Դիարբեքիր

Վիքիպեդիայից՝ ազատ հանրագիտարանից
Քաղաք
Դիարբեքիր
Diyarbakır
City of Diyarbakır.jpg
Կոորդինատներ: 37°54′39″ հս․ լ. 40°14′12″ ավ. ե. / 37.91083° հս․. լ. 40.23667° ավ. ե. / 37.91083; 40.23667
Երկիր Թուրքիա Թուրքիա
ՎիլայեթԻլ Դիարբեքիրի նահանգ
Այլ անվանումներ Ամիդ, Տիգրանակերտ
Մակերես 685 կմ²
ԲԾՄ 675±1 մետր
Խոսվող լեզուներ Քրդերեն, թուրքերեն, հայերեն
Բնակչություն 845 000 մարդ (2010)
Ազգային կազմ քրդեր, թուրքեր, սիրիացիներ, հայեր
Կրոնական կազմ իսլամ, քրիստոնեություն
Հեռախոսային կոդ +90 412
Փոստային ինդեքս 21000
Պաշտոնական կայք diyarbakir-bld.gov.tr
##Դիարբեքիր (Թուրքիա)
Red pog.png

Դիարբեքիր (Հին անունը Ամիդ), քաղաք Մեծ Հայքի Աղձնիք նահանգում՝ Արևմտյան Տիգրիսի աջ ափին՝ Հայկական Տավրոսի հարավային ճյուղից (Կարաջադաղ) իջած հրահոսանքի ծայրին։

Սեպագիր արձանագրություններում քաղաքը հիշատկված է որպես Բիտ-Զամանի երկրամասի կենտրոն:

Անվան ստուգաբանություն[խմբագրել | խմբագրել կոդը]

Դիարբեքիր անվանումը ի սկզբանե ունեցել է միայն երկրամասը, այնուհետև ժողովուրդը այդ անվանումը տվել է նաև նրա կենտրոնը հանդիսացող Ամիդ քաղաքին:

Դիարբեքիր անվանման ծագման հետ կա երկու վարկած.[1]

  1. Այն արաբերեն բառ է և կազմված է դիար և Բեքր անվանումների միացումից: Դիարը նշանակում է Երկիր, նահանգ, շրջան կամ բնակվելու տեղ: Բեքրը հանդիսանում է տարածքի առաջին կառավարիչներից մեկը:
  2. Օսմանյան երկիրը երկար ժամանակ չի կարողացել նվաճել Դիարբեքիրի տարածքը և անվաճ տարածքին տվել է «Դիար բեքիր» անվանումը, որը նշանակում է «կույսի երկիր»:

Անվանումներ[խմբագրել | խմբագրել կոդը]

Դիարբեքիրը տարբեր ժամանակներում ունեցել է տարբեր անվանումներ: Դրանք են. Ամդացվոց քաղաք. Ամեդ, Ամեդա, Ամեդի, Ամեդու, Ամիդ, Ամիդա, Ամիդի, Ամիդիա, Ամիդու, Ամիթ, Ամիտ, Ամիտա, Ամմեա, Բիտ-Զամանի, Գարա-Ամիդ, Գարա-Ամիտ, Գարա-Համիդ, Դիարբագ, Դիարբակ, Դիաբակր, Դիարբաք,Դիարբաքր, Դիարբեկ, Դիարբեկր, Դիարպեկ, Դիյարբեքիր, Էմդ, Էմիդ, Կարա-Ամիդ, ԿարաճԱմիտ, Կարա-Համիդ, Կարամիտ, Կոստանդիա, Համեթ, Համիդ, Համիթ, Յամիթ, Տիարբեքիր, Տիարպեքիր, Տիգրանակերտ:[1]

Պատմություն[խմբագրել | խմբագրել կոդը]

Հիմնադրման ժամանակն անորոշ է։ Աքադդական սեպաձև արձանագրություններում հիշատակվում է մ.թ.ա. 2-րդ հազարամյակի վերջին՝ Ամեդու անունով։ Մ.թ.ա. IX դաորւմ հիշատակվում է, որպես Բիտ Զամանի իշխանության կենտրոն։ Մ. թ. ա. IX-VIII դարերում Վանի թագավորության գերիշխանության ներքո մասնակցել է հակաասորեստանյան պայքարին։ Մ.թ.ա. 730-ական թթ. Թիգլատպալասար III-ը գրավել է Դիարբեքիրը և դարձել Ասորեստանի «Տուրտանի տուն» կուսակալության կենտրոն։ Ասորեստանյան տիրակալության քայքայումից հետո (մ.թ.ա. VIIդ. վերջ) միացվել է Հայաստանին։

Հայոց ավանդական պատմությունը Դիարբեքիրի կառուցումը վերագրում է Հայկազունի կամ Երվանդունի Տիգրանին (մ.թ.ա. VIդ. 1-ին կես), որի անունով հայ պատմիչներն այն անվանել են նաև Տիգրանակերտ։ Այդ պատճառով պատմագիտության մեջ Դիարբեքիրը երբեմն շփոթել են Աղձնիք նահանգում Տիգրան Բ-ի հիմնած Տիգրանակերտի հետ։

298 թ. Դիարբեքիրը զավթել է Հռոմեական կայսրությունը։ 332 թվականին Կոստանդինոս Մեծ կայսրը վերակառուցել է քաղաքի ամրությունները, այն դարձրել հռոմեական ռազմակայան։ IV-XVIIդդ. քաղաքին փոխնիփոխ տիրել են պարսիկները, բյուզանդացիները, արաբները, քրդերը, սելջուկյան թուրքերը, թաթար-մոնղոլները, թուրքմենները։ Սեֆյան շահ Իսմայիլի դեմ կռիվներում Սելիմ I սուլթանը գրավել է Դիարբեքիրը և 1515 թ. ենթարկել օսմանյան թուրքերի տիրապետությանը։ Եղել է Դիարբեքիր նահանգի կենտրոնը։

1895 թվականի համիդյան ջարդերի ժամանակ ոչնչացվել է 3000 հայ։ Կողոպտվել և հրկիզվել է մոտ 2 հազար տուն, 2,5 հազար խանութ և կրպակ։ Շուրջ 5 հազար հայեր բնաջնջվել են 1915 թ. Մեծ եղեռնի ժամանակ։

Այժմ Դիարբեքիրը Թուրքիայի համանուն իլի կենտրոնն է։ 845.000 բնակչություն (2011.)։ Ունի սննդի և տեքստիլ արդյունաբերության, ավտոհավաքման գործարաններ։ Երկաթուղային կայան է, խճուղային ճանապարհների հանգույց։ Ներկայումս Դիարբեքիրում բնակվում է 16 հայկական ընտանիք հիմնականում Սուրբ Կիրակոս եկեղեցու շրջակայքում։

Բնակչություն[խմբագրել | խմբագրել կոդը]

Միջին դարերում Դիարբեքիրը մարդաշատ քաղաք էր: Բնակչության գերակշռող մասը հայեր էին: Կային նաև արաբներ, քրդեր, թուրքական ժողովուրդներ:

XIX դարի վերջին և XX դարի սկզբին քաղաքն ուներ 40-45 000 բնակիչ, որից հայեր էին 10-15 000-ը:

Հայերը կենսուրախ էին: Սիորւմ էին զբոսանքներ, խնջույնքեր և ուխտագնացություններ: Դրանք հաճախ ուղեկցվում էին երգ ու պարով:[1]

Տնտեսություն[խմբագրել | խմբագրել կոդը]

Մինչև XX դարի սկիզբը Դիարբեքիրի բնակչության մեծամասնությունը կազմող հայերը զգալի դեր են խաղացել տնտեսական և մշակութային կյանքում։ Զբաղվել են արհեստներով, առևտրով, երկրագործությամբ, ձկնորսությամբ։ Մերձավոր Արևելքի շուկաներում հռչակված էր Դիարբեքիրի ոսկերիչների, ջուլհակների, ներկարարների, կաշեգործների, դերձակների արտադրանքը։ Դիարբեքիրի մոտ գտնվող հանքերից արտահանում էին անագ, պղինձ, երկաթ։ Քաղաքի շուրջը տարածված բերրի դաշտերը հնուց ի վեր հիշատակվում են որպես ցորենի շտեմարան։

Պատմամշակութային կառույցներ[խմբագրել | խմբագրել կոդը]

Դիարբեքիրի ամրությունները կառուցվել են անշաղախ ագուցված վիթխարի քարերից։ 8 կմ երկարություն, 10 մ բարձրություն և 5 մ լայնություն ունեցող, հիմնականում կանգուն պարիսպը մի կողմից հարում է հնագույն բերդին (այժմ՝ ավերակ), մյուս կողմից՝ Տիգրիսի տասնակամար կամրջին։ Պարիսպն ունեցել է 72 բարձրաբերձ ու կիսաբոլոր աշտարակ, 4 մետաղակուռ դարպաս։ 72 աշտարակները խորհրդանշել են Քրիստոսի 72 աշակերտներին, իսկ 12 առավել հաստապատ աշտարակները` առաքյալներին:

4 դարպասներից յուրաքանչյուրն ունեցել է իր անվանումը.[1]

  • հյուսիսայինը կոչվել է Հայոց դուռ (արաբերեն Բաբ-ալ-Արմանի), իսկ հետագայում` Լևոնի դուռ, Կարնո կամ Էրզրումի դուռ
  • արևմտյանը կոչվել է Հոռոմաց (բյուզանդացիների) դուռ
  • հարավայինը` Մերդինի (Մարդինի) դուռ
  • արևելյանը` Նոր դուռ կամ Շաթ (գետի) դուռ

Քաղաքի հյուսիսարևելյան մասում՝ բարձրադիր ժայռին կառուցված միջնաբերդը շրջափակված էր քառադարպաս, աշտարակավոր պարսպով։ Միջնաբերդի ապարանքներից նշանավոր էին Ոսկեզուն և Արքունի պալատները, միջնադարյան բազմաթիվ եկեղեցիներ (Ս. Աստվածածին, Ս. Կաթողիկե, Ս. Գևորգ, Ս. Երրորդություն, Ս. Հովհաննես), որոնք XVI-XVII դարերում վերածվել են մզկիթների։

XX դարի սկզբին Դիարբեքիրն ուներ 50-ից ավելի եկեղեցիներ ու մզկիթներ: Դիարբեքիրի մոտ 10 հազար հայեր ունեին գործող երկու եկեղեցի (Ս.Սարգսի հնգախորան և Ս. Կիրակոսի յոթնախորան):

Քաղաքի գլխավոր մզկիթը եղել է Ուլու-ջամին, որը հնում եղել է բյուզանդական Հերակլ կայսեր օրոք 629 թվականին կառուցված Ս. Աստվածածին եկեղեցին: Մզկիթներին են վերածվել նաև Կաթողիկե, Ս. Գևորգ, Ս. Երրորդություն, Ս. Հովհաննես և այլ եկեղեցիները:[1]

Կրթություն[խմբագրել | խմբագրել կոդը]

Դիարբեքիրում գործում էր յոթ հայկական վարժարան (երկուսը պատկանում էր եկեղեցուն, մյուսները՝ Անձնվեր, Հայրենասիրաց, Մեսրովբյան, Պատանյաց և Համազգային ընկերություններին)։ Վարժարաններից մի քանիսում ուսուցանում էին նաև ճարտարապետություն, աշխարհագրություն, տրամաբանություն, փիլիսոփայություն, երկրաչափություն, երաժշտություն:[1]

Այցելեք նաև[խմբագրել | խմբագրել կոդը]

Ծանոթագրություններ[խմբագրել | խմբագրել կոդը]

  1. 1,0 1,1 1,2 1,3 1,4 1,5 «Հայաստանի և հարակից շրջանների տեղանունների բառարան», հտ 2, էջ 99-102