Պողոս առաքյալ

Պողոս Առաքյալ, հեղինակ՝ Էլ Գրեկո

Պողոս Առաքյալ (եբրայերեն` שאול‎, եբրայերեն` שאול התרסי‎ Šaʾul HaTarsi (Շաուլ Տարսեցի); հին հունարեն՝ Σαούλ (Saul), Σαῦλος (Saulos) и Παῦλος (Paulos); լատիներեն՝ Paulus կամ Paullus, ծնված մ.թ.10 թ. Թարսուս, Կիլիկիա - մահացած մ.թ. 67 թ. Հռոմ, Իտալիա)--նշանավոր քրիստոնեական գործիչ, համարվում է 13-րդ առաքյալը, ծնունդով Կիլիկիայի Տարսոն քաղաքից էր, որի համար էլ կոչվել է Տարսոնացի: Հրեական անունը Սավուղ`հունական ձևով Սողոս: Հռոմի քաղաքացի էր, կրթությամբ ու դավանանքով` փարիսեցի, արհեստով` վրանագործ: Ելնելով հայրենի օրենքի և ավանդույթի հանդեպ նախանձախնդրությունից` հալածել է քրիստոնյաներին, նրանց մատնել աքսորի և սպանության: Նա մասնակից էր Ստեփանոս Նախավկայի սպանությանը: Սակայն Սավուղը կամ Սողոսը Դամասկոս մեկնելու ճանապարհին հանդիպել է հարուցյալ Հիսուսին, որը նրան կարգել է հեթանոսների առաքյալ: Հիսուսին, որպես Աստծո Որդի և Փրկիչ ընդունելուց հետո, նա «սուրբ Հոգով լցված», քարոզել է Դամասկոսում, Երուսաղեմում, Անտիոքում, Կիպրոսում, Պամփյուլիայում, Լյուստրիայում (Իկոնիոն), Փռուգիայում, Հունաստանում, Հռոմում և այլուր` ենթարկվելով բազում հալածանքների, չարչարանքների, աքսորի, բանտարկության ևն: Պողոս առաքյալը հեղինակ է 14 առաքելական թղթերի, որոնք Ընդհանրական եկեղեցին դիտում է որպես ուղեցույց թղթեր` Քրիստոսի վարդապետության ճշգրիտ ընկալման առումով: Դրանք ուղղված են հռոմեացիներին, կորնթացիներին, եբրայեցիներին, հեթանոս նորադարձներին և սփյուռքի հավատացյալ հրեաներին: Պողոս առաքյալի թղթերը համարվում են քրիստոնեական մտքիռահվիրանները`գրած ավելի վաղ, քան Ավետարանները: Նա Հռոմում, 67 կամ 68-ին, Ներոն կայսեր օրոք, մարտիրոսական պսակ է ընդունել` գլխատվելով: Պողոս առաքյալը ենթարկվել է մեծ փորձությունների, սակայն իր կյանքում եղել է միշտ հավատարիմ Քրիստոսին: Նա ուներ ամեն բան, բայց ինչպես ինքն է ասում ամեն ինչ թողեց Քրիստոսին շահելու համար: