Հայաստանի երաժշտական ընկերություն

Հայաստանի երաժշտական ընկերություն
Տեսակ	կազմակերպություն
Երկիր	Հայաստան
Հիմնադրված	1958

ԽՍՀՄ ժողովրդական արտիստ Թաթուլ Ալթունյանի հուշատախտակը Հայաստանի երաժշտական ընկերության պատին, քանդակագործ՝ Արա Հարությունյան, բրոնզ, 70х140

Հայաստանի երաժշտական ընկերություն, երաժշտական ընկերություն Երևանում, հիմնադրվել է 1958 թվականին։ Միավորում է հանրապետության երգչախմբային արվեստի գործիչներին (կոմպոզիտորներ, խմբավարներ, երգիչներ) և ինքնագործ ու մասնագիտական երգչախմբերի անդամներին։

Հիմնվել է 1958 թվականին։ Բարձրագույն ղեկավար մարմինը համագումարն է (առաջինը՝ 1962 թվականին), գործադիրը՝ վարչության նախագահությունը։ Նպաստում է սովետահայ խմբերգային արվեստի մասսայականացմանը, երգչախմբերի կազմակերպմանն ու կատարելագործմանը, դպրոցներում երգեցողության դասավանդման բարելավմանը, կազմակերպում երգի տոներ, ստեղծագործական և կատարողական մրցույթներ և այլն։ Միավորում է 7 պրոֆեսիոնալ, 64 ինքնագործ և 300 մանկական երգչախումբ։

Բաժանմունքներ ունի Լենինականում, Կիրովականում, էջմիածնում, Դիլիջանում և այլ վայրերում։ Ընկերությանը կից գործում են մանկական, երգչախումբ, երաժշտական ստուդիա և հայ խմբերգային արվեստի տունը Երևանում։ 1986 թվականին ուներ 12․300 անդամ։

Պատմություն

Կազմակերպվել է Երևանում, 1987 թվականին՝ Հայաստանի երգչախմբային ընկերության հիման վրա, որը հիմնադրվել էր 1958 թվականին և միավորում էր հանրապետության երգչախմբային արվեստի գործիչներին, օժանդակում երգչախմբերի ստեղծմանն ու կատարելագործմանը, խմբերգային գրականության բազմացմանը, սեմինարների, երգի տոների, մրցույթների անցկացմանը։ 1996 թվականից Երգչախմբային ընկերությունը վերանվանվել է երաժշտականի։

Նախագահներ, անդամներ

Երգչախմբային ընկերության հիմնադիրներից էին՝

• Թաթուլ Ալթունյան (1958-1974 թթ.՝ նախագահ)
• Էմմա Ծատուրյան (1975-1996 թթ.՝ նախագահ)
• Մարտին Մազմանյան (1958-1977 թթ.՝ փոխնախագահ)
• Դավիթ Ղազարյան (Երևանի Կոմիտասի անվան պետական կոնսերվատորիայի պրոֆեսոր, 1996 թվականից՝ նախագահ)
• Արամ Տեր-Հովհաննիսյան
• Կարո Զաքարյան
• Երվանդ Սահառունի
• Էդուարդ Կզարթմյան
• Հ․ Վերանյան
• Ջեյմս Գյոզալյան
• Ռոբերտ Աթայան
• Հովհաննես Չեքիջյան
• Նուպար Սնկրյան
• Լ․ Զեյթաղյան
• Է․ Էլբակյան
• Գ․ Տեր-Աբրահամյան (փոխնախագահ)
• Էդուարդ Միրզոյան
• Գևորգ Արմենյան
• Ռ․ Դավթյան
• Օ․ Սիրունյան
• Լ․ Բարսեղյան
• Արզաս Ոսկանյան
• Սվետլանա Նավասարդյան

Գործունեություն

Բաժանմունքներ է ունեցել Գյումրիում, Վանաձորում, Դիլիջանում, Կապանում, Արմավիրում, Վաղարշապատում, Արտաշատում, Եղեգնաձորում, ինչպես և մեթոդիստներ՝ հանրապետության այլ քաղաքներում ու գյուղերում։ Ընդգրկել է 68 ինքնագործ, 7 պրոֆեսիոնալ (այդ թվում՝ Արամ Տեր-Հովհաննիսյանի անվան երգչախումբը) և բազմաթիվ մանկական երգչախմբեր։ Երևանում և բաժանմունքներում ընկերությանը կից գործում են մանկական երգչախումբ-ստուդիաներ, Երևանում՝ Խմբերգային արվեստի տունը։ Հայաստանի երաժշտական ընկերությունը ընդլայնել է երգչախմբային ընկերության գործունեությունը՝ միավորելով հանրապետության երաժշտական մշակույթի գործիչներին՝ պրոֆեսիոնալ երաժիշտների, մանկավարժների, գեղարվեստական ինքնագործունեության մասնակիցների։ Այն նպաստում է երաժշտալուսավորչական աշխատանքների կազմակերպմանը և դրա մեթոդների կատարելագործմանը, ժողովրդական լայն զանգվածների գեղագիտական դաստիարակմանը։ Հայաստանի երաժշտական ընկերության 7 բաժանմունքների գործունեությանը հասարակական կարգով ընդգրկված են հանրապետության պրոֆեսիոնալ երաժիշտները։

Հասցե

Հայաստանի երաժշտական ընկերությունը գտնվում է Երևանի կենտրոնում՝ Սայաթ-Նովա փողոցի 15 հասցեում։

Պատկերասրահ

• 
  Հայաստանի երաժշտական ընկերություն
• 
  «Հայ ժողովրդական երգի տոն, ծաղկի տոն», Հայաստանի երաժշտական ընկերության ճեմասրահ, որմնանկար՝ նվիրված արևմտահայության հիշատակին, 1984-1987 թթ., տեմպերա, 330 x 1350 սմ, նկարիչ՝ Հենրիկ Սիրավյան
• 
  Հայաստանի երաժշտական ընկերություն, na[as8ah

Ծանոթագրություններ

Այս հոդվածի նախնական տարբերակը կամ նրա մասը վերցված է Հայկական համառոտ հանրագիտարանից, որի նյութերը թողարկված են՝ Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 6, էջ 138)։