Ֆորեսթ Գամփ

Ֆորեսթ Գամփ Forrest Gump
Ժանր	դրամա, մելոդրամա
Երկիր	ԱՄՆ
Թվական	1994
Լեզու	անգլերեն
Ռեժիսոր	Ռոբերտ Զեմեկիս
Պրոդյուսեր	Վենդի Ֆիներման Սթիվ Տիշ Սթիվ Ստարկի
Սցենարիստ(ներ)	Էրիկ Ռոտ, Ուինսթոն Գրում
Դերակատարներ	Թոմ Հենքս Ռոբին Ռայթ Գերի Սինիզ
Օպերատոր	Դոն Բյորջես
Երաժշտություն	Ալան Սիլվեստրի
Ընկերություն	Paramount Pictures
Տևողություն	135 րոպե
Բյուջե	55 միլիոն դոլլար
Շահույթ	677 միլիոն դոլլար
IMDb	ID 0109830
description

«Ֆորեսթ Գամփ» (անգլերեն Forrest Gump), ռեժիսոր Ռոբերտ Զեմեկիսի 1994 թվականին նկարահանված ֆիլմ, գլխավոր դերում հանդես է գալիս Թոմ Հենքսը:

Ֆիլմի հիմքում Ուինսթոն Գրումի համանուն վեպն է, որը լույս է տեսել 1986 թվականին:

Սյուժեն

Ֆիլմի գլխավոր հերոսը Ֆորեսթ Գամփն է (անգլ. forest gump, որ թարգմանաբար նշանակում է «անտառի հիմարիկ»), ով ապրում է Ալաբամա նահանգում, հորինված Գրինբոու անվանումով մի փոքրիկ քաղաքում: Ֆիլմը սկսվում է մի տեսարանով, որտեղ Ֆորեսթը նստած է կանգառի նստարանին և պատմում է իր կյանքի պատմությունը տարբեր մարդկանց, ովքեր այդ պահին նստած են իր կողքին:

Նա պատմում է, որ ծնվել է Գրինբոու քաղաքում: Ունի ողնաշարի հետ կապված պրոբլեմներ և չի կարողանում քայլել առանց ոտքերին ամրացված երկաթյա հենակների: Դրանից բացի նրա ինտելեկտի գործակիցը (IQ) 75 է և դպրոցի տնօրենը չի ցանկանում նրան ընդունել դպրոց (մայրը համաձայնվում է սեռական կապի մեջ մտնել տնօրենի հետ, որից հետո միայն Ֆորեսթը ընդունվում է դպրոց):

Դպրոցում նա ծանոթանում է մի աղջկա` Ջեննի Կարրենի հետ և նա դառնում է նրա միակ ընկերը: Նրանք հաճախ են իրար հետ զբոսնում Ջեննի դաժան հոր կալվածքներում, որտեղ եգիպտացորենի արտում նրանք երբեմն-երբեմն աղոթում են, որ Ջեննի հայրը այլևս չծեծի ու բռնության չենթարկի Ջեննին:

Ֆորեսթի ոտքերի հենակները պատահաբար ընկնում են այն ժամանակ, երբ նա փախչում է իրեն հետապնդող խուլիգաններից: Ֆորեսթը պատմում է իր կյանքի մասին, և պարզվում է որ նա իր կյանքի ընթացքում.

• զբաղվում է սպորտով
• սկզբում որպես ֆուտբոլիստ իր արագությամբ հասնում է մեծ հաջողությունների, դասվում երկրի լավագույն մարզիկների շարքը
• այնուհետև սկսում է սեղանի թենիս խաղալ և նույնպես ունենում է ապշեցուցիչ հաջողություններ
• մասնակցում է Վիետնամական պատերազմին, որտեղ շրջափակման ժամանակ ցանկանալով փրկել իր սևամորթ ընկեր Բաբբային, նա փրկում է իր դասակի վիրավոր մարտիկներին (որոնց թվում նաև իր հրամանատար լեյտենանտ Դենին, ով վիրաբուժությունից հետո մնում է առանց ոտքերի) և ԱՄՆ-ի նախագահի կողմից պարգևատրվում է բարձրագույն շքանշանով
• իր զոհված ընկեր Բաբբայի խորհրդով զբաղվում է ծովային ուտելի կենդանիների ձկնորսությամբ և ստանում մեծ շահույթ
• պատահաբար ներդնում է կատարում մի ընկերությունում, որը հետագայում դառնում է աշխարհի խոշորագույն ընկերություններից մեկը և նա հարստանում է որպես բիզնեսմեն

Ֆորեսթի մայրը մահանում է քաղցկեղից, որից հետո նա սկսվում է զբաղվել մի այլ գործով` իր մեքենայով անվճար հնձում է կանաչապատ տարածքները: Մի անգամ նրան պատահաբար այցի է գալիս իր դպրոցական ընկերուհի Ջեննին (ում նա վերջին անգամ տեսել էր գիշերային ակումբներից մեկում մերկ պարուհի աշխատելիս), Ֆորեսթը նրան ամուսնության առաջարկություն է անում իսկ Ջեննին հրաժարվում է: Սակայն նրանք մի գիշեր իրար հետ են անցկացնում, իսկ առավոտյան Ջեննին հեռանում է, նրան նվիրելով մեկ զույգ սպորտային կոշիկ: Այդ դեպքից հետո Ֆորեսթը սկսում է վազել (Ջեննի նվիրած մարզակոշիկներով): Նա սկսում է վազել ամբողջ երկրով մեկ, հատելով երկրի սահմանը մի քանի անգամ: Դրանով նա արժանանում է ողջ երկրի հետաքրքրությանը, շատ լրագրողներ ու հասարակական ընկերություններ հետաքրքրվում են թե ինչու՞ է նա վազում, հանուն ինչի կամ ինչ գաղափարի, սակայն նա պատասխանում է, որ ուղղակի ցանկանում է վազել և վազում է: Վազելու ընթացքում նա շատ հետևորդներ է ունենում, ովքեր նույնպես վազում են նրա հետ, և մի օր, ինչպես Ֆորեսթն է պատմում անսպասելիորեն նա դադարում է վազելուց, նույնքան անսպասելի, ինչպես սկսել էր վազել:

Դրանով նրա պատմությունը նստարանին նստած ավարտվում է: Իր վերջին ունկնդրին նա պատմում է, որ Ջեննին տեսել էր իրեն հեռուստացույցով վազելիս, իմացել իր տեղը և նամակ գրել: Ֆորեսթը գտնում է Ջեննին և պարզվում է, որ նա երեխա է ունեցել Ֆորեսթից, ում նույնպես անվանել է Ֆորեսթ ի պատիվ հոր` Ֆորեսթ Գամփի: Ջեննին պատմում է, որ ինքը վարակված է մի համաճարակով, որի դեմ դեղամիջոց չկա և նա պետք է մահանա: Չնայած դրան նրանք ամուսնանում են: Ամուսնությանը ներկա է գտնվում նաև լեյտենանտ Դենը, ով արդեն քայլում է տեղադրված երկաթյա հատուկ «ոտքերի» օգնությամբ: Դենը նույնպես ամուսնանում է: Որոշ ժամանակ անց Ջեննին մահանում է:

Ֆիլմը միաժամանակ նաև ԱՄՆ-ի պատմության յուրօրինակ ժամանակագրություն է, որտեղ միաժամանակ նկարագրվում են ԱՄՆ-ի պատմության տարբեր դեպքեր: Ֆիլմում կան կադրեր կապված Էլվիս Փրեսլիի, Ջոն Լենոնի, ԱՄՆ-ի տվյալ ժամանակի նախագահներ Ռիչարդ Նիքսոնի և Ջոն Քենեդիի հետ:

Ֆիլմի մասին

Ֆիլմը ցույց է տալիս մեզ շրջապատող աշխարհը թերզարգացած Ֆորեսթ Գամփի տեսանկյունից, ով իրերին այլ կերպ է նայում և ունի իր ուրույն ու միաժամանակ շատ հետաքրքիր աշխարհընկալումը: Ֆորեսթը միամիտ է, արդար, ֆիզիկապես ուժեղ ու բարի:

Դերերում

• Թոմ Հենքս - Ֆորեսթ Գամփ
• Ռոբին Ռայթ - Ջեննի
• Գերի Սինիզ - լեյտենանտ Դեն
• Սալլի Ֆիլդ - միսսիս Գամփ, Ֆորեսթի մայրը
• Մայքելթի Ուիլյամսոն - Բաբբա
• Հեյլի Ջոել Օսմենթ - Ֆորեսթ Գամփի որդին

Մրցանակներ և փաստեր

Ֆիլմը 1994 թվականի ամենաշահութաբեր ֆիլմն է աշխարհում:

Արժանացել է մոտ 32 կինոմրցանակի ամբողջ աշխարհում, այդ թվում ստացել է նաև 6 Օսկար հետևալ անվանակարգերում`

1. լավագույն ֆիլմ
2. լավագույն ռեժիսոր
3. լավագույն դերասան (Թոմ Հենքս)
4. լավագույն սցենար (Էրիկ Ռոթ)
5. լավագույն մոնտաժ (Արթուր Շմիդտ)
6. լավագույն հատուկ էֆֆեկտներ (Կեն Ռալստոն, Ջորջ Մերֆի, Ստեֆան Ռոզենբաում, Ալլեն Հոլլ)

3 Ոսկե Գլոբուս`

1. Ոսկե Գլոբուս լավագույն ռեժիսորի համար
2. Ոսկե Գլոբուս լավագույն ֆիլմի համար (դրամա)
3. Ոսկե Գլոբուս լավագույն դերասանի համար (դրամա) անվանակարգերում:

• Ամերիկյան բոլոր ժամանակների 100 լավագույն ֆիլմերի ցանկում 76-րդն է:
• 250 լավագույն ֆիլմեր (ըստ IMDb վարկածի)ի ցանկում 30-րդն է (2011 թվականի օգոստոսի 4-ի դրությամբ):
• Ամերիկյան բոլոր ժամանակների 100 լավագույն ոգեշնչող ֆիլմերի ցանկում 37-րդն է:
• Ամերիկյան բոլոր ժամանակների ֆիլմերի 100 լավագույն խոսքերի ցանկում Ֆորեսթ Գամփի «Իմ մայրը միշտ ասում էր, - Կյանքը նման է շոկոլադե կոնֆետների տուփի. երբեք չես իմանա, թե ինչ քաղցրավենիք քեզ բաժին կհասնի այնտեղից» խոսքը 40-րդն է: