Պանամայի ջրանցք
Պանամայի ջրանցք, Խաղաղ օվկիանոսը Ատլանտյան օվկիանոսին միացնող նավարկելի ջրանցք: Տեղակայված է Պանամայի պարանոցի վրա, Պանամա պետության տարածքում: Երկարությունը` 81,6 կմ է, այդ թվում 65,2 կմ ցամաքով և 16,4 կմ Պանամայի և Լիոնի ծովախորշերի միջով (նավարկելի խորը ջրեր մտնելու համար):
Պանամայի ջրանցքի կառուցումը դարձավ մարդկության կողմից իրականացրած մեծագույն և բարդագույն նախագծերից մեկը: Պանամայի ջրանցքը անգնահատելի ազդեցություն ունեցավ Արևմտյան կիսագնդում և ամբողջ Երկրագնդում նավագնացության և ընդհանրապես տնտեսության զարգացման վրա, ինչը կանխորոշել է նրա չափազանց բարձր աշխարհաքաղաքական նշանակությունը: Շնորհիվ Պանամայի ջրանցքի Նյու-Յորքից մինչև Սան-Ֆրանցիսկո ծովային ճանապարհը կրճատվել է 22,5 հազ կմ-ից մինչև 9,5 հազ կմ:
Ջրանցքը անցանելի է տարբեր տիպերի նավերի համար` մասնավոր զբոսանավերից մինչև մեծ լցանավեր և բեռնարկղատարեր: Պանամայի ջրանցքով անցնող նավի առավելագույն չափսը դարձել է ստանդարտ նավաշինության մեջ` ստանալով Panamax անունը:
Ջրանցքով նավի անցման միջին ժամանակը 9 ժամ է, նվազագույնը` 4 ժամ 10 րոպե: Առավելագույն տարողունակությունը օրեկան 48 նավ է: Տարեկան ջրանցքով անցնում է շուրջ 17,5 հազ նավ, որոնք կրում են ավելի քան 203 մլն տոննա բեռ: 2002 թվականի դրությամբ ջրանցքի ծառայություններից օգտվել է ավելի քան 800 հազ նավ:
