Այգեհատ
| Գյուղ | ||
|---|---|---|
| Այգեհատ | ||
| Երկիր |  Հայաստան | |
| Մարզ | Լոռի | |
| Այլ անվանումներ | Իգահատ, Իգոկաթ, Իկհատ, Դանուշավան | |
| Մակերես | 6.1 կմ² | |
| ԲԾՄ | 1150 մ | |
| Պաշտոնական լեզու | Հայերեն | |
| Բնակչություն | 332[1] մարդ (2008) | |
| Ազգային կազմ | Հայեր | |
| Կրոնական կազմ | Հայ Առաքելական եկեղեցի | |
| Տեղաբնականուն | այգենատցի | |
| Ժամային գոտի | UTC+4 | |
| Պաշտոնական կայք | lori.mtaes.am/about-communities/476/ (հայ.) | |
| ||
Այգեհատ, գյուղ Հայաստանի Լոռու մարզում, Ալավերդու տարածաշրջանում, Ալավերդի քաղաքից 9 կմ հարավ-արևմուտք, իսկ մարզկենտրոնից 43 կմ հյուսիս-արևելք։ Գյուղը տեղադրված է Դեբեդ գետի ձախ ափին, բարձրադիր սարավանդում՝ ծովի մակարդակից 1150 մ բարձրության վրա։
Գյուղը նախկինում ունեցել է Իգահատ, Իգոկաթ, Իկհատ, Դանուշավան անվանումները և մտել է Թիֆլիսի նահանգի Բորչալուի գավառի մեջ։ Գյուղն Այգեհատ է վերանվանվել 1991 թ.-ի ապրիլի 3-ին։ Գյուղն իր նախկին Իգահատ և հետո Այգեհատ անվանումները ստացել է այն պատճառով, որ շրջակայքում եղած այգիները հատվել են։
Կլիմա
Կլիման մերձարևադարձային է, չափավոր շոգ և չորային ամառներով, մեղմ ձմեռներով։ Տարեկան թափվում են 500-600 մմ մթնոլորտային տեղումներ։ Ագրոկլիմայական տեսակետից ընկած է ինտենսիվ ոռոգման գոտում։
Բնակչություն
Ըստ ազգային վիճակագրական ծառայության տվյալների 2005 թ-ին համայնքի բնակչությունը կազմել է 235 մարդ։ Սեռային կազմում տղամարդիկ կազմում են 43%, կանայք՝ 57%։
Այգեհատի ազգաբնակչության փոփոխությունը.[2]
| Տարի | 1831 | 1886 | 1922 | 1959 | 1970 | 1979 | 1989 | 2001 | 2004 |
|---|---|---|---|---|---|---|---|---|---|
| Բնակիչ | 88 | 337 | 500 | 391 | 366 | 295 | 478 | 332 | 277 |
Պատմամշակութային կառույցները
Գյուղում են գտնվում Սբ. Սարգիս (VI-VII դդ.), Գողգոթավանք (X-XVII դդ.) եկեղեցիները և Ս. Սարգիս մատուռը (XVI-XVIIդդ.)։ Գյուղից ոչ հեռու գտնվում է “Քոբայրի” վանքը։
Գյուղատնտեսություն
Գյուղատնտեսական հողերը գրեթե ամբողջությամբ օգտագործվում են որպես վարելահողեր՝ կազմելով 281 հա։ Պետական հողերը հիմնականում օգտագործվում են արոտավայրերի և վարելահողերի համար՝ համապատասխանաբար կազմելով 132 և 58 հեկտար։
Գյուղի մասնագիտացման ուղղությունը երկրագործությունն է։ Զբաղվում են դաշտավարությամբ, պտղաբուծությամբ (տանձ, խնձոր, սալոր), մշակում են հացահատիկային, կերային, բանջարաբոստանային կուլտուրաներ։ Զբաղվում են խոշոր եղջերավոր անասնաբուծությամբ, մեղվաբուծությամբ, թռչնաբուծությամբ։
Հասարակական կառույցներ
2013 թ.-ի դրությամբ գյուղն ունի դպրոց, գրադարան, բուժկետ և կապի հանգույց[3]։
Հայտնի անձինք
- Սիմոն Զավարյան - Հ.Յ.Դաշնակցության ղեկավարներից մեկը։
- Դանուշ Շահվերդյան - XX դարի 20-30-ականների հասարակական-պետական գործիչ, նա 1936 թ. Մարսելից Կոմիտասի աճյունը տեղափոխել է Երևան, որի համար էլ Բերիան նրան չի ներել և ինքն էլ, կինն էլ զրկվեցին կյանքից։
Ծանոթագրություններ
- ↑ Լոռու մարզի մարդահաշիվ (անգլ.)
- ↑ «Հայաստանի հանրապետության բնակավայրերի բառարան, էջ 207» (PDF). Վերցված է 2013 Նոյեմբերի 12-ին.
- ↑ «Այգեհատ». Վերցված է 2013 Նոյեմբերի 22-ին.
 | Վիքիպահեստն ունի նյութեր, որոնք վերաբերում են «Այգեհատ» հոդվածին։ |
|
