Արսեն Համբարձումյան

Վիքիպեդիայում կան հոդվածներ Համբարձումյան ազգանունով այլ մարդկանց մասին։

Արսեն Խաչիկի Համբարձումյան (հունիսի 30, 1973(1973-06-30), Երևան, Հայկական ԽՍՀ, ԽՍՀՄ), ՀՀ պետական և քաղաքական գործիչ։

Կրթություն

1990-1995 թթ. սովորել և ավարտել է Երևանի պետական համալսարանի պատմության ֆակուլտետը։ Եղել է ԵՊՀ առաջին ուսանողական խորհրդի նախագահության անդամ, արտաքին հարաբերությունների հանձնախմբի նախագահ։
1995-1998 թթ. սովորել է ԵՊՀ ասպիրանտուրայում՝ հայոց պատմություն մասնագիտությամբ։ Գիտական երկու և լրագրային շուրջ 30 հոդվածների հեղինակ է։

1993 թ. սեպտեմբեր - նոյեմբեր - Շուշիի «Արամ Մանուկյան» վարժարանի ուսուցիչ։
1995 թ. հոկտեմբեր-դեկտեմբերին աշխատել է ԵՊՀ պատմության ֆակուլտետում որպես ասիստենտ։
1998-1999 թթ. աշխատել է ՀՀ մշակույթի, երիտասարդության հարցերի և սպորտի նախարարության երիտասարդության հարցերի վարչությունում որպես գլխավոր մասնագետ։
1999-2005 թթ. - ՀՀ Ազգային ժողովի ՀՅԴ պատգամավորական խմբակցության գլխավոր մասնագետ։
2005-2008 թթ. - Սոցիալական պաշտպանության ոլորտի կառավարման վարկային ծրագրի համակարգող։

1992 թվականից ՀՅԴ անդամ է։
2008 թ. հունիսի 2-ին ՀՀ Նախագահի հրամանագրով նշանակվել է ՀՀ աշխատանքի և սոցիալական հարցերի նախարար^[1]։
2009 թ. մայիսի 12-ին ՀՀ Նախագահի հրամանագրով ազատվել է ՀՀ աշխատանքի և սոցիալական հարցերի նախարարի պաշտոնից^[2]՝ իշխանական կոալիցիայից ՀՅԴ դուրս գալու կապակցությամբ։
2012 թվականին ընտրվել է ՀՅԴ Գերագույն մարմնի փոխներկայացուցիչ։