Ստեփանոս Դ Հռոմկլայեցի

Ստեփանոս Դ Հռոմկլայեցի;
Ծնվել է	անհայտ
Մահացել է	1293
Մահվան վայր	Կահիրե, Եգիպտոս
Մասնագիտություն	կաթողիկոս
Զբաղեցրած պաշտոններ	Ամենայն Հայոց Կաթողիկոս

Ստեփանոս Դ Հռոմկլայեցի (Կլայեցի, Հռոմայեցի, անհայտ - 1293, Կահիրե, Եգիպտոս), Ամենայն Հայոց կաթողիկոս 1290 թվականից։ Հաջորդել է Կոստանդին Բ Կատուկեցուն։ Ծննդյան թիվն անհայտ է, սակայն հայտնի է, որ ծնվել է Եկեղյաց գավառում։ Մահացել է 1293 թվականին Կահիրեում և ամփոփվել տեղի ասորական վանքում։

Մինչև կաթողիկոս դառնալը ուսանել ու պաշտոնավարել է Հռոմկլայի կաթողիկոսարանում, որի պատճառով էլ ստացել է Հռոմկլայեցի մականունը։ Այնուհետև դարձել է անապատական։ Նա դեմ է եղել կաթոլիկ եկեղեցու հետ հայոց եկեղեցու մերձեցմանը։

1292 թվականի մարտի 15-ին եգիպտական զորքերը պաշարում են Հռոմկլա դղյակը, որը 1150 թվականից եղել էր Հայոց կաթողիկոսանիստը։ Թշնամին Հռոմկլայի դեմ գործադրում է պարսպակործան մեքենաներ և 1292 թվականի հուլիսի 28-ին գրավում է այն՝ կոտորելով և գերեվարելով նրա բնակիչներին, ավերելով Սուրբ Գրիգոր, Սուրբ Աստվածածին և Սուրբ Փրկիչ եկեղեցիները, ինչպես նաև կաթողիկոսի ապարանքը։ Գերեվարվում է նաև Ստեփանոս Դ Հռոմկլայեցին՝ Գրիգոր Լուսավորչի Աջի հետ միասին։ Նրան դնում են երկաթե կապանքների մեջ, տանում նախ Դամասկոս, ապա՝ Կահիրե, որտեղ մեկ տարի բանտի մեջ մնալուց հետո վախճանվել է 1293 թվականին։

Կաթողիկոսական գահին Ստեփանոս Դ Հռոմկլայեցուն հաջորդել է Գրիգոր Է Անավարզեցին

Գրականություն

Ալիշան Ղ., Սիսուան, Վենետիկ, 1885
Անապատական, Համառօտ պատմութիւն հայ-լատին յարաբերութեանց, սկիզբէն մինչեւ 1382 թ., Անթիլիաս, 1981
Ստեփանոս Օրբելյան, Սյունիքի պատմություն, Երևան, 1986
Օրմանյան Մ., Ազգապատում, հատ. Բ, Ս. Էջմիածին, 2001

Նախորդող՝
Կոստանդին Բ Կատուկեցի

Կաթողիկոս
1290 –1293

Հաջորդող՝
Գրիգոր Է Անավարզեցի

Ծանոթագրություններ

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 11, էջ 134)։

Սա անձի մասին անավարտ հոդված է։ Դուք կարող եք օգնել Վիքիպեդիային՝ ուղղելով և լրացնելով այն։