Ռենե թագավորի արկղիկ

Ռենե թագավորի արկղիկ կամ «Ռենե թագավորի մեղրամսի» արկղիկ, 1860-1862 թվականներին Ուիլյամ Մորիսի ընկերության՝ կաղնուց ստեղծած արկղիկ՝ դրվագավորված Դանթե Գաբրիել Ռոսսետտիի, Էդվարդ Բերն-Ջոնսի, Ֆորդ Մեդոքս Բրաունի և Վել Պրինսեպի հեղինակած նկարազարդ այլ փայտից տախտակներով։ Տախտակադրվագներում պատկերազարդված է արքա Ռենե Անժուացու և նրա երկրորդ կնոջ՝ Ժաննա դը Լավալի ռոմանտիկ պատմությունը։ Նկարիչները մեծ մասամբ առաջնորդվել են Վալտեր Սքոթի «Կառլոս Համարձակ, կամ Աննա Գեյերշտայնցի՝ Մշուշի կույս» վեպում թագավորի պատկերմամբ^[1]։ Ներկայումս արկղիկը պահպանվում է Վիկտորիայի և Ալբերտի թանգարանի հավաքածուում^[1]։

Այս արկղիկի անվանումը, միգուցե և դիտավորյալ, շփոթություն է առաջացնում. դա թագավորին պատկանող արկղիկ չէ, այլ փորձ է՝ ստեղծելու երևակայական առարկա՝ արկղիկ, որը արքան կարող էր պատվիրած լինել իր և կնոջ՝ Ժաննայի մեղրամսի համար (այդպիսի արկղիկ Վալտեր Սքոթը երբևէ չի հիշատակել)^[2]։

Արկղիկը Մորիսին պատվիրել է ճարտարապետ Ջոն Սեդոնը։ Նա նաև մշակել է արկղիկի կառուցվածքը, դրվագազարդումը և մետաղական մասը^[1]։ Արկղիկը եղել է Սեդոնի անձնական օգտագործման և ճարտարապետական քարտեզների պահպանման համար^[3]։ «Ռենե թագավորի մեղրամսի» թեմայի պատկերման գաղափարը պատկանել է Ֆորդ Մեդոքս Բրաունին^[1]։ Պրեռաֆայելիտները հաճախ են անդրադարձել այդ սյուժեին, քանի որ այն արտացոլել է ասպետական սերը, ինչպես նաև արվեստի ու արհեստի տարբեր ձևեր։ Ֆորդ Մեդոքս Բրաունը մշակել է «Ճարտարապետություն» ներկայացնող տախտակադրվագը, «Գեղանկարչություն» և «Քանդակագործություն» տախտակադրվագներն ստեղծել է Էդվարդ Բերն-Ջոնսը, իսկ Դանթե Գաբրիել Ռոսսետտին ստեղծել է «Երաժշտությունը» (որի հիման վրա նա հետագայում ամբողջական նկար է ստեղծել) և «Այգեգործություն»։ Մի քանի փոքր դրվագանկար ստեղծել է Վել Պրինսեպը (1838-1904)։ «Խեցեգործություն», «Ջուլհակություն», «Ապակեգործություն», «Դարբնություն» (որտեղ դարբնի դերում պատկերված է Ուիլյամ Մորիսը) դրվագների հեղինակը նշված չէ։ Մորիսը մշակել է բոլոր տախտակադրվագների դեկորատիվ ֆոնը^[1]։ Հետագայում Ուիլյամ Մորիսը նկարիչների հետ կրկնել է չորս հիմնական նկարազարդումները ապակենկարների շարքում, որոնք ներկայումս կրկին գտնվում են Վիկտորիայի և Ալբերտի թանգարանում^[1]։

Ֆորդ Մեդոքս Բրաուն, «Ռենե թագավորի մեղրամսի» արկղիկ, 1864 (նույն թեմայով ստեղծագործություն)
«Երաժշտություն» (կտավ, յուղաներկ), Դանթե Գաբրիել Ռոսսետտի, 1864
«Երաժշտություն» դրվագի էսքիզ, Դանթե Գաբրիել Ռոսսետտի
«Այգեգործություն» դրվագի էսքիզ, (Դանթե Գաբրիել Ռոսսետտի), դարձել է առանձին ստեղծագործություն^[2]

Ծանոթագրություններ[խմբագրել | խմբագրել կոդը]

↑ ^1,0 ^1,1 ^1,2 ^1,3 ^1,4 ^1,5 «King René's Honeymoon Cabinet» (անգլերեն). Victoria & Albert Museum. Արխիվացված օրիգինալից 2018 թ․ հունիսի 28-ին. Վերցված է 2018 թ․ հունիսի 24-ին.
↑ ^2,0 ^2,1 «King René's Honeymoon». Rossetti Archive.
↑ «King René's Honeymoon Cabinet». Rossetti Archive (անգլերեն).

Արտաքին հղումներ[խմբագրել | խմբագրել կոդը]

«Ռենե թագավորի մեղրամսի» արկղիկ

[mus-1] 1,0 ^1,1 ^1,2 ^1,3 ^1,4 ^1,5 «King René's Honeymoon Cabinet» (անգլերեն). Victoria & Albert Museum. Արխիվացված օրիգինալից 2018 թ․ հունիսի 28-ին. Վերցված է 2018 թ․ հունիսի 24-ին.

[arc2-2] 2,0 ^2,1 «King René's Honeymoon». Rossetti Archive.

[arc-3] «King René's Honeymoon Cabinet». Rossetti Archive (անգլերեն).

[1]

[2]

[3]