Ցրոնքցի Մուրադ (Պետրոսյան, 1884, Ցրոնք, Մուշի գավառ - 1927, Բեյրութ), հայ ազգային-ազատագրական պայքարի մարտիկ։ ՀՀԴ կուսակցության անդամ։ Սկզբնական կրթությունն ստացել է ծննդավայրում, սովորել Մուշի Կեդրոնական վարժարանում։ Վաղ հասակից մասնակցել է թուրքական և քրդական հրոսակներից հայրենի գյուղի պաշտպանությանը, 1901 թվականին՝ Աոաքելոց վանքի կռվին, 1904 թվականին՝ Սասունի ապստամբությանը, որը ճնշելուց հետո թուրքական իշխանությունները Ցրոնքցի Մուրադին բանտարկել են։ 1908 թվականին երիտթուրքական հեղաշրջումից հետո ազատվել է և մեկնել Ամերիկա։
1914 թվականին՝ Առաջին համաշխարհային պատերազմն սկսվելուն պես, խմբով (280 հոգի) ժամանել է Կովկաս, մտել Քեռու կամավորական գունդը և իբրև վաշտի հրամանատար մասնակցել բազմաթիվ մարտերի։ 1918 թվականին դարձել է Արամ Մանուկյանի թիկնապահը։ Հայաստանում 1921 թվականին հակախորհրդային Փետրվարյան ապստամբության ժամանակ վիրավորվել է, այնուհետև անցել է Պարսկաստան, ապա՝ Հալեպ ու Բեյրութ։
Այս հոդվածի կամ նրա բաժնի որոշակի հատվածի սկզբանական տարբերակը վերցված է«Հայկական հարց» հանրագիտարանից, որի նյութերը թողարկված են Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։
Թուրքիա
