Լոուրենս Օլիվիե

Լոուրենս Օլիվիե
անգլիացի կինոյի և թատրոնի դերասան, ռեժիսոր, պրոդյուսեր
Բնագիր ԱԱՀ՝	Laurence Kerr Olivier
Ծննդյան օր՝	22 մայիս, 1907
Ծննդավայր՝	Դորկինգ, Սուրրեյ, Մեծ Բրիտանիա
Վախճանի օր՝	11 հուլիս, 1989
Վախճանի վայր՝	Սթայնինգ, Արևմտյան Սուսսեքս, Մեծ Բրիտանիա
Ամուսին՝	Ջիլլի Էսմոնդ (1930-1940) Վիվիեն Լի (1940-1960) Ջոան Պլաուռայթ (1961 մինչև կյանքի վերջ)
Պարգևներ և մրցանակներ՝	4 Օսկար, 5 Էմմի (մրցանակ), 3 Ոսկե Գլոբուս
Երեխաներ՝	2 տղա, 2 աղջիկ
Կայք՝	IMDb-ում Լոուրենս Օլիվիեի էջ

Լոուրենս Քերր Օլիվյե, բարոն Օլիվյե (անգլերեն՝ Laurence Kerr Olivier, Baron Olivier [ˈlɒrəns ɵˈlɪvi.eɪ], մայիսի 22, 1907 — հուլիսի 11, 1989) — բրիտանացի թատրոնի և կինոյի հայտնի դերասան, ռեժիսոր և պրոդյուսեր: Համարվում է բոլոր ժամանակների և ժողովուրդների մեծագույն դերասաններից մեկը, հատկապես փայլել է Շեքսպիրյան տարբեր երկերի լավագույն դերակատարումներով: Հանդես է եկել անտիկ դրամատուրգիական բեմադրություններում և ամերիկյան ու բրիտանական պիեսների ժամանակակից բեմականացումների մեջ:

Կենսագրություն

Ծնվել է 1907 թվականի մայիսի 22-ին Անգլիայի Սուրրեյ կոմսության Դորկինգ քաղաքում, գյուղական հոգևորական Ջերարդ Օլիվյեի ընտանիքում: Հատկապես ուժեղ կապվածություն է ունեցել վաղամեռիկ մոր Ագնեսա Լուիսի հետ, ով մահացել է 43 տարեկան հասակում երբ Օլիվյեն ընդամենը 12 տարեկան էր, և նա շատ ծանր է տարել մոր անսպասելի վախճանը: Ավարտել է Օքսֆորդի Ս. Էդվարդի դպրոցը: 3 անգամ ամուսնացած է եղել: Առաջին կնոջ անունը Ջիլլ Էսմոնդ էր, ում հետ ապրել է 1930-1940 թթ.: Այնուհետև ամուսնացել է հայտնի դերասանուհի Վիվիեն Լիի հետ (1940—1960), իսկ 1960 թվականից մինչև իր կյանքի վերջ բրիտանացի դերասանուհի Ջոան Պլաուռայթի հետ:

Կարիերա, մրցանակներ, ֆիլմեր

Դերասանական կարիերան սկսել է 1930 թթ. խաղալով Լոնդոնի Վեստ-էնդ թատրոնում: Իր շուրջ 60 տարվա դերասանական կարիերայի ընթացքում խաղացել է թատրոնի մոտ 135, կինոյում մոտ 65 և 26 հեռուստատեսային դերեր:

Ամերիկյան կինոակադեմիան իր կողմից հրապարակած Ամերիկյան բոլոր ժամանակների ֆիլմերի 100 մեծագույն աստղերի ցանկում նրան ընդգրկել է 14-րդ տեղում:

Ստացել է 36 և ներկայացված է եղել 26 տարբեր մրցանակների, այդ թվում

• 4 Օսկար (ներկայացվել է 13 անգամ, որից 9 անգամ Օսկար լավագույն դերասանի համար անվանակարգում)
• 3 Ոսկե Գլոբուս
• 3 BAFTA
• 5 Էմմի (մրցանակ)

Արժանացել է նաև Վենետիկի կինոփառատոնի Ոսկե Առյուծ և Բեռլինի կինոփառատոնի Արծաթե Արջ մրցանակների: Լոնդոնի թատրոնի մրցանակը 1984 թվականին վերանվանվել է նրա անվամբ: 1960 թվականին ստացել է Հոլիվուդյան Փառքի ծառուղու աստղ: 1970 թվականին Էլիզաբեթ թագուհին նրան շնորհել է բարոնի պատվավոր կոչում:

Առավել նշանավոր ֆիլմերն են`

Լոուրենս Օլիվիեն Համլետի դերում

• «Ամպրոպային անցում» - 1939
• «Ռեբեկկա» - 1940
• «Հպարտություն և նախապաշարմունք» - 1940
• «Լեդի Համիլթոն» - 1941
• «Հենրիխ 5-րդ թագավոր» - 1944
• «Համլետ» - 1948
• «Սպարտակ» - 1960
• «Խարտում» - 1960
• «Ռոմեո և Ջուլիետ» - 1968
• «Նիկոլայը և Ալեքսանդրան» - 1971
• «Մարաթոնի մասնակիցը» - 1976
• «Տղաները Բրազիլիայից» - 1978
• «Ինչհոն» - 1982