Նազելի Բաղդասարյան
Նազելի Հրաչի Բաղդասարյան | |
---|---|
Ծնվել է | 1983 թվականի օգոստոսի 8 |
Ծննդավայր | Շիրակի մարզ, Գյումրի |
Քաղաքացիություն | Հայաստան |
Ազգություն | հայ |
Կրթություն | Մոսկվայի ձեռներեցության միջազգային ակադեմիա |
Մասնագիտություն | իրավաբան |
Աշխատանք | իրավաբան, պատգամավոր |
Աշխատավայր | Ազգային ժողով |
Ամուսին | ամուսնացած է |
Զբաղեցրած պաշտոններ | Հայաստանի Ազգային ժողովի պատգամավոր և Հայաստանի Ազգային ժողովի պատգամավոր |
Երեխաներ | մեկ զավակ |
Nazeli Baghdasaryan Վիքիպահեստում |
Նազելի Բաղդասարյան, Հայաստանի Հանրապետության Ազգային Ժողովի 7-րդ գումարման պատգամավոր, իրավաբան[1], ԱԺ պետական-իրավական հարցերի մշտական հանձնաժողովի անդամ:
Կենսագրություն
Նազելի Բաղդասարյանը ծնվել է 1983 թվականի օգոստոսի 8-ին Շիրակի մարզի Գյումրի քաղաքում[1]:
Միչև 2005 թվականը նա սովորել է Մոսկվայի ձեռներեցության միջազգային ակադեմիայի իրավագիտության ֆակուլտետում, ունի իրավագիտության մագիստրոսի կոչում[1]:
2008 թվականին Ուկրաինայում մասնակցել է Ամերիկայի Միացյալ Նահանգների Միջազգային զարգացման գործակալության «Ռադիոցանցերի կառավարում» ռադիոմենեջերների, իսկ 2017 թվականին՝ Կիևի ժողովրդավարության և իրավունքի գերակայության ինստիտուտի մեդիա իրավագետների կրթական ծրագրերի դասընթացներին[1]:
1999-2006 թվականներին աշխատել է «Ցայգ» հեռուստաընկերությունում որպես հաղորդավար: 2003-2005 թվականներին եղել է Հայաստանի Հանրապետության Ազգային Ժողովի պետական-իրավական հարցերի մշտական հանձնաժողովի նախագահի տեղակալի օգնական, 2005-2006 թվականներին աշխատել է Մոսկվայի ժամանակակից հումանիտար ակադեմիայի երևանյան մասնաճյուղում որպես դասախոս, 2005-2018 թվականներին՝ «Ռադիո Հայ Գյումրի» ռադիոկայանի ղեկավար: Նազելի Բաղդասարյանը 2006-2018 թվականներին աշխատել է «Ցայգ» ՍՊԸ-ում որպես իրավաբան: 2012 թվականից՝ «Ցայգ» հեռուստաընկերության «Իրականում» հեռուստահաղորդաշարի հեղինակ և վարող, 2012 թվականից՝ քաղաքական և կոմերցիոն արշավների մեդիափորձագետ: 2014-2019 թվականներին նա հիմանդրել է «Սթայլ Մեդիա» ՍՊԸ-ն, իսկ 2015 թվականից վարել է հանրային ելույթների և հրապարակախոսության դասընթացներ: 2018 թվականի օգոստոսի 21-ից միչև 2019 թվականի հունվարի 14-ը եղել է Հայաստանի Շիրակի մարզպետի խորհրդական[1]:
2011 թվականից Նազելի Բաղդասարյանն անդամակցում է լրագրողների միջազգային դաշնությանը, 2017 թվականից՝ «Գյումրին առանց տնակների» հիմնադրամի հոգաբարձուների խորհրդին: 2018 թվականից անդամակցում է Գյումրու «Երիտասարդական նախաձեռնությունների կենտրոն»-ի խորհրդատվական խորհրդին[1]:
Գիտական գործունեություն
Նազելի Բաղդասարյանը 2005 թվականին հեղինակել է «Մարդու և քաղաքացու իրավունքներն ու ազատությունները» գիտական աշխատությունը[1]:
Քաղաքական գործունեություն
2018 թվականի դեկտեմբերի 9-ին համապետական ընտրական ցուցակով նա ընտրվել է Ազգային ժողովի պատգամավոր «Իմ քայլը» կուսակցությունների դաշինքի կազմում[1]:
Ընտանիք
Նազելի Բաղդասարկանն ամուսնացած է, ունի մեկ զավակ[1]: