Քաղաքագիտություն

Վիքիպեդիայից՝ ազատ հանրագիտարանից

Քաղաքագիտություն կամ Քաղաքական գիտություն (հուն.՝ πολιτικός – հասարակական, հուն.՝ πολίτης-ից` քաղաքացի, նաև հուն.՝ πόλις-ից քաղաք; հին հունարեն՝ λόγος ` ուսմունք, խոսք), գիտություն քաղաքականության վերաբերյալ, ուսումնասիրում է մարդու և հասարակության կապը պետական և ոչ պետական կառույցների, պետության և այլ կառույցների հետ, ուսումնասիրում է նաև պետության վարած քաղաքականությունը և դրա նպատակահարմարությունը առանձին ոլորտներում։ Այդ մասին նշվում է Արիստոտելի «Պոլիտիկա» աշխատության մեջ, որը նվիրված է հին հունական 100-ից ավելի քաղաք-պետությունների հասարակական կյանքի ուսումնասիրությանը:

Աշխատանքի հասարակական նոր բաժանման շնորհիվ ստեղծվեցին մարդաշատ քաղաքներ, առաջացավ շուկա, արմատապես փոխվեցին մարդկանց կյանքի հիմքերը, քաղաքները դարձան հասարակական, վարչական և մշակութային կենտրոններ, հասարակության շերտավորման գործնթացն ավելի խորացավ: Այս բոլոր իրադարձությունները օրակարգ դարձրին մի շարք հարցեր` ինչպես ապրել միասին, ինչպես ընդանուր հմաձայնության գալ, ինչպես զուգակցել մասնավոր և ընդհանուր շահերը, ինչպես ղեկավարել մարդկանց համատեղ կյանքը: Հասարակությունը քաղաքականացվեց, ստեղծվեցին տիրապետության և ենթակայության հարաբերություններ, սկիզբ առավ իշխանությունը` իբրև մարդկանց հարաբերությունները հավասարակշռող ուժ` քաղաքականություն: