Վրաստանի դրոշ

Վրաստանի դրոշը

Վրացական հանրապետության դրոշը զինանշանի և օրհներգի հետ միասին համարվում է Վրաստանի պետական խորհրդանիշներից մեկը: Ներկայիս դրոշը ընդունվել է 2004 թ.-ին: Մինչ խորհրդարանի հաստատումը որպես պետական դրոշ, այն օգտագործվում էր Միխայիլ Սահակաշվիլու Ազգային շարժման կողմից: Կազմված է 1 մեծ և 4 փոքր խաչերից: Մեծ խաչը խորհրդանշում է Աստծուն, իսկ 4 փոքրերը` ավետարանիչներին: Վրաց հետազոտող Իոսիֆ Բիչիկաշվիլին նշում է, որ հինգ խաչերի պատկերներ Վրաստանի տարածքում հայտնաբերվել են Նեկրեսի եկեղեցու ավերակներում (VI դարից ոչ ուշ), Բոչորմայի (X-XI դդ.) և Չխարիի (XIII-XIV դդ.) սբ. Գեորգի եկեղեցիների ճակատին, Դմանիսի եկեղեցում (XIV-XV դդ.) և այլն: