Եհովայի վկաներ

Վիքիպեդիայից՝ ազատ հանրագիտարանից
Jump to navigation Jump to search
Եհովայի վկաների գլխավոր վարչությունը Ուորվիքում (Նյու Յորք, ԱՄՆ)
Դիտարանի ընկերության ակտիվ անդամների թիվը 1945-2013 թթ.

Եհովայի վկաներ (մինչև 1931 թ. կոչվում էին «Աստվածաշունչ ուսումնասիրողներ»), 19-րդ դարի ավարտին Միացյալ Նահանգներում ստեղծված համաշխարհային կրոնական կազմակերպություն: Ըստ 2017 թ. Եհովայի վկաների հաղորդած տվյալների նրանց անդամների թիվը ողջ աշխարհում 8.45 մլն է:[1] Կազմակերպության գործունեությունը վերահսկվում է 8 անձից կազմված խմբի՝ «կառավարիչ մարմնի» կողմից:[2]

Եհովայի վկաները հայտնի են դռնեդուռ այցերի և փողոցում պատահական անցորդների հետ զրուցելով։ Նրանք հավատում են, որ մարդկությունը գտնվում է Աստվածաշնչում հիշատակված աշխարհի վախճանին նախորդող ժամանակաշրջանում։ Նրանք կատարել են մի շարք կանխատեսումներ, որոնք չեն իրականացել: Oրինակ՝ կանխատեսել են, որ 1914, 1925 և 1975 թթ. լինելու է աշխարհի վախճանը:[3][4][5]

Եհովայի վկաներն ընդունում են որոշակի գիտակցական տարիքի հասած անձանց, այդ թվում՝ երեխաների մկրտությունը,[6] որով նորահավատը նրանց կազմակերպության անդամ է դառնում։

Եհովայի վկաները մերժում են ամբողջական արյան և դրա հիմնական բաղադրամասերի՝ էրիթրոցիտների, լեյկոցիտների, թրոմբոցիտների և պլազմայի ներարկումը՝ անկախ հիվանդի տարիքից և առողջական վիճակի ծանրությունից: Նրանց նաև արգելված է արյուն տալ ուրիշներին ներարկելու համար և պահեստավորել սեփական արյունը իրենց իսկ ներարկելու համար: Արյան այլ բաղադրամասերի ներարկումը, հեմոդիալիզը, հեմոդիլյուցիան անձնական որոշման հարց է:[7] Նրանք «ընկերակցությունից զրկում» են կազմակերպությունից դուրս եկող անդամներին, այսինքն՝ չեն շփվում ո՛չ կրոնական, ո՛չ էլ որևէ այլ թեմայով: Եթե վտարված անհատն ընտանիքի անդամ է, շփումը պետք է հասցվի նվազագույնի:[8][9] Եհովայի վկաներին խրախուսվում է հեռու մնալ բարձրագույն կրթությունից:[10]

Պատմություն[խմբագրել | խմբագրել կոդը]

Կազմակերպության հիմնադիր Չարլզ Ռասելն իր առաջին խմբակն անվանել էր «Գրքերի ուսումնասիրողներ», որն էլ հենց «Եհովայի վկաներ»-ի առաջին անվանումն է։ Հետագայում կազմակերպությունը վերանվանվում է «Գրքերի ուսումնասիրողների ընկերության»։ 1884 թվականին «Եհովայի վկաներ»-ը Փենսիլվանիայի նահանգում գրանցվում են «Սիոնի դիտարանի հրատարակության ընկերություն» (Zion’s Watchtower Bible & Tract) անվամբ։

Եհովայի վկաները Հայաստանում[խմբագրել | խմբագրել կոդը]

Եհովայի վկաների կազմակերպությունը 2004 թ. գրանցվել է Հայաստանում գործող կրոնական կազմակերպությունների ցանկում: Համաձայն Եհովայի վկաների պաշտոնական կայքի՝ Հայաստանում նրանց անդամների թիվը մոտ 11000 է:[11]

1993–2012թթ. զինվորական ծառայությունից հրաժարված ավելի քան 450 Եհովայի վկաներ ազատազրկվել են 1-3 տարի ժամկետներով: 2013 թ. ԱԺ ընդունեց «այլընտրանքային ծառայության մասին» ՀՀ օրենքում փոփոխություններ կատարելու մասին օրենք, որից հետո զորակոչման ենթակա Եհովայի վկաները անցնում են այլընտրանքային աշխատանքային ծառայություն: Նրանք կարող են նշանակվել որպես հանրային ծառայող, բակի հավաքարար, փողոց մաքրող, տեխսպասարկման աշխատող, աղբահան, բուժքրոջ օգնական, փոստատար, գործավար, սանիտար, շտապօգնության մեքենայի վարորդ կամ գրասենյակային աշխատող։[12] Քաղաքացիական ծառայության ժամկետը 36 ամիս է, իսկ աշխատանքային շաբաթը բաղկացած է 48 ժամից: Տարեկան տրվում է 10 արձակուրդային օր:[13] Այլընտրանքային աշխատանքային ծառայության վայրը, որպես կանոն, պետք է լինի այլընտրանքային ծառայողի հաշվառման վայրից ոչ ավելի, քան 30 կմ հեռավորության վրա: Հակառակ դեպքում այլընտրանքային աշխատանքային ծառայողին վճարվում է փոխհատուցում, որի չափը որոշվում է բնակելի տարածության վարձակալության պայմանագրին համապատասխան, սակայն ոչ ավելի, քան 30000 դրամը: [14]

Դատական գործընթացներ[խմբագրել | խմբագրել կոդը]

Հայաստան[խմբագրել | խմբագրել կոդը]

2012 թվականի նոյեմբերին Մարդու իրավունքների եվրոպական դատարանը վճիռ կայացրեց «Եհովայի վկաներ» կրոնական կազմակերպության 19 հետևորդներն ընդդեմ Հայաստանի գործով։ Դատարանը բավարարեց դիմողների իրավունքի խախտումը՝ այլընտրանքային զինվորական ծառայությունից խուսափելու համար կալանքի տակ պահելը։ Որոշման համաձայն հետևորդներին պատճառված բարոյական վնասի համար Հայաստանի նրանց պետք է վճարեր 134.000 եվրո[15]։

Աղբյուրներ[խմբագրել | խմբագրել կոդը]

  1. 2017 Grand Totals, Եհովայի վկաների պաշտոնական կայք
  2. What Is the Governing Body of Jehovah’s Witnesses?, Եհովայի վկաների պաշտոնական կայք
  3. 1914 : Failed Watchtower Prophecy, jwfacts.com
  4. 1925 - "Millions Now Living Will Never Die!", jwfacts.com
  5. 1975 - Watchtower Quotes, jwfacts.com
  6. Ծնողնե՛ր, պատրաստո՞ւմ եք ձեր երեխաներին մկրտվելու, Դիտարան 2018 մարտ (ուսումնասիրության թողարկում), էջ 8-12
  7. Մնա Աստծու սիրո մեջ, 2014 թ., WatchTower Bible and Tract Society of Pennsylvania, էջ՝ 77,78 կարդալ օնլայն
  8. Մնա Աստծու սիրո մեջ, 2014 թ., WatchTower Bible and Tract Society of Pennsylvania, էջ՝ 207,208 կարդալ օնլայն
  9. Քրիստոնեական հավատարմություն դրսևորիր, երբ հարազատներիցդ որևէ մեկը զրկվում է ընկերակցությունից, Մեր թագավորական ծառայությունը, օգոստոս 2002, էջ 3-4
  10. Մերժենք «անարժեք բաները», Դիտարան 15/4 2008, էջ 3-7
  11. Հայաստան։ Քանի՞ Եհովայի վկա կա այնտեղ, jw.org
  12. Հայաստանում հաջողությամբ իրականացվում է այլընտրանքային քաղաքացիական ծառայությունը, Եհովայի վկաների պաշտոնական կայք
  13. Հայաստանը տրամադրում է այլընտրանքային քաղաքացիական ծառայություն, Եհովայի վկաների պաշտոնական կայք
  14. ՀՀ կառավարության N 1059-Ն որոշում, 19 սեպտեմբերի 2013 թվականի, ԱՅԼԸՆՏՐԱՆՔԱՅԻՆ ԱՇԽԱՏԱՆՔԱՅԻՆ ԾԱՌԱՅՈՂԻՆ ՎՃԱՐՎՈՂ ՓՈԽՀԱՏՈՒՑՄԱՆ ՉԱՓԸ ԵՎ ՎՃԱՐՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ
  15. Հայաստանը «Եհովայի վկաներ»-ի հետևորդներն կվճարի 134.000 եվրո