Արսեն Միխայլով

	Արսեն Միխայլով
	ՀՀ ԱԺ 6-րդ գումարման պատգամավոր
2017 ապրիլի 2 - 2019 հունվարի 14
	ՀՀ ԱԺ 7-րդ գումարման պատգամավոր
2019 հունվարի 14-ից
Կուսակցություն՝	անկախ քաղաքական գործիչ
Կրթություն՝	Լվովի համալսարան (2008)
Մասնագիտություն՝	ճարտարագետ-անասնաբույծ
Ծննդյան օր	հունվարի 29, 1963 (59 տարեկան)
Ծննդավայր	Արզնի, Հայաստան
Հայր	Պյոտր Միխայլով
Զավակներ	երեք զավակ

Արսեն Պյոտրի Միխայլով (հունվարի 29, 1963(1963-01-29), Արզնի, Հայաստան), ծագումով ասորի հայ քաղաքական գործիչ, ՀՀ ԱԺ 6-րդ և 7-րդ գումարումների պատգամավոր^[1]։ Անկուսակցական է, «Իմ քայլը» խմբակցության անդամ։

Կենսագրություն[խմբագրել | խմբագրել կոդը]

Ծնվել է 1963 թվականի հունվարի 29-ին ասորական ընտանիքում Արզնի գյուղում (այժմ՝ Կոտայքի մարզ), Հայկական ԽՍՀ։ 1981-1983 թվականներին ծառայել է ԽՍՀՄ Զինված ուժերում^[1]։

Կրթություն[խմբագրել | խմբագրել կոդը]

1986 թվականին ավարտել է Ռուսաստանի Արդատով քաղաքի գյուղատնտեսական տեխնիկումը։ 2008 թվականին ավարտել է Լվովի Ս.Ձ.Գժիցկու անվան պետական համալսարանի (այժմ՝ Իվան Ֆրանկոյի անվան Լվովի ազգային համալսարան) բժշկագիտություն և անասնաբուծություն ֆակուլտետը։ Մասնագիտությամբ՝ ճարտարագետ-անասնաբույծ^[1]։

Աշխատանքային գործունեություն[խմբագրել | խմբագրել կոդը]

1983-1989 թվականներին աշխատել է Արզնի գյուղի սովխոզի կոմերիտական կազմակերպության ազատված քարտուղար։ 1989-1996 թվականներին աշխատել է Արզնի գյուղի սովխոզի կուսակցական կազմակերպության ազատված քարտուղար։ 1997-2017 թվականներին աշխատել է Արզնիի համայնքապետի տեղակալ։

2007 թվականից` ՀՀ նախագահի աշխատակազմին կից ազգային փոքրամասնությունների կազմակերպությունների համակարգող խորհրդի անդամ է։
2017 թվականի ապրիլի 2-ին Համապետական 2 մաս (ազգային փոքրամասնություն՝ ասորիներից) ընտրացուցակով ընտրվել է Հայաստանի Հանրապետության Ազգային Ժողովի 6-րդ գումարման պատգամավոր։ ՀՀ ԱԺ Առողջապահության և սոցիալական հարցերի մշտական հանձնաժողովի անդամ է։ Անկուսակցական է, ՀՀԿ խմբակցության անդամ^[1]։
2019 թվականի հունվարի 14-ից պատգամավոր է, <<Իմ քայլը>> խմբակցության անդամ։

Հասարակական գործունեություն[խմբագրել | խմբագրել կոդը]

1991-1994 թվականներին եղել է ԽՍՀՄ ասորական կոնգրեսի փոխնախագահ։ 1994-2001 թվականներին եղել է Հայաստանի «Աթուռ» ասորական ասոցիացիայի փոխնախագահ, իսկ 2001 թվականից նույն կազմակերպության նախագահ։
2001 թվականից Ասորական համաշխարհային միության վարչության անդամ է, Արևելյան Եվրոպայի ասորական կազմակերպությունների պատասխանատու քարտուղար։
2001 թվականից Իրանում անցկացվող համաասորական «Թամուզ» օլիմպիական սպորտային ամենամյա խաղերի համահեղինակ է^[1]։