 3
Ծննդավայր	Ալավերդի, Հայկական ԽՍՀ, ԽՍՀՄ
Քաղաքացիություն	Հայաստան
Հայր	Վանյա Թանդիլյան
Զավակներ	Երկու զավակ

Մանե Վանյայի Թանդիլյան (ապրիլի 3, 1978(1978-04-03), Ալավերդի, Հայկական ԽՍՀ, ԽՍՀՄ), հայ կուսակցական-քաղաքական գործիչ, հաշվապահ, «Ապրելու երկիր» կուսակցության համահիմնադիր, նախագահ, Արցախի Հանրապետության Աշխատանքի, սոցիալական և միգրացիոն հարցերի նախկին նախարար, ՀՀ աշխատանքի և սոցիալական հարցերի նախկին նախարար, Հայաստանի 6-րդ և 7-րդ գումարման Ազգային ժողովի պատգամավոր, «Լուսավոր Հայաստան» կուսակցության նախկին անդամ, ՀՀ ԱԺ ֆինանսավարկային և բյուջետային հարցերի մշտական հանձնաժողովի նախագահ։

Կրթություն

1999 թվականին ավարտել է Հայկական պետական մանկավարժական համալսարանի պատմական ֆակուլտետը։ 2002 թվականին ավարտել է Հայաստանի ամերիկյան համալսարանի բիզնեսի կառավարման բաժինը՝ ստանալով բիզնեսի կառավարման մագիստրոսի աստիճան։

Աշխատանքային գործունեություն

2003-2004 թվականներին աշխատել է «Գառնի Ինվեստմենթ ընդ Դիվելոփմենթ» ՓԲԸ-ում՝ որպես ֆինանսական վերլուծաբան։ 2004 թվականին եղել է հաշվապահ «Արարատ Գոլդ Ռիքավորի Քոմփանի» ՍՊԸ-ում։ 2004-2006 թվականներին աշխատել է «Հովնանյան Ինտերնեյշնլ» ՍՊԸ-ում՝ որպես գլխավոր հաշվապահ, 2006-2008 թվականներին նույն պաշտոնը ստանձնել է տեղեկատվական տեխնոլոգիաների ոլորտի «Մենթոր Գրաֆիկս Դիվելոփմենթ Սերվիսիս» ՓԲԸ-ում։ 2009-2018 թվականներին աշխատել է «Սինոփսիս Արմենիա» ՓԲԸ-ում՝ որպես ֆինանսական տնօրենի տեղակալ, գլխավոր հաշվապահ։

Քաղաքական գործունեություն

2021 թվականի օգոստոսի 15-ին Աշխատանքի և սոցիալական հարցերի նախկին նախարար Մեսրոպ Առաքելյանի հետ հիմնադրել է «Ապրելու երկիր» կուսակցությունը։ Կուսակցության նախաձեռնող խմբի հիմնադիր համաժողովում քվեարկության արդյունքում ընտրվել է քաղաքական ուժի նախագահ և մինչ օրս ղեկավարում է այն։

«Լուսավոր Հայաստան» կուսակցության հիմնադիր անդամ է։

2017 թվականին «Ելք» դաշինքիցուցակով ընտրվել է Հայաստանի 6-րդ գումարման Ազգային ժողովի պատգամավոր։ Եղել է այդ ընտրություններում ռեյտինգային ընտրակարգով ընտրված միակ կին պատգամավորը։ Եղել է ԱԺ ֆինանսավարկային և բյուջետային հարցերի մշտական հանձնաժողովի փոխնախագահը։

2018 թվականի մայիսի 11-ին նշանակվել է Հայաստանի աշխատանքի և սոցիալական հարցերի նախարար։

2018 թվականի նոյեմբերի 14-ին հրաժարական է տվել Հայաստանի Աշխատանքի և սոցիալական հարցերի նախարարի պաշտոնից դեկտեմբերի 9-ին կայանալիք ԱԺ արտահերթ ընտրություններին մասնակցելու համար։ ԼՀԿ համապետական ցուցակում զբաղեցրել է երկրորդ տեղը, ինչպես նաև ռեյտինգային ընտրակարգով առաջադրվել է Երևանի Կենտրոն, Նորք-Մարաշ, Էրեբունի և Նուբարաշեն վարչական շրջաններն ընդգրկող թիվ 4 ընտրատարածքում։ Պատգամավոր է ընտրվել ռեյտնգային ընտրակարգով։ Եղել է Հայաստանի ԱԺ Ֆինանսավարկային և բյուջետային հարցերի մշտական հանձնաժողովի նախագահ։ 2020 թվականի օգոստոսի 24-ին վայր է դրել պատգամավորական լիազորությունները առողջական խնդիրների պատճառով։

2020 թվականի նոյեմբերի 20-ին՝ 44-օրյա պատերազմից 10 օր անց, տեղափոխվել է Արցախ՝ տեղում ծանոթանալու պատերազմի հետևանքով առաջացած սոցիալական, միգրացիոն և այլ խնդիրներին, նպաստելու դրանց լուծմանը։ Դեկտեմբերի 2-ին նշանակվել է Արցախի Աշխատանքի, սոցիալական և միգրացիոն հարցերի նախարար։ Նախարարի պաշտոնից հրաժարական է տվել 2021  սեպտեմբերի 1-ին։

Անձնական կյանք

Մանե Թանդիլյանն ամուսնացած է, ունի երկու երեխա։

Արտաքին հղումներ

• Մանե Թանդիլյանի մասին հրապարակումներ «Լուսավոր Հայաստան» կուսակցության պաշտոնական կայքում
• Մանե Թանդիլյանի մասին հրապարակումներ www.aravot.am կայքում