Բաշգյուղ
- Անվան այլ կիրառումների համար տե՛ս՝ Բաշգյուղ (այլ կիրառումներ)
Գյուղ | ||
---|---|---|
Երկիր | Հայաստան | |
Մարզ | Շիրակի | |
Մակերես | 10.5 կմ² | |
ԲԾՄ | 2020 մ | |
Պաշտոնական լեզու | Հայերեն | |
Բնակչություն | 56[1] մարդ (2012) | |
Ազգային կազմ | Հայեր | |
Ժամային գոտի | UTC+4 | |
|
Բաշգյուղ, գյուղ Հայաստանի Հանրապետության Շիրակի մարզում, մարզկենտրոնից 34 կմ հյուսիս-արևելք, ծովի մակերևույթից 2020 մ բարձրության վրա։ Գյուղը հիմնադրվել է 1830-ական թթ։ Նախկինում մտել է Երևանի նահանգի Ալեքսանդրապոլի գավառի մեջ և Ալեքսանդրապոլից արևելք ընկած մյուս Բաշգյուղից տարբերվելու համար մինչև 1880-ական թթ կոչվել է նաև Մեծ Բաշգյուղ։ Ունեցել է նաև Բաշգեղ, Բաշգյուղ Երկրորդ, Պաշգյուղ անվանումները։
Կլիմա
Գյուղը գտնվում է մեղմաթեք բարձրադիր լանջին՝ ծովի մակարդակից 2020 մ բարձրության վրա։ Կլիման բարեխառն լեռնային է, ձմեռը տևական, ցուրտ, հաստատուն ձնածածկույթով։ Լինում են ուժեղ քամիներ, հաճախակի են մառախուղները և ձնաբքերը։ Ամառը տաք է, համեմատաբար խոնավ։ Տարեկան տեղումների քանակը 600-700 մմ։ Բնական լանդշաֆտները սևահողային լեռնատափաստանները։
Բնակչություն
Գյուղի բնակչության նախնիների մի մասը 1828-1830 թթ տեղափոխվել են Մուշից և Արևմտյան Հայաստանի այլ վայրերից։ Ըստ ազգային վիճակագրական ծառայության տվյալների համայնքը 2013 թ-ի հունվարի 1-ի դրությամբ ունեցել է 62 մարդ։ Սեռային կազմում տղամարդիկ կազմում են 49%, կանայք՝ 51%։ Տարիքային խմբերը բաշխված են հետևյալ կերպ. մինչաշխատունակներ՝ 26%, աշխատունակներ՝ 53%, հետաշխատունակներ՝ 21%։
Բաշգյուղի ազգաբնակչության փոփոխությունը.[2]
Տարի | 1873 | 1906 | 1919 | 1931 | 1959 | 1970 | 1979 | 2001 | 2004 |
---|---|---|---|---|---|---|---|---|---|
Բնակիչ | 598 | 269 | 420 | 214 | 129 | 113 | 74 | 68 | 76 |
Տնտեսություն
Բաշգյուղ ունի 12 տնտեսություն։
Գյուղատնտեսական հողահանդակներում մեծ բաժին ունեն վարելահողերը (146 հա), խոտհարքերը (37 հա)։ Պետական հողերը գլխավորապես օգտագործվում են որպես վարելահողեր, արոտավայրեր, կազմելով համապատասխանաբար 50 և 630 հեկտար։ Զբաղվում են հացահատիկային, բանջարաբոստանային, կերային կուլտուրաների, կարտոֆիլի մշակությամբ։ Զբաղվում են նաև խոշոր եղջերավոր անասնապահությամբ, մեղվաբուծությամբ։
Պատմամշակութային կառույցներ
Բաշգյուղն ունի կանգուն եկեղեցի, մատուռ և ամրոց։
Հասարակական կառույցներ
2014 թ.-ի դրությամբ գյուղն ունի տարրական դպրոց, կապի հանգույց։
Տես նաև
Աղբյուրներ
Ծանոթագրություններ
- ↑ ԱՎԾ տվյալներ
- ↑ «Հայաստանի հանրապետության բնակավայրերի բառարան, էջ 43» (PDF). Վերցված է 2014 Ապրիլի 25-ին.