Լանջանիստ
| Գյուղ | ||
|---|---|---|
| Լանջանիստ | ||
 Արբանյակային պատկեր | ||
| Երկիր |  Հայաստան | |
| Մարզ | Արարատի | |
| Համայնք | Ուրցաձոր (համայնք) | |
| Հիմնադրված է | 1831 թ. | |
| Մակերես | 34,82 կմ² | |
| ԲԾՄ | 1815 մ | |
| Պաշտոնական լեզու | Հայերեն | |
| Բնակչություն | 230 մարդ (2011) | |
| Ազգային կազմ | Հայեր | |
| Ժամային գոտի | UTC+4 | |
| ||
Լանջանիստ, գյուղ Հայաստանի Հանրապետության Արարատի մարզում, Արարատի տարածաշրջանում, Ուրցաձոր համայնքում, մարզկենտրոնից գտնվում է 43 կմ հեռավորության վրա։
Պատմություն
Գյուղը հիմնադրվել է 1831 թվականին։ Նախնիները եկել են Պարսկահայաստանի Ղարադաղի գյուղերից։ Նախկինում ունեցել է Գադիլի, Խդըրլի, Կադիլի, Կատրլու, Ղադրլու անվանումները։ Լանջանիստ է վերանվանվել 1968 թվականին։ Եղել է Երևանի նահանգի Երևանի գավառի մեջ։ Գյուղից հյուսիս ընկած է հին ավերված եկեղեցու մնացորդներ։ Գյուղը գտնվում է Կատարասարի լեռների լանջին՝ բարձրադիր վայրում, ունի առողջարար կլիմա։ Տեղադրված է ծովի մակարդակից 1815 մ բարձրության վրա։
Գյուղից 3 կմ հարավ-արևմուտք կա 9-13-րդ դդ. գյուղատեղի, 7 կմ հյուսիս՝ «Երանոս» (9-16-րդ դդ.), 1 կմ հյուսիս՝ «Հին գյուղատեղ» (13-19-րդ դդ.), 7 կմ հյուսիս-արևելք՝ Ներքին Արմիկ (10-15-րդ դդ.), 1,5 կմ հյուսիս-արևմուտք՝ «Սպիտակ վանք» (13-17-րդ դդ.) գյուղատեղիներ։ «Սպիտակվանք» գյուղատեղիում կա համանուն եկեղեցի (1301 թ.), «Ներքին Արմիկ» գյուղատեղիում Արմիկի Սուրբ Ստեփանոս եկեղեցական համալիրը (13-14-րդ դդ.), «Հին գյուղատեղ» գյուղատեղիում՝ Սուրբ Աստվածածին մատուռը (17-19-րդ դդ.)։
Կլիման
Կլիման բարեխառն լեռնային է։ Ձմեռը տևական է, ցուրտ, հաստատուն ձնածածկույթով։ Ամառը տաք է, համեմատաբար խոնավ։ Հունվարյան միջին ջերմաստիճանը տատանվում է -8-ից -12 °C, հուլիսյան միջինը՝ 15-ից 18 °C։ Բնական լանդշաֆտները սևահողային տափաստաններն են։ Ագրոկլիմայական տեսակետից ընկած է մասնակի ոռոգման գոտում։
Բնակչություն
| Տարի | 1831 | 1897 | 1926 | 1939 | 1959 | 1970 | 2001 | 2004 | 2011 |
|---|---|---|---|---|---|---|---|---|---|
| Բնակիչ | 45 | 588 | 377 | 604 | 362 | 263 | 216 | 138 | 230 |
Տնտեսություն
Գյուղն ունի առկա 115 տնտեսություն։ Համայնքի տնտեսության մասնագիտացման ճյուղը գյուղատնտեսությունն է, համախառն բերքի մեծ մասը տալիս է բուսաբուծությունը։ Գյուղատնտեսական նշանակության հողերը կազմում են շուրջ 1489 հա։ Պահուստային հողերը օգտագործվում են հիմնականում որպես արոտավայրեր՝ 1300 հա։ Զբաղվում են կաթնամսատու անասնապահությամբ, թռչնաբուծությամբ։
Արդյունաբերություն չունի։
