Զազա

Վիքիպեդիայից՝ ազատ հանրագիտարանից
Զազաներ
Flag of Zazaistan.svg
Զազաների դրոշը
Ընդհանուր քանակ

2-3 միլիոն մարդ

Բնակեցում
Թուրքիա Թուրքիա 1,114—2 միլիոն մարդ
Իրան Իրան 300—400 հազար մարդ
Գերմանիա Գերմանիա 170 հազար մարդ
Ղազախստան Ղազախստան 8—12 հազար մարդ
Ամերիկայի Միացյալ Նահանգներ ԱՄՆ 2—3,5 հազար մարդ
Լեզու(ներ)
Զազայերեն, նաև օգտագործվում են թուրքերենն ու քրդերենը (քրմանջի)
Հավատք(ներ)
Իսլամի ալավի և սուննի ճյուղերը


Զազաներ կամ դիմլի` իրանական ժողովուրդ‌[անհրաժեշտ է ևս 2 աղբյուր][1], որը բնակվում է այժմյան Թուրքիայի արևելյան հատվածում` Հայկական լեռնաշխարհի տարածքով հոսող Տիգրիսի և Եփրատի վերին հոսանքների շրջաններում. հաճախ համարվում է հարևան քուրդ ժողովրդի բաղկացուցիչ մասը։ Քրդերից զազաները տարբերվում են իրենց լեզվով, որը ծագում է մերձկասպյան շրջանից և ունի միայն հեռու բարեկամական կապ բուն քրդերենի հետ, և հավատքով, որը հանդիսանում է շիա իսլամի ճյուղերից մեկը. ալավիզմը զազաների գերակշիռ մասի հավատքն է։

Բնակեցման շրջանները[խմբագրել | խմբագրել կոդը]

Զազաները զբաղեցնում են Թուրքիայի արևելյան և հարավ-արևելյան շրջանները։ Որոշ վարկածների համաձայն, զազաները եկել են և իրենց բնակությունը հաստատել այստեղ Կասպից ծովի հարավային լեռնային տարածքից, որն անվանվում է Դայլամ։ Հյուսիսային զազաները զբաղեցնում են Դերսիմը` այժմյան թուրքական Թունջելի նահանգը։ Կենտրոնական զազաները բնակվում են Բինգյոլի նահանգում, հարավայինները` Սիվերեկ քաղաքի շրջանում, ինչպես նաև Շանլիուրֆայի նահանգում։ Զազաներն ապրում են նաև հարևան շրջաններում, մասնավորապես Դիարբեքիրում։ 1938 թվականի անհաջող ապստամբությունից հետո շատերը բռնի ուժով տեղահանվեցին այլ թուրքական քաղաքներ՝ Այդին, Բիլեջիկ, Բուրդուր, Բուրսա, Բալիքեսիր, Դենիզլի, Զոնգուլդաք, Քիրքլարելի, Քյութահյա, Մուգլա, Սպարտա, Թեքիրդաղ, Չանաքկալե, Էդիրնե և Էսքիշեհիր։ Գոյություն ունի նաև մեծ սփյուռք Եվրոպայում (մոտ 300 000 մարդ), նախ և առաջ՝ Ավստրիայում, Բելգիայում, Գերմանիայում, Նիդերլանդներում և Շվեյցարիայում։ Զազայերեն խոսացողների կոնկրետ թիվն անհայտ է, սակայն կարելի է ենթադրել, որ նրանց թվաքանաքը կազմում է 2-4 միլիոն մարդ։

Զազաների տարաբնակեցումը Թուրքիայի տարածքում․ կապույտ գույնով նշված է Դերսիմը (հյուսիսային զազաներ), կարմիրով՝ Բինգյոլը (կենտրոնական զազաները), մութ կապույտով՝ Սիվերեկը (հարավային զազաները)։

Ծագումը և լեզուն[խմբագրել | խմբագրել կոդը]

«Դիմլի» կամ «դիմիլի» անվանումը ծագում է *dēlmīk-ից, ինչն էլ նշանակում է «դեյլեմիտ»։ Այժմյան այս իրանալեզու ժողովրդի տարաբնակեցումը Հայկական լեռնաշխարհում կապված է դեյլեմիտների իրենց հայրենիք Դայլամից արտագաղթի հետ 10-12-րդ դարերում։ Այս կարծիքը ապացուցվում է նաև նրանով, որ զազայերենը ավելի սերտ բարեկամական կապերի մեջ է գիլյաներենի, մազենդերաներենի, սեմնաներենի և սանգեսարերենի հետ, այլ ոչ հարևան քրդերենի։ Զազաներից շատերը տիրապետում են նաև թուրքերենին։ Կան եռալեզու՝ առաջին երկուսից բացի տիրապետում են նաև քրդերենին։ Երկար ժամանակ զազայերենը չի ունեցել գիր։ 19-րդ դարի կեսերին օգտագործվել է արաբական այբուբենը, 20-րդ դարի վերջին տարածում գտավ լատինական այբուբենը, որը շատ դեպքերում օգտագործվում է սփյուռքում, ավելի քիչ՝ Թուրքիայում։

Հասարակական կարգը և հիմնական զբաղմունքները[խմբագրել | խմբագրել կոդը]

Զազաները ունեն զարգացած ցեղային կառուցվածք։ Հիմնական ցեղերն են աբասանը, աղաչանը, ալանը, բամասուրը, դուիշը, դավրեշ-ղուլաբանը, դավրեշ-ջամալանը, ղայ-դարանը, քորեշանը, մամիկին և յուսուֆանը։

Ի տարբերություն քոչվոր քրդերի, զազաները հնուց ի վեր զբաղվել են հողագործությամբ, չնայած դրան, լեռնային անասնապահությունը տնտեսության հիմնական մասերից է։ Դերսիմը հայտնի էր նաև իր այգիներով։

Հավատքը[խմբագրել | խմբագրել կոդը]

Զազաների մեծամասնությունը մուսուլման-ալավի է, փոքրամասնությունը՝ մուսուլման-սուննի։

Հայտնի զազաներ[խմբագրել | խմբագրել կոդը]

  • Սաիդ Ռիզա - Դերսիմի քրդերի ապստամբության առաջնորդը։
  • Քեմալ Քալիչդաղողլու - Թուրքիայի ժողովրդա-հանրապետական Cumhuriyet Halk Partisi կուսակցության առաջնորդը 2010 թվականից։
  • Մախսուն Քիրմիզիգյուլ - դերասան, երգիչ, ռեժիսոր, գործարար. հանդիսանում է նաև Թուրքիայում մի մեծ ձայնագրող ստուդիայի սեփականատերը։

Տես նաև[խմբագրել | խմբագրել կոդը]

Ծանոթագրություններ[խմբագրել | խմբագրել կոդը]

  1. DIMLĪ (անգլ.)