Սեռական դաստիարակություն (հեռուստասերիալ, 2019)

Վիքիպեդիայից՝ ազատ հանրագիտարանից
Սեռական դաստիարակություն
(անգլ.՝ Sex Education)
Изображение логотипа
Ժանր
ՍտեղծողԼորի Նան
Երկիր{{{2}}} Մեծ Բրիտանիա
ԼեզուԱնգլերեն
Գլխավոր
դերերում
ՊրոդյուսերՋոն Ջենինգս
Գործադիր պրոդյուսեր
  • Ջեյմի Քեմփբել
  • Բեն Թեյլոր
Օպերատոր
  • Ջեյմի Քեյրնի
  • Օլի Ռասել
Երաժշտություն
  • Թոլգա Քահրաման
  • Մեթ Բիֆա
  • Սիարա Էլվիս
  • Ռուբի Ուոսմեթ
  • Ֆիոնա Քրույքշենք
  • Սեմ Թոմփսոն
Մոնտաժ
  • Սթիվ Աքրոյդ
  • Դևիդ Ուեբ
  • Քալում Ռոս
Նկարահանման վայրԱնգլիա, Ուելս, Wye Valley? և Otis' house?
Եթերաշրջանների քանակ4
Սերիաների քանակ32
Սերիաների ցանկՍերիաների ցանկ
Էկրաններին էՀունվարի 11, 2019 (2019-01-11)-ից այժմ (այժմ)
ՀեռուստաալիքՆեթֆլիքս
ԸնկերությունEleven Film
ԴիստրիբյուտորՆեթֆլիքս
Պատկերի ձևաչափ4K (UHDTV)
Պաշտոնական կայքէջ

«Սեռական դաստիարակություն» (անգլ.՝ Sex Education), բրիտանական կատակերգական դրամա հեռուստասերիալ, որը պատմում է անգլիական Մուրդեյլ քաղաքի միջնակարգ դպրոցի աշակերտների և նրանց խնդիրների մասին։ Սերիալի առաջին եթերաշրջանը, որը բաղկացած է 8 սերիայից, թողարկվել է Նեթֆլիքսի կողմից 2019 թվականի հունվարի 11-ին։ Առաջին եթերաշրջանը Rotten Tomatoes կայքի օգտատերերի կողմից բարձր գնահատականների է արժանացել։ Սերիալում լուսաբանվում են այնպիսի թեմաներ, ինչպիսիք են սեռական ինքնությունը, հիպերսեռականությունը, ակամա ինքնազսպումը, ձեռնաշարժությունը, սիրային ամաչկոտությունը, դեռահասային սեռականությունը, դեռահասային հղիությունը, ռիսկային սեռական վարքագիծը[1][2]։

2019 թվականի փետրվարի 2-ին Նեթֆլիքս սթրիմինգային ծառայությունը պաշտոնապես երկարաձգել է սերիալը մինչև երկրորդ եթերաշրջան[3]։ 2020 թվականի փետրվարի 10-ին հայտարարվել է, որ թողարկվելու է նաև երրորդ եթերաշրջանը[4]։

Սյուժե[խմբագրել | խմբագրել կոդը]

Սերիալի գործողությունը տեղի է ունենում Մուրդեյլ փոքրիկ քաղաքի միջնակարգ դպրոցում։ Սյուժեի հիմքում ընկած են այն իրավիճակները, որոնցում հայտնվում են գլխավոր հերոսի՝ Օթիս Միլբերնի համադասարանցիները։ Օթիսն ապրում է իր մոր՝ Ջին Միլբերնի հետ, որը սեքսոլոգիայի և հարաբերությունների հոգեբանության հայտնի մասնագետ է։ Ուսումնական տարվա առաջին իսկ օրերին Օթիսը ստիպված է օգնել դպրոցական խուլիգանին սեռական խնդիրների հարցում` իր ընկերոջը հանգիստ թողնելու խոստման դիմաց։ Մեյվ Ուալիի համար ակնհայտ է դառնում Օթիսի՝ դեռահասների անձնական խնդիրները լուծելու բացահայտ տաղանդը, ինչի պատճառով էլ նա առաջարկում է վերջինիս խորհուրդներ տալ դասընկերներին փողի դիմաց։ Մեյվի հետ մտերմանալու ցանկությունը դրդում է Օթիսին համաձայնվել և բիզնես սկսել նոր ընկերուհու հետ։

Դերասանական կազմ և կերպարներ[խմբագրել | խմբագրել կոդը]

  • Օթիս Միլբերն (Էյսա Բաթերֆիլդ)՝ Մուրդեյլի միջնակարգ դպրոցի աշակերտ, կույս և իր մարմնից ամաչող «ներդ»։ Նրան դաստիարակում է մայրը, որը հայտնի սեքսոլոգ է։ Օթիսն ինքն իրեն համարում է դպրոցական սոցիումի ամենացածր օղակի ներկայացուցիչ, շատ ժամանակ է անցկացնում երաժշտություն լսելով և դասեր անելով։ Լավ տեղեկացված է հարաբերությունների հոգեբանության հիմնական խնդիրների մասին։
  • Ջին Միլբերն (Ջիլիան Անդերսոն)՝ Օթիսի մայր, որն ամուսնալուծվել է Օթիսի հոր հետ, որը նույնպես սեքսոլոգիայի հայտնի մասնագետ է։ Փորձում է որդու հետ նույն ալիքի վրա լինել, ինչը պարբերաբար արտահայտվում է հիպերտրոֆացված հոգատարության օրինակներում։ Ջինն ամուսնալուծությունից հետո մշտական հարաբերությունների կողմնակից չէ։ Նա հայտնի է Մուրդեյլի տղամարդկանց շրջանում։
  • Ռեմի (Ջեյմս Փյուրֆոյ)՝ Օթիսի հայր, որը թողել է ընտանիքը դավաճանության մեջ բռնվելուց հետո։ Ապրում է ԱՄՆ-ում և երբեմն կապ է հաստատում որդու հետ համացանցի միջոցով՝ գրեթե մասնակցություն չունենալով նրա կյանքին։
  • Էրիկ Էֆիոնգ (Շուտի Գաթվա)՝ Օթիսի լավագույն ընկեր, որը նրան ճանաչում է դեռ մանկությունից։ Էրիկը բացահայտ գեյ է, որը դաստիարակվում է կրոնական աֆրիկյան ընտանիքում, որտեղ փորձում են ընդունել նրա սեռական կողմնորոշումը։ Դպրոցում նա այդքան էլ հայտնի չէ։ Դպրոցական նվագախմբում նվագում է գալարափող։
  • Մեյվ Ուալի (Էմմա Մաքի)՝ դպրոցում «վատ աղջկա» հեղինակություն ունի։ Նրա մորը կործանում են թմրամոլությունը և ալկոհոլի հետ խնդիրները։ Մեյվի հայրը լքել է ընտանիքը, երբ նա փոքր էր, եղբայրն էլ հանցագործ է։ Մեյվը հետաքրքրվում է գրականության ու ֆեմինիզմի պատմությամբ, սիրում է փանկ ռոք լսել։ Լինելով սեռականապես ազատ և համարձակ, նա Օթիսի հակապատկերն է։ Դպրոցում ոչ միանշանակ հեղինակություն ունի, ինչը մասամբ պայմանավորված է այն բանով, որ նա դարձել է բուլիինգի (ծաղրանքի) զոհ։ Ապրում է աղքատության մեջ և չափազանց ամաչում է իր կենսակերպից, հաճախ բախվում է գոյատևման համար գումար գտնելու անհրաժեշտության հետ։
  • Ադամ Գրոֆ (Քոնոր Սուինդելս)՝ տնօրենի որդի, դպրոցական խուլիգան և ավարա։ Ապրում և սովորում է իր պահպանողական ընտանիքի հետ առճակատման մեջ։ Ունի բազմաթիվ հոգեբանական խնդիրներ և բարդույթներ։ Անսպասելիորեն Օթիսից հոգեբանական օգնություն ստանալով՝ սկիզբ դրեց գլխավոր հերոսի և Մեյվ Ուայլիի ընկերությանը։
  • Ջեքսոն Մարչեթի (Քիդեր Ուիլյամս Սթիրլինգ)՝ դպրոցի ավագ, տնօրինության կողմից սիրված և մեծ հույսեր ներշնչող մարզիկ։ Ծանոթանում է Մեյվի հետ և փորձում է իրենց հարաբերությունները «սեքս առանց պարտավորությունների» կարգավիճակից վերածել մշտական հարաբերությունների։ Ջեքսոնը դաստիարակվում է նույնասեռ զույգի կողմից՝ նա երկու մայր ունի։
  • Ռուբի (Միմի Կինի)՝ դպրոցի գեղեցկուհիներից մեկը՝ «Անձեռնմխելիների» հավաքույթից, որը փորձում է հավատարիմ մնալ միայն իր շփման շրջանակին։
  • Էյմի Գիբս (Էյմի Լոու Վուդ)՝ Ռուբիի ընկերուհի, որը նույնպես «Անձեռնմխելիների» ակումբի կազմում է։ Գաղտնի շփվում և ընկերանում է Մեյվ Ուայլիի հետ։ Էյմին ունևոր ընտանիքից է, ինչի պատճառով նրա տունը հաճախ օգտագործվում է երեկույթների համար։
  • Անվար (Չանեյլ Քուլար)՝ հնդկական հարուստ ընտանիքից գեյ և մոդայամոլ, «Անձեռնմխելիների» խմբի առաջնորդներից մեկը։
  • Օլիվիա (Սիմոն Էշլի)՝ «Անձեռնմխելիների» ակումբի անդամ, Օթիսի և Մեյվի առաջին հաճախորդ։
  • Լիլի Այգլհարթ (Տանյա Ռեյնոլդս)՝ Օթիսի երազկոտ դասընկերուհի, որը փոքր տարօրինակություններ ունի։ Նա իր ազատ ժամանակը տրամադրում է դեպի այլ մոլորակներ ճամփորդության և իր առաջին սեռական փորձի որոնման մասին էրոտիկ կոմիքսներ ստեղծելուն։ Նա վախենում է մինչև դպրոցն ավարտելը կույս մնալ և առանց ամաչելու առաջարկում է իր դասընկերներին սեքսով զբաղվել։
  • Ջեյքոբ Նյուման (Միքայել Պերսբրանդտ)՝ սանտեխնիկ, որը պարբերաբար այցելում է Միլբերնների տունը վերանորոգման աշխատանքներ անցկացնելու համար։ Օթիսի մոր հանդեպ զգացմունքներ ունի։
  • Օլա Նյուման (Պատրիսիա Էլիսոն)՝ Ջեյքոբի դուստր, որը սիրահարվել է Օթիսին։ Ինչպես և Օթիսը, հարաբերությունների փորձ չունի։

Եթերաշրջաններ[խմբագրել | խմբագրել կոդը]

Եթերաշրջան Սերիաներ Ցուցադրման բնօրինակ տարեթիվ
Եթերաշրջանի պրեմիերա
1 8 2019 թվականի հունվարի 11
2 8 2020 թվականի հունվարի 17

Սերիաներ[խմբագրել | խմբագրել կոդը]

No.TitleDirected byWritten byOriginal release date
1"Առաջին սերիա"Բեն ԹեյլորԼորի ՆանՀունվարի 11, 2019 (2019-01-11)
Օթիս՝ ձեռնաշարժության հետ խնդիներ ունեցող քոլեջի տասնվեցամյա ուսանող, որն ապրում է իր մոր՝ հայտնի սեքսոլոգ Ջինի հետ։ Նրա լավագույն ընկերը՝ Էրիկը, բացահայտ գեյ է։ Նա ասում է, որ իրենց բոլոր դասընկերներն ամառվա ընթացքում սեքսով են զբաղվել։ Ադամը, դպրոցի խուլիգանը և տնօրենի որդին, չի կարողանում սեքսի ժամանակ օրգազմ զգալ իր ընկերուհու՝ Էյմիի հետ։ Էյմին կիսվում է այս խնդիրով իր ընկերուհու՝ Մեյվի հետ։ Ադամը և Օթիսը համատեղ հանձնարարություն են ստանում և՝ գալով Օթիսի տուն, Ադամն իմանում է, որ Օթիսի մայրը սեքսոլոգ է, չնայած դա թաքցնելու Օթիսի փորձերին։ Հաջորդ առավոտ նա պատմում է բոլորին այդ բանի մասին՝ ստիպելով շփոթված Օթիսին փախչել, բայց Մեյվը հետևում է նրան։ Ավելի ուշ նրանք գտնում են Ադամին լքված դպրոցական զուգարանում։ Ադամը տառապում էր երեք վիագրա հաբերի ընդունման հետևանքներից։ Նա պատմում է, թե ինչ է պատահել, և Օթիսը խորհուրդ է տալիս նրան ընդունել իրեն։ Հաջորդ օրը Ադամը մերկանում է ամբողջ դպրոցի առջև՝ «ինքն իրեն ընդունելու» համար։ Նա կարողանում է օրգազմի հասնել Էյմիի հետ։ Դրանից հետո Էյմին թողնում է նրան, քանի որ իր արարքից հետո նա ամաչում էր։ Մեյվն առաջարկում է Օթիսին դպրոցում կազմակերպել սեքս թերապիայի կլինիկա, որտեղ նա պատասխանատու կլինի կազմակերպության համար, իսկ Օթիսը՝ խորհրդատվության։
2"Երկրորդ սերիա"Բեն ԹեյլորԼորի ՆանՀունվարի 11, 2019 (2019-01-11)
Էյմին իր տանը հավաքույթ է կազմակերպում, որտեղ Օթիսը և Մեյվը փորձում են հաճախորդներ գտնել՝ անվճար խորհուրդներ տալով (ինչպես առաջարկել էր Էրիկը)։ Էրիկը փորձում է սովորեցնել աղջիկներին ճիշտ մինետ անել, բայց նրանցից մեկի մոտ փսխողական ռեֆլեքս է առաջանում, ինչն աղետի է հանգեցնում։ Օթիսը պատահաբար փակվում է լոգարանում մի զույգի հետ միասին, որոնք սեռական փորձ կատարելիս վնասել են միմյանց և նրանց համար թերապիայի սեանս է կազմակերպում։ Ադամը ներխուժում է երեկույթ, որտեղ տեսնում է Էյմիին, որը խոսում էր մեկ այլ տղայի հետ։ Նա այդ տղայի գլխի վրա ջարդում է Էյմիի տատիկի աճյունով աճյունակալը։ Ջինը փորձում է ընդհանուր լեզու գտնել որդու հետ, որը, նրա կարծիքով, հեռանում է իրենից, Իսկ Օթիսը նեղանում է՝ մոր պահվածքը համարելով կպչուն։ Մեյվը բացահայտում է, որ հղի է, և Ջեքսոնի հետ սեքսով է զբաղվում այդ մտքերից շեղվելու համար։ Սակայն Ջեքսոնը լուրջ հարաբերություններ է ցանկանում։ Հիասթափված իր դիրքից, Մեյվը ասում է Օթիսին, որ սեռական թերապիան վատ գաղափար է, որից արժե հրաժարվել։ Հաջորդ օրը միանգամից մի քանի աշակերտներ խորհուրդ են ուզում Օթիսից և անգամ պատրաստ են լինում վճարել։ Նա հայտնում է Մեյվին, որ մտադիր է շարունակել ծրագիրը։
3"Երրորդ սերիա"Բեն ԹեյլորՍոֆի ԳուդհարթՀունվարի 11, 2019 (2019-01-11)
Օթիսը երազում տեսնում է Մեյվին, և նրա մոտ էյակուլյացիա է պատահում, որը նա անհաջող կերպով փորձում է թաքցնել Ջինից։ Մեյվը պատրաստվում է աբորտ անել, բայց կլինիկայի քաղաքականությունը պահանջում է, որ ինչ-որ մեկը վերցնի նրան վիրահատությունից հետո։ Նա խնդրում է Օթիսին, ինչին նա համաձայնում է, մտածելով, որ Մեյվը նրան ժամադրության է հրավիրում։ Էրիկը լսումներ է անցնում քոլեջի երաժշտական խմբում, և կլարնետահարուհի Լիլին նրան օգնություն է առաջարկում նյութի յուրացման հարցում։ Էրիկի տանը հայտնվելով, նա փորձում է սեռական հարաբերությունների մեջ մտնել նրա հետ, սակայն հետո նրանք զվարճանում են կոսմետիկայով և գեյ պոռնոգրաֆիա դիտում, երբ Էրիկն ասում է, որ գեյ է։ Միսս Սենդսը՝ անգլերենի դասախոսը, Մեյվին կասկածում է գրագողության մեջ և կոչ է անում ավելի ճիշտ օգտագործել իր տաղանդը։ Օթիսը գալիս է ժամանակից շուտ, նրան վռնդում են, և նա կլինիկայի պատերի մոտ աբորտների դեմ բողոքող զույգին խորհուրդներ է տալիս հարաբերությունների վերաբերյալ։ Ջեքսոնը հաղթում է լողի մրցումներում, սակայն տխրում է՝ իմանալով, որ Մեյվը տրիբունայում չի եղել։ Աբորտից հետո Օթիսը Մեյվին ուղեկցում է տուն, ինչից հետո գրկում է նրան։
4"Չորրորդ սերիա"Բեն ԹեյլորԼորա Նիլ և Լորի ՆանՀունվարի 11, 2019 (2019-01-11)
Օթիսը և Մեյվը շարունակում են իրար հաղորդագրություններ ուղարկել, իսկ Ջեքսոնը փորձում է խնդրել Մեյվին դառնալ նրա ընկերուհին։ Նա խորհուրդ է խնդրում Օթիսից և դրա փոխարեն կանխավճար է վճարում։ Փորձելով վերադարձնել գումարը, Օթիսը ակամայից խորհուրդներ է տալիս Մեյվի հետաքրքրությունների մասին, և Ջեքսոնն օգտվում է այդ տեղեկություններից։ Ջինը համակրանք է զգում Ջեյքոբի հանդեպ, որը եկել էր իր լոգարանը վերանորոգելու համար։ Երբ Օթիսը լեսբուհիների պոռնոգրաֆիա է նայում՝ ուսումնասիրելով իր լեսբուհի հաճախորդների խնդիրները, Օլան՝ Ջեյքոբի դուստրը, հանկարծ սենյակ է մտնում։ Էրիկը շների զբոսարարի աշխատանք է ստանում և պատահաբար ստիպում է Ադամի շանը փախչել այգուց, ինչի պատճառով Ադամը խնդիրներ է ունենում իր հոր հետ։ Լիլին առաջարկում է Օթիսին սեքսով զբաղվել, քանի որ նրանք երկուսն էլ կույս են, բայց վերջինս հրաժարվում է։ Օթիսն իր հաճախորդների հետ սեանս է անցկացնում, բայց ապարդյուն։ Դրանից հետո նրանք զվարճալի ծեծկռտուք են կազմակերպում Մեյվի հետ լողավազանում, և Օթիսի մոտ էրեկցիա է պատահում, որը նա թաքցնում է։ Ջեքսոնը կրկին հարցնում է Մեյվի հետաքրքրությունների մասին, Օթիսն առաջարկում է ինչ-որ մեծ ժեստ կատարել՝ հույս ունենալով, որ Մեյվը կմերժի։ Բայց դա աշխատում է, և Մեյվը համաձայնում է լինել Ջեքսոնի ընկերուհին։
5"Հինգերորդ սերիա"Բեն ԹեյլորՍոֆի Գուդհարթ և Լորա ՀանթերՀունվարի 11, 2019 (2019-01-11)
Ջեքսոնն իր ծնողների հետ ընթրիքի է հրավիրում Մեյվին, բայց ամեն ինչ սխալ է ընթանում, երբ նրանք սկսում են հարցուփորձ անել նրան ընտանիքի մասին, ինչի պատճառով էլ նա փախչում է սև մուտքով։ Ավելի ուշ, նա ներողություն է խնդրում Ջեքսոնից և պատմում է իր անապահով ընտանիքի մասին, իսկ Ջեքսոնը պատմում է իր հոգեբանական խնդիրների մասին։ Մեյվը և Օթիսը փորձում են պարզել, թե ով է տարածում իրենց հաճախորդներից մեկի անպարկեշտ լուսանկարը։ Էրիկը և Օթիսը պլանավորում են դիտել «Հեդվիգը և չարաբաստիկ թիզը» ֆիլմը։ Նրանք հագնվում են այդ ֆիլմի հերոսների նման, հետևելով Էրիկի ծննդյան օրվա ավանդույթներին։ Տարված լինելով լուսանկարի գաղտնիքի բացահայտմամբ՝ Օթիսը թողնում է Էրիկին։ Էրիկի հեռախոսը և դրամապանակը գողանում են, իսկ տուն գնալու ճանապարհին նրան ծեծի են ենթարկում երկու հոմոֆոբներ։ Նա զանգում է Ջինին, որը նրան տուն է տանում։ Երբ Օթիսը վերադառնում է, Էրիկի հետ լուրջ լեզվակռիվ է տեղի ունենում, ինչի արդյունքում նրանք միմյանցից հեռանում են։
6"Վեցերորդ սերիա"Քեյթ ՀերոնԼորի Նան և Ֆրեդի ՍիբորնՀունվարի 11, 2019 (2019-01-11)
Ֆլեշբեքում փոքրիկ Օթիսը պատահաբար տեսնում է, թե ինչպես է իր հայրը՝ Ռեմին, սեքսով զբաղվում իր հաճախորդի հետ, ինչը հանգեցնում է նրա ծնողների բաժանմանը։ Հետևելով հոր խորհրդին, Օթիսը համաձայնում է ընդունել Լիլիի առաջարկը։ Երբ նրանք փորձում են սեռական հարաբերությունի մեջ մտնել, Օթիսն իրեն աներևակայելի ծանրաշարժ է պահում, ապա խուճապային հարձակում է զգում, քանի որ Լիլիի գործողությունները մանկական հիշողություններ են առաջացնում։ Էրիկն իրեն ավելի մեկուսացված է զգում և փորձում է «նորմալ» հագնվել։ Արդյունքում՝ փորձի ժամանակ նա հարձակվում է դպրոցական խմբի ղեկավարի վրա, իսկ հետո միջանցքում հարվածում է Անվարին, ինչի պատճառով նրան հեռացնում են դպրոցից մինչև տարվա վերջ։ Նրա հայրը փորձում է խոսել նրա հետ, բայց ապարդյուն։ Ադամը հաղթում է շարադրությունների մրցույթում, որի համար նա վճարել է Մեյվին։ Միսս Սենդսը (ինչպես նաև Օթիսը) հասկանում է, որ շարադրությունը գրել է Մեյվը և հայտնում է տնօրեն Գրոֆին, որը նույնպես կասկածում էր։ Օթիսը խորհուրդ է տալիս Էյմիին, որի նոր ընկերը ցանկանում է, որ նա անկողնում նախաձեռնություն ցուցաբերի։ Ջինը դեռ տարված է Ջեյքոբով, այդ պատճառով էլ միտումնավոր իրավիճակ է ստեղծում, որպեսզի նա գա, և նրանք մտերմանում են։ Շոնը՝ Մեյվի եղբայրը, երկար բացակայությունից հետո վերադառնում է։ Նրանց միջև լարվածություն է առաջանում, բայց ավելի ուշ նրանք հաշտվում են։ Օլան և Օթիսը փորձում են հասկանալ իրենց զգացմունքները, սակայն Օլան անում է առաջին քայլը՝ բարդացնելով իրավիճակը։
7"Յոթերորդ սերիա"Քեյթ ՀերոնՍոֆի ԳուդհարթՀունվարի 11, 2019 (2019-01-11)
Մեյվը և Օթիսը չեն ցանկանում գնալ պարերի դպրոցական երեկոյին, սակայն Ջեքսոնը և Օլան ստիպում են նրանց փոխել որոշումը։ Մեյվը փորձում է սաբոտաժի ենթարկել Օլայի և Օթիսի հարաբերությունները, սակայն Օլան անընկալունակ է լինում նրա փորձերին․ ավելի ուշ նա փորձում է խոսել Օթիսի հետ, բայց վերջինս ակամա վիրավորում է նրան, և Օլան հեռանում է։ Ոգեշնչված նորահայտ վստահությամբ՝ Էրիկը գալիս է պարելու, որտեղ հաշտվում է Օթիսի հետ։ Պարային երեկոյի ժամանակ Օթիսի հաճախորդը սպառնում է ցատկել բարձր դեկորացիաներից, սակայն Օթիսի մոտ ստացվում է համոզել նրան՝ խոսք հնչեցնելով անբաժան սիրո մասին, ինչը տպավորություն է թողնում Մեյվի վրա։ Ջեքսոնը խոստովանում է, որ Օթիսին վճարել է Մեյվի վերաբերյալ խորհուրդներ տալու համար՝ վիճաբանություն առաջացնելով նրանց միջև։ Ավելի ուշ, հարբած Ջեքսոնը ընդհարվում է իր մոր հետ և հեռանում տնից։ Նա գալիս է Մեյվի տուն և խոստովանում նրան սիրո մեջ։ Ադամը ֆիզիկական վիճաբանության մեջ է մտնում հոր հետ՝ լարելով նրանց առանց այդ էլ բարդ հարաբերությունները։ Երբ Ջեյքոբն ասում է Ջինին, որ լուրջ հարաբերություններ է ցանկանում, նա հրաժարվում է, որպեսզի չբարդացնի Օլայի և Օթիսի զարգացող հարաբերությունները։ Օթիսը գտնում է Ջինի նոր գրքի սևագիրը, որը նկարագրում է Օթիսի սեռական խանգարումները։
8"Ութերորդ սերիա"Քեյթ ՀերոնԼորի ՆանՀունվարի 11, 2019 (2019-01-11)
Պարոն Գրոֆը գտնում է թմրանյութերը, որոնք Շոնը վաճառում էր պարի ժամանակ, և կարծում է, որ Մեյվը և Օթիսը թմրավաճառություն են կազմակերպել դպրոցում։ Երբ նա սպառնում է ոստիկանություն զանգահարել, Մեյվը պատասխանատվություն է ստանձնում՝ իրեն դպրոցից հեռացման թեկնածու դարձնելով։ Նա պաշտպանվում է հանձնաժողովի առջև, սակայն որոշումը հետաձգվում է։ Ջեքսոնը, որը հիասթափված է Մեյվի այն հայտարարությունից, որ վերջինս չի սիրում նրան, բաց է թողնում մարզումները։ Նա ասում է պարոն Գրոֆին, որ կրկին կներկայացնի դպրոցը, եթե Մեյվին թողնեն, բայց տնօրենը վերջում զրոյացնում է գործարքը։ Էրիկն ու Ադամը հայտնվում են պատժի սենյակում, արդյունքում նրանց ֆիզիկական խառնաշփոթը հանգեցնում է համբույրի և սեքսի, բայց նրանց հարաբերությունները շարունակություն չեն ունենում, քանի որ Ադամին ուղարկում են ռազմական ակադեմիա։ Օթիսը պայքարում է Ջինի կպրունության դեմ, և նրանք որոշում են փոխել իրենց կյանքը։ Ջինը գնում է Ջեյքոբի տուն, իրենց հարաբերություններում վերջակետ դնելու համար, բայց արդյունքում նրանք կրկին սեքսով են զբաղվում։ Օթիսը հաշտվում է Օլայի հետ, և վերջինս համաձայնում է նրան տուն տանել։ Երբ Մեյվը վերադառնում է տուն, նա հայտնաբերում է, որ Շոնը կրկին փախչել է։ Նա նաև գտնում է ներողություններով կարճ նամակը և լավագույն շարադրության համար մրցանակը, որն Օթիսը գողացել է դպրոցից։ Երբ Մեյվը որոշում է պատմել իր զգացմունքների մասին Օթիսին, նա գնում է նրանց տուն, բայց տեսնում է նրան՝ Օլայի հետ համբուրվելիս, և հեռանում է։ Համբույրը հուզում է Օթիսին, և նրա մոտ վերջապես ստացվում է ձեռնաշարժությամբ զբաղվել։

Հեռուստասերիալի արտադրություն[խմբագրել | խմբագրել կոդը]

Հեռուստասերիալի առանձնահատկություններ[խմբագրել | խմբագրել կոդը]

Յուրաքանչյուր նոր պատմություն, որպես կանոն, սկսվում է սեքսի տեսարանից, որը ցույց է տալիս այն խնդիրը, որը պետք է լուծի գլխավոր հերոսը։ Դեռահասների սեռական խնդիրները հասունացման, սեփական անհատականության, բարոյական ընտրության, կյանքի իմաստի որոնման ավելի խորը հարցերի լուսաբանման համար ֆոն են դարձել։ Սերիալի թիմը մեծ ուշադրություն է հատկացրել դպրոցներում բուլիինգի, հոմոֆոբիայի, սերունդների հակամարտության, թմրամիջոցների օգտագործման և ինքնասպանության փորձ կատարելու համար հնարավոր պատճառները լուսաբանելու վրա։ Հատկանշական է, որ ի տարբերություն այլ երիտասարդական սերիալների, «Սեռական դաստիարակությունը» նվազագույն շեշտ է դնում ժամանակակից դարաշրջանի ատրիբուտների վրա՝ փորձելով հանդիսատեսի ուշադրությունը կենտրոնացնել մարդկանց միջև կենդանի հարաբերությունների վրա։

Հեռուստասերիալի երաժշտություն[խմբագրել | խմբագրել կոդը]

Սերիալում մեծ շեշտ է դրվում երաժշտական ուղեկցության ընտրության վրա՝ հերոսների բնավորությունը և անհատականությունը ընդգծելու համար։ Օթիս Միլբերնը պոստ փանկի երկրպագու է, թեև իր խոստովանությամբ քնում է միայն կետերի ճիչերի ձայնագրության ներքո։ Մեյվ Ուայլին սիրում է նոր ալիքի փանկ ռոք լսել։ Նրա ամենասիրելի խմբերից մեկը նորվեգական Sløtface քառյակն է։ Սերիալում հնչում են նաև The Cure, Bikini Kill, Billy Idol, Talking Heads, UB40, The Smiths, A-Ha և Generation X խմբերի երգերը։

Նկարահանումներ[խմբագրել | խմբագրել կոդը]

Սերիալի նկարահանումներն անցկացվել են Հարավային Ուելսի տարածքում և Անգլիայի Ուայ գետի հովտում, այդ թվում՝ Մոնմութշիրի Լլանդոգո և Թինթերն բնակավայրերում։ Տեսարանները, որոնք տեղի էին ունենում Մուրդեյլի միջնակարգ դպրոցում, նկարահանվել են Նյուպորտի Կորլեոնե քաղաքի Հարավային Ուելսի համալսարանի նախկին կամպուսում[5][6][7]։

Քննադատություն[խմբագրել | խմբագրել կոդը]

Առաջին եթերաշրջանը դրական արձագանք է ստացել քննադատների կողմից։ Rotten Tomatoes վեբ կայքում հավանության վարկանիշն 91% է՝ 8,36 միջին գնահատականով։ Այդ գնահատականը հիմնված է 57 գրախոսությունների վրա։

Metacritic կայքը, որն օգտագործում է միջին արժեքը, եթերաշրջանին շնորհել է 100-ից 81 գնահատականը 16 ակնարկների հիման վրա, ինչը «համընդհանուր ճանաչում» է նշանակում[8]։

Դրական ակնարկում Լիզ Շենոն Միլերը IndieWire-ից սերիալին A- է գնահատել[9]։

Լյուիս Նայթը Daily Mirror-ից սերիալը պարգևատրել է 5 աստղով՝ նշելով.

Դա ուրախ, ազնիվ և թարմացնող կատակերգություն է՝ տաղանդավոր դերասանական կազմով և դեռահասների (և նրանց ծնողների) սեռականության մասին անկեղծ խոսակցությամբ[10]։


Նյու Յորք Թայմսի մեկնաբան Ջեյմս Պոնիվոզիկը սերիալը բնութագրել է որպես

Իր ժամանակին, բայց ոչ շատ արդիական, ֆեմինիստական, իր առարկայի նկատմամբ վախի թարմացնող զգացումով։ Այս շոուի մեջ սեքսը խնդիր կամ հետաքրքիր խայծ չէ, այլ առողջության ասպեկտ[11]։


The Washington Post-ից Հենք Սթյուերի խառը գնահատականում նշվում է.

Նեթֆլիքսի սերիալները տիպիկ խնդիր ունեն, երբ եթերաշրջանի կեսին սյուժեն մեկ կամ երկու սերիայով հանդարտվում և դադար է վերցնում, այն ժամանակ, երբ սցենարիստները և պրոդյուսերները պարզում են սերիալի ավարտը։ Սակայն նյութի մեջ զգացվում է մտահղացում և անկեղծ հոգատարություն, և կարևոր միտք այն մասին, որ խնդիրը ոչ միայն մեր «սեռական օրգանների» ձևերի և չափերի մեջ է[12]։


Էդ Փաուերը The Independent-ից քննադատել է սերիալը և դրան 5-ից ընդամենը 2 աստղ է նշանակել՝ գրելով.

Նա ձգտում է գոհացնել բոլորին, բայց շփոթված է, և հենց սերիալին է անհրաժեշտ թերապևտի օգնությունը[13]։


Շուտի Գաթվան, որը կատարել է սևամորթ գեյ դեռահաս Էրիկի դերը, գովեստի խոսքեր է ստացել քննադատների կողմից, որոնք նշել են, որ նրան հաջողվել է իր կերպարում խուսափել գեյի և սևամորթ «լավագույն ընկերոջ» կլիշե կերպարից[14][15][16]։

2019 թվականի հունվարի 17-ին՝ թողարկումից մեկ շաբաթ անց, Նեթֆլիքսը հայտարարել է, որ հեռուստասերիալը դիտվել է ավելի քան 40 միլիոն հանդիսատեսի կողմից[17]։

Ծանոթագրություններ[խմբագրել | խմբագրել կոդը]

  1. "Джиллиан Андерсон идет в секс-терапевты — вышел первый сезон сериала «Половое воспитание»" (in ռուսերեն). moskvichmag.ru. Retrieved 2019 թ․ փետրվարի 27.
  2. "Почему все вокруг говорят про сериал «Половое воспитание»". РБК.Стиль. Retrieved 2019 թ․ փետրվարի 27.
  3. "Сериал Половое Воспитание от Netflix продлили на второй сезон". Роккульт. Retrieved 2019 թ․ փետրվարի 27.
  4. Thorne, Will (2020 թ․ փետրվարի 10). "'Sex Education' Renewed for Season 3 at Netflix". Variety (in անգլերեն).
  5. Williams, Kathryn (2019 թ․ հունվարի 16). "There are loads of Welsh locations in this major new Netflix series". Wales Online. Retrieved 2019 թ․ հունվարի 17.
  6. Medd, James (2019 թ․ հունվարի 22). "Where is 'Sex Education' on Netflix filmed?". Condé Nast Traveller. Retrieved 2019 թ․ հունվարի 22.
  7. Moon, Ra (2019 թ․ հունվարի 13). "Sex Education Location: The British school where the Netflix series is filmed". Atlas of Wonders. Retrieved 2019 թ․ հունվարի 22.
  8. "Sex Education: Season 1". Metacritic. CBS Interactive. Retrieved 2019 թ․ փետրվարի 11.
  9. Miller, Liz Shannon (2019 թ․ հունվարի 11). "'Sex Education' Review: Sweet and Sexy Netflix Series Is the Anti-'13 Reasons Why'". IndieWire. Retrieved 2019 թ․ հունվարի 16.
  10. Knight, Lewis (2019 թ․ հունվարի 10). "Sex Education on Netflix review – "Hilariously honest and refreshingly diverse"". Daily Mirror. Retrieved 2019 թ․ հունվարի 16.
  11. Poniewozik, James (2019 թ․ հունվարի 9). "Review: 'Sex Education,' a Sweet Teen Comedy of Modern Lust". The New York Times. Retrieved 2019 թ․ հունվարի 16.
  12. Stuever, Hank (2019 թ․ հունվարի 11). "Review | 'Sex Education' is a bracingly frank look at high school's busy birds and bees". The Washington Post. Retrieved 2019 թ․ հունվարի 16.
  13. Power, Ed (2019 թ․ հունվարի 10). "Sex Education review: Gillian Anderson's Netflix comedy is eager to please but tonally confused". The Independent. Retrieved 2019 թ․ հունվարի 16.
  14. "From Ncuti Gatwa to floral tributes: this week's fashion trends". The Guardian. 2019 թ․ փետրվարի 1. Retrieved 2019 թ․ փետրվարի 20.
  15. Lockett, Dee (2019 թ․ հունվարի 22). "Sex Education's Ncuti Gatwa Doesn't Want to Play the Gay Best Friend". Vulture. Retrieved 2019 թ․ փետրվարի 20.
  16. Okundaye, Jason (2019 թ․ հունվարի 22). "Sex Education's vital, complex portrayal of black queer teenhood". Dazed (in անգլերեն). Retrieved 2019 թ․ փետրվարի 20.
  17. Porter, Rick (2019 թ․ հունվարի 17). "Netflix Reveals Viewership Numbers for 'You,' 'Sex Education' and More". The Hollywood Reporter. Retrieved 2019 թ․ հունվարի 17.

Արտաքին հղումներ[խմբագրել | խմբագրել կոդը]