Ֆրանց Շուբերտ

Ֆրանց Շուբերտ
(երգահան)
Բնագիր ԱԱՀ՝	Franz Peter Schubert
Ծննդյան օր՝	հունվար 31, 1797
Ծննդավայր՝	Ավստրիա
Վախճանի օր՝	նոյեմբեր 19, 1828

Ֆրանց Շուբերտ (գերմաներեն՝ Franz Peter Schubert , 1797թ. հունվարի 31 – 1828թ. նոյեմբերի 19), ավստրիացի երգահան, գրել է շուրջ 600 երգեր, 9 սիմֆոնիաներ (ներառյալ հանրաճանաչ «Անավարտ սիմֆոնիան»), հոգևոր երաժշտություն, օպերաներ և մեծ թվով կամերային և դաշնամուրային երաժշտություն: Հայտնի է իր յուրահատուկ մեղեդային և հարմոնիկ ոճով:

Շուբերտը ծվնել է երաժշտական ընտանիքում և ստացել է երաժշտական կրթություն մանկության տարիներին: Թեև Շուբերտի շուրջ ձևավորվել էր ընկերների ու մերձավորների շրջապատ, որը հիանում էր իր ստեղծագործություններով, իր կյանքի ընթացքում նրա երաժշտությունը չէր վայելում լայն ճանաչում: Նրան երբեք չհաջողվեց ընդունվել մշտական աշխատանքի և ապահովել իր համար վաստակի կայուն աղբյուր, ստիպված էր ապավինել իր ընկերների և ընտանիիքի օժանդակությանը: Որոշ ոչ կանոնավոր վաստակ էին ապահովում իր երաժշտական գործերի հրատարակումը և երաժշտության մասնավոր դասերը: Մահացել է 31 տարեկան հասակում «տիֆի տենդ» անորոշ ախտորոշումամբ հիվանդությունից, սակայն որոշ հետազոտողներ գտնում են, որ Շուբերտի մահվան իրական պատճառը սիֆիլիսն է:

Շուբերտի երաժշտության նկատմամբ հետաքրքրությունը արմատապես աճել է նրա մահվանից անցած տասնամյակների ընթացքում: 19-րդ դարում նրա ստեղծագործությունները բացահայտել, հավաքել և տարածել են այնպիսի երգահաններ, ինչպիսիք են Ֆերենց Լիստը, Ռոբերտ Շումանը և Ֆելիքս Մենդելսոնը: Շուբերտն այսօր համարվում է Արևմուտքի դասական լավագույն երգահաններից մեկը: