Համերգը (հոլ.՝ Het concert), հոլանդացի նկարիչ Յան Վերմեերի մոտավորապես 1664 թվականին ստեղծած նկար, որտեղ պատկերված են նվագող տղամարդ և երկու կին։ Նկարը պատկանում է ԲոստոնիԻզաբելլա Ստյուարտ Գարդների թանգարանին, սակայն 1990 թվականին գողացել են թանգարանից և դեռևս չեն գտել[1]: Ենթադրվում է, որ այն ամենաարժեքավոր գողացված և չբացահայտված կտավն է, որի արժեքը գնահատվել է մոտ 200 միլիոն դոլար[2]:
Նկարում պատկերված են երեք երաժիշտներ. երիտասարդ կանանցից մեկը նստած է կլավեսինի մոտ, տղամարդը լյուտնյա է նվագում, մյուս կինը երգում է: Կլավեսինի դեպի վեր բարձրացող փեղկը զարդարված է Արկադիայի բնատեսարանով, որի վառ գույներին հակադրվում են պատի աջ և ձախ կողմերում կախված նկարները: Հատակին դրված է վիոլա:
Հետևի ֆոնի երկու նկարներից աջ կողմինը Դիք վան Բաբյուրենի «The Procuress» կտավն է, որն առկա է նաև Վերմեերի «Կինը նստած վիրջինալի մոտ» կտավում, որը նկարիչը ստեղծել է «Համերգ» կտավից վեց տարի հետո: Ձախ կողմի նկարը պաստորալ բնապատկեր է: Վերմեերի ժամանակաշրջանում հոլանդական գեղանկարչության մեջ երաժշտության թեման առնչվում էր սիրո և գայթակղության հետ[3]:
Նկարի գտնվելու վայրը երկար տարիներ անհայտ է եղել: 1696 թվականին կտավը վաճառվել է Ամստերդամում, սակայն մինչև 1780 թվականը դեռևս շարունակել է անհայտ մնալ[3]: Փարիզյան աճուրդի ժամանակ 1892 թվականին կտավը 5000 դոլարով ձեռք է բերել Իզաբելլա Ստյուարտ Գարդները[4], և 1903 թվականից կտավը ցուցադրվել է Իզաբելլա Ստյուարտ Գարդների թանգարանում: 1990 թվականի մարտի 18-ին ոստիկանների հագուստով ծպտված գողերը թանգարանից գողացել են 13 աշխատանքներ, այդ թվում նաև «Համերգը» կտավը, որը մինչև այժմ չի գտնվել[5]:
