Ինքնադիմանկար` վիրակապած ականջով

Վիքիպեդիայից՝ ազատ հանրագիտարանից
Jump to navigation Jump to search
Picto infobox artiste.png
Ինքնադիմանկար` վիրակապած ականջով
Self-Portrait with a Bandaged Ear - Vincent van Gogh.jpg
տեսակգեղանկար
նկարիչՎինսենթ վան Գոգ
տարի1889
բարձրություն60 սանտիմետր
լայնություն49 սանտիմետր
ստեղծման վայրԱռլ
ժանրինքնապատկեր
նյություղաներկ և կտավ
գտնվում էՔորթոուլդ պատկերասրահ
հավաքածուՔորթոուլդ պատկերասրահ
մասն էԻնքնադիմանկար կտրած ականջով և ծխամորճով
կայք
Self-Portrait with Bandaged Ear (F527) by Vincent van Gogh Վիքիպահեստում

Ինքնադիմանկար` վիրակապած ականջով, հոլանդացի նկարիչ Վինսենթ վան Գոգի ինքնադիմանկար: Նկարը ստեղծվել է 1889 թվականին[1]:

Նկարագրություն[խմբագրել | խմբագրել կոդը]

«Գեյշան բնության մեջ», 1870-ական թվականների ճապոնական փորագրություն, որի մի մասը պատկերված է Վան Գոգի ինքնադիմանկարի հետնաֆոնին:

Ինքնադիմանկարում պատկերված է Վան Գոգը` երկնագույն գլխարկով, կանաչ վերնազգեստով և վիրակապով, որը փակում է ականջը և ձգվում կզակի տակ: Նկարիչը պատկերված է ավադական երեք քառորդ դիրքով, իսկ նրա հայացքն ուղղված է կադրից մի փոքր աջ: Կերպարի հետևում բաց պատուհանն է, որով պետք է օդը ներթափանցի ներս: Հետին ֆոնում երևում են նաև մոլբերտը` մի քանի ոչ պարզ գրառումներով, ինչպես նաև ճապոնական մի փորագրություն փայտի վրա: Փորագրությունը նույնացնում են «Գեյշան բնության մեջ» ճապոնական փորագրության հետ, որ տպագրվել է 1870-ական թվականներին: Դա ցույց է տալիս ճապոնականության ազդեցությունը Վան Գոգի ստեղծագործության վրա. ճապոնական փորագրությունները հանդիպում են նաև նկարչի այլ նկարների ֆոնին[2]: Նկարը նկարված է իմպաստո ոճով. լուսային էֆեկտն ուժեղացնելու համար կիրառվել են խիտ, գունեղ վրձնահարվածներ, որոնք հիմնականում ուղղահայաց են արված: Դրա շնորհիվ ստեղծվել է տեքստուրա, որը դուրս է գալիս կտավից` ավելացնելով մակերևույթի հարթությունը: Մաշկի գույնը կանաչ ու դեղին գույներով է հագեցած: Նկարչի ականջը փակող վիրակապը մատնանշում է նրա ամենահայտնի կոնֆլիկտը: Վան Գոգն իր ինքնադիմանկարները նկարելիս կիրառել է հայելի, այդ պատճառով որոշ մարդիկ սխալմամբ ենթադրում են, որ նա աջ ականջի մի մասն է կտրել ձախի փոխարեն[3]:

Պատմություն[խմբագրել | խմբագրել կոդը]

Վան Գոգը Փարիզից տեղափոխվել է Առլ` հույս ունենալով ստեղծել նկարիչների միություն, որտեղ նկարիչները կսատարեն միմյանց: Նա հրավիրում է Պոլ Գոգենին` մի նկարչի, ում հետ հետ նա ընկերացել էր Փարիզում: Սակայն այս զույգն այնքան էլ հաշտ չէր. նկարիչները հաճախ են վիճաբանում, երբեմն` շատ ուժգին: 1888 թվականի դեկտեմբերի 23-ին վիճաբանության ժամանակ Վան Գոգը նոպայի մեջ է ընկնում, որի ժամանակ Գոգենին սպառնում է ածելիով, սակայն հետո ինքն է տրավմա ստանում` կտրելով ձախ ականջի մի մասը: Հոգեկան անհավասարակշռության մեջ` նա ականջի կտրած հատվածը տանում է Maison de Tolérance հասարակաց տուն` ցանկանալով նվիրել Ռեյչել անունով մարմնավաճառահուն: Երբ հաջորդ առավոտ Գոգենը վերադառնում է, տեսնում է, որ տանը ոստիկաններ կան, և ամեն սենյակում արյան հետքեր են: Վան Գոգը վնասել էր վզի երակը, ինչի հետևանքով շատ արյուն էր կորցրել: Նրան տարել էին հիվանդանոց, որտեղ նա խոստովանել էր, որ չի հիշում, թե ինչ է կատարվել նոպայի պահին: Իր ամբողջ կյանքի ընթացքում Վան Գոգը տառապել է նմանատիպ նոպաներից, որոնք երբեմն բնութագրվել են կպչուն մտքերով[2]:

Նկարի ձեռքբերման պատմություն[խմբագրել | խմբագրել կոդը]

Վան Գոգի մահվան ժամանակ նկարը պատկանել է Ժյուլիեն Տանգիին, չնայած պարզ չէ, թե ինչպես է այն հայտնվել նրա մոտ: Տանգին 1887 թվականին մի քանի անգամ որպես բնորդ է ծառայել նկարչին: Նկարը ցուցադրվել է Փարիզում 1901 և 1905 թվականներին` Վան Գոգի նկարների հետահայաց մեծ ցուցադրության ժամանակ: 1928 թվականին նկարը ձեռք է բերել Սեմյուել Կուրտոն: Ներկայումս այն գտնվում է Կուրտոյի պատկերասրահում (Լոնդոն, Մեծ Բրիտանիա)[4]:

Որոշ քննադատներ այս նկարը համարում են կրկնօրինակ, սակայն եթե դա ճիշտ լիներ, ապա այն պետք է որ նկարված կլիներ 1890-ական թվականներին, իսկ այդ ժամանակ դա արժեքավոր չէր լինի, քանի որ նկարիչը մահացել էր մի քանի տարի առաջ և իր կենդանության օրոք մեկ-երկու նկար էր միայն վաճառել: 1889 թվականի հունվարի 17-ին Վինսենթը իր եղբայր Թեոյին գրել է, որ վերջացրել է ևս մեկ ինքնադիմանկար: Շփոթմունք է առաջանում, թե արդյոք դա եղել է այս նկարը, թե «Ինքնադիմանկար կտրած ականջով և ծխամորճով» նկարը[2]: Այս նկարներից յուրաքանչյուրում Վան Գոգը պատկերված է նույն հագուստով և նստած է նույն դիրքով, չնայած տարբեր են գունային երանգները, պարագաները և դիրքերը: «Ինքնադիմանկար կտրած ականջով և ծխամորճով» նկարը ակադեմիական շրջանակներում ավելի լայն ճանաչում ունի որպես Վան Գոգի վրձնին պատկանող նկար:

Ծանոթագրություններ[խմբագրել | խմբագրել կոդը]

  1. Jonathan Jones (9 September 2000)։ «Self-Portrait With a Bandaged Ear, Van Gogh (1889)»։ The Guardian (Guardian Media Group)։ Վերցված է 23 February 2015 
  2. 2,0 2,1 2,2 «Masterclass: Vincent van Gogh (1853-1890)»։ Art Review (50)։ 1998 
  3. «Vincent van Gogh Gallery: Self-Portraits»։ vangoghgallery.com։ Վերցված է 26 January 2017 
  4. «Self-portrait with bandaged ear»։ Courtauld Institute of Art։ Վերցված է May 3, 2016