Էր Ռիադ կամ Ռիադ (արաբ․՝ الرياض), Սաուդյան Արաբիայի մայրաքաղաք։ Էր Ռիադը համանուն պրովինցիայի վարչական կենտրոնն է, ինչպես նաև թագավորության ամենաբարձր շինության՝ Kingdom Centre-ի գտնվելու վայրը։ Ըստ 2010 թվականի բնակչության գնահատման Էր Ռիադի բնակչությունը կազմում է 4 878 473 մարդ[2]։
Քաղաքի անվանումը ծագել է հին արաբերենով rawdha բառից, որը նշանակում է այգիների և ծառերի վայր։ Իրականում ևս քաղաքի փողոցներում շատ են կանաչ տարածությունները։
Մոտ 4 հազար տարի առաջ ժամանակակից Էր Ռիադի տարածքում ապրում էին արաբական քոչվոր ցեղեր։ 18-րդ դարի սկզբներին Էր Ռիադը դարձավ վահհաբիտների կենտրոն։ 1821 թվականին դարձավ վահհաբիտների էմիրայության մայրաքաղաք Սաուդիների դինաստիայի օրոք[3]։
1902 թվականից Նաջդ շրջանի կենտրոնն էր։ 1932 թվականի աստիճանական միավորման արդյունքում ստեղծվեց պետություն Էր Ռիադ մայրաքաղաքով։