Ռուդոլֆ Խաչատրյան

Վիքիպեդիայում կան հոդվածներ Խաչատրյան ազգանունով այլ մարդկանց մասին:

Ռուդոլֆ Լորիսի Խաչատրյան
Ի ծնե	Խաչատրյան Ռուդոլֆ Լորիսի
Ծնվել է	մարտի 4, 1937
Ծննդավայր	Երևան, Հայկական ԽՍՀ, ԽՍՀՄ
Վախճանվել է	օգոստոսի 15, 2007 (70 տարեկան)
Մահվան վայր	Բեռլին, Գերմանիա
Ազգություն	հայ
Քաղաքացիություն	Հայաստան և  ԽՍՀՄ
Մասնագիտություն	նկարիչ, քանդակագործ և գծանկարիչ
Պարգևներ	, , , , և
Անդամակցություն	Հայաստանի նկարիչների միություն
Զավակներ	Մոկո Խաչատրյան
Ռուդոլֆ Խաչատրյան Վիքիդարանում
Rudolf Khachatryan Վիքիպահեստում

Ռուդոլֆ Լորիսի Խաչատրյան (մարտի 4, 1937, Երևան, Հայկական ԽՍՀ, ԽՍՀՄ - օգոստոսի 15, 2007, Բեռլին, Գերմանիա), հայ նկարիչ, ՀԽՍՀ ժողովրդական նկարիչ (1984), Ռուսաստանի գեղարվեստի ակադեմիայի թղթակից անդամ (2002)։

Օպերային երգիչ, ՀԽՍՀ ժողովրդական արտիստ Ալբերտ Խաչատրյանի եղբայրը։

Կենսագրություն

Ռուդոլֆ Խաչատրյանը ծնվել է 1937 թվականին, Երևանում։ 1951 թվականին մի քանի ամիս սովորել է Երևանի գեղարվեստի ուսումնարանում։ 1955 թվականից մասնակցել է հանրապետական և միջազգային ցուցահանդեսների։ 1960 թվականից եղել է ԽՍՀՄ, այնուհետև՝ Հայաստանի նկարիչների միության անդամ։ 1999-2001 թթ. մասնակցել է Ռուսաստանի հայերի միության ստեղծմանը։ 2002 թվականին ընտրվել է Ռուսաստանի գեղարվեստի ակադեմիայի թղթակից-անդամ։

Գործունեություն

Ռուդոլֆ Խաչատրյանն առաջինն է լևկասի վրա սեպիայի ու սանգինայի օգնությամբ ստեղծել գեղանկարչական գործեր՝

• «Ինքնանկար», 1981, ԺԱԹ
• «Վարդերով նատյուրմորտ», 1983
• «Հրանտ Մաթևոսյանի դիմանկարը», 1986
• «Գրիգոր Նարեկացի», 1988

Աշխատել է գրաֆիկայի և գեղանկարչության ասպարեզում։ 1971 թվականից ապրել և ստեղծագործել է Մոսկվայում։ 1959 թվականին Երիտասարդության համաշխարհային VII փառատոնի (Վիեննա) ցուցահանդեսում «Ուսանողուհու դիմանկար»-ի համար արժանացել է բրոնզե մեդալի, 1970 թվականին՝ Կոմիտասի ծննդյան 100-ամյակին նվիրված ցուցահանդեսում «Կոմիտաս»-ի համար՝ ՀԽՍՀ մշակույթի նախարարության առաջին մրցանակի։ Ստեղծել է դիմանկարներ, նատյուրմորտներ, բնանկարներ։ Ռուդոլֆ Խաչատրյանի վրձնին են պատկանում Ալավերդու երկաթուղային կայարանի շենքի բարձրարժեք որմնանկարները։ Աշխատանքներից են՝

• «Երիտասարդություն» (1965)
• «Մայրություն» (1965)
• «Նատյուրմորտով Մարիամիկը» (1972)
• «Կնոջ դիմանկար» (1973)
• «Հենրիկ Իգիթյանի դիմանկարը» (1982)

Մրցանակներ, կոչումներ և պարգևներ

• Երիտասարդության և ուսանողների համաշխարհային VII փառատոնի (1959, Վիեննա) ցուցահանդեսի բրոնզե մեդալ
• ՀԽՍՀ մշակույթի նախարարության 1-ին մրցանակ (1969)
• ՀԽՍՀ վաստակավոր նկարիչ (1977)
• ՀԽՍՀ ժողովրդական նկարիչ (1984)
• Անդրկովկասյան հանրապետությունների 1-ին բիենալեի ոսկե մեդալ (1986, Թբիլիսի)
• ՌԴ Բարեկամության շքանշան (1997)
• Մովսես Խորենացու մեդալ (2003)
• «Ֆրանց Կաֆկա» եվրոպական ընկերության ոսկե (2003) մեդալ

Անհատական ցուցահանդեսներ

• Մոսկվա (1978, 1984, 1993, 1997, 2002, 2004)
• Սանկտ Պետերբուրգ (1979)
• Օդեսա (1979),
• Լոս Անջելես (1985),
• Լոնդոն (1990),
• Երևան (1980, 1983, 1988, 1997)

Ռուդոլֆ Խաչատրյանի աշխատանքները գտնվում են Հայաստանում և արտասահմանում՝ ազգային պատկերասրահներում և պետական թանգարաններում։ Որոշ նկարներ գտնվում են Հայաստանի և աշխարհի շատ երկրների բազմաթիվ մասնավոր հավաքածուներում։ 2008 թվականին Երևանի Ժամանակակից արվեստի թանգարանում կազմակերպվել է Խաչատրյանի հետմահու ցուցահանդեսը։

Արտաքին հղումներ

• Ռուդոլֆ Խաչատրյան արվեստագետը Archived 2012-10-30 at the Wayback Machine.
• Ռուդոլֆ Խաչատրյան Archived 2013-05-22 at the Wayback Machine.
• Ռուդոլֆ Խաչատրյանի էջը ֆեյսբուքում

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 5, էջ 20)։