Հեղինե Տրոյացի (Ռոսսետտիի նկար)

Վիքիպեդիայից՝ ազատ հանրագիտարանից
Picto infobox artiste.png
Հեղինե Տրոյացի
Dante Gabriel Rossetti - Helen of Troy.jpg
տեսակ գեղանկար
նկարիչ Դանթե Գաբրիել Ռոսսետտի
տարի 1863
ուղղություն Պրեռաֆայելիտներ
գտնվում է Համբուրգ
հավաքածու Համբուրգի պատկերասրահ

«Հեղինե Տրոյացի» (անգլ.՝ Helen of Troy), անգլիացի նկարիչ և բանաստեղծ, «Պրեռաֆայելիտների եղբայրության» հիմնադիրներից հանդիսացող Դանթե Գաբրիել Ռոսսետտիի նկարներից: Այս ստեղծագործությունը հեղինակը վրձնել է 1863 թվականին:  Յուղաներկով կտավի չափերն են 32,8 × 26,7 սմ: «Հեղինե Տրոյացի» ստեղծագործությունն այսօր պահպանվում և ցուցադրվում է Համբուրգի պատկերասրահում (Գերմանիա):

Պատմություն[խմբագրել | խմբագրել կոդը]

Հեղինե Չքնաղին պատկերող այս կտավը միավորում է Ռոսսետտիի այդ ժամանակին բնորոշ արվեստի կարևորագույն մոտիվները: «Հեղինե Տրոյացի» ստեղծագործությունն իրենից ներկայացնում է ճակատագրական կնոջ հերթական մեկնաբանությունը: Հեղինեն համարվել է աշխարհի ամենագեղեցիկ կանանցից մեկը և Արևմտյան գրական-գեղարվեստական ստեղծագործությունների գլխավոր հերոսուհիներից մեկը[1]: Դանթե Գաբրիել Ռոսսետտին Հեղինե Չքնաղին վրձնել է մեդալիոնը մատներով սեղմած: Մեդալիոնի վրա Հեղինեի սիրեցյալ Պարիսի խորհրդանիշն է պատկերված: Կտավում կինը պատկերված է այրվող Տրոյայի ֆոնին[1]:

«Հեղինե Տրոյացի» ստեղծագործության համար որպես բնորդուհի կեցվածք է ընդունել Էննի Միլլերը: Նկարի հակառակ երեսին պահպանվել է մի գրություն, որը վերցված է Էսքիլեսի «Ագամեմնոն» ստեղծագործությունից: Գրությունը հունարեն է, որի թարգմանությունը հնչում է այսպես. «Նավերի կործանիչ, տղամարդկանց կործանիչ, քաղաքների կործանիչ» (հուն.՝ «ελεναυσ, ελανδροσ, λεεπτολισ»)[2]: Ամեն երրորդ հունարեն բառերը սկսվում են «էլե» վանկից՝ կրկնելով «Էլենա» անունը:

«Հեղինե Տրոյացի» կտավը մեծ հաջողություն է ունեցել Լիվերպուլի ակադեմիայի ցուցահանդեսին[3]: Կոլեկցիոներ Ջորջ Ռեյը հայտարարեց, որ նկարը դարձել է «ցուցահանդեսի մարգարիտը» իսկ Ուիլյամ Մայքլ Ռոսսետտին գրել է, որ «Հեղինե Տրոյացին» եղբոր՝ Դանթե Ռոսսետտիի «արվեստի վառ օրինակներից է»[4]:

Չորս տարի անց Ֆրեդերիկ Սենդիսը ստեղծեց իր «Հեղինեին»: Արդյունքում երկու նկարիչների միջև սկիզբ առավ լարվածությունը, քանի որ ըստ Ռոսսետտիի Սենդիսը զբաղվում է իր ստեղծագործությունների գրագողությամբ (դա ոչ միայն«Հեղինե Տրոյացուն» էր վերաբերում, այլև «Մարիամ Մագդաղենացի» նկարին)[5][6]:

Այսօր «Հեղինե Տրոյացի» ստեղծագործությունը պահպանվու մ և ցուցադրվում է Համբուրգի պատկերասրահում:

Ծանոթագրություններ[խմբագրել | խմբագրել կոդը]

  1. 1,0 1,1 «'Helen of Troy', Dante Gabriel Rossetti» (անգլերեն)։ Walker Art Gallery։ Վերցված է 2016-09-23 
  2. «Helen of Troy»։ Rossetti Archive (անգլերեն)։ Վերցված է 2016-09-23 
  3. «Helen of Troy»։ Rossetti Archive (անգլերեն)։ Վերցված է 2016-09-23 
  4. William Michael Rossetti (1889)։ Dante Gabriel Rossetti as Designer and Writer։ Cassell & Company, Limited։ էջ 41 
  5. «Shadowlight: The Pre-Raphaelite Goddess»։ Վերցված է 2007-10-02 
  6. «Helen of Troy»։ Preraphaelite Sisterhood