Ալեխանդրո Ամենաբար

Ալեխանդրո Ամենաբար; Alejandro Amenábar
Ծնվել է	մարտի 31, 1972 (52 տարեկան)
Ծննդավայր	Սանտյագո, Չիլի
Քաղաքացիություն	Իսպանիա և Չիլի
Կրթություն	Մադրիդի Կոմպլուտենսե համալսարան
Մասնագիտություն	կինոռեժիսոր, սցենարիստ, դերասան, կոմպոզիտոր, կինոպրոդյուսեր, մոնտաժող և ֆիլմերի երաժշտությունների հեղինակ
Պարգևներ և ; մրցանակներ	«Ոսկե գլոբուս» մրցանակ օտարալեզու լավագույն ֆիլմի համար Եվրոպական կինոակադեմիայի մրցանակ լավագույն օպերատորին և Time Machine Award?
	Alejandro Amenábar Վիքիպահեստում

Ալեխանդրո Ամենաբար (լրիվ անունը՝ Ալեխանդրո Ֆեռնանդո Ամենաբար Կանտոս, իսպ.՝ Alejandro Fernando Amenábar Cantos, մարտի 31, 1972(1972-03-31)^[1]^[2], Սանտյագո, Չիլի), իսպանացի ռեժիսոր, սցենարիստ, կոմպոզիտոր և դերասան։

Կենսագրություն

Ալեխանդրո Ամենաբարը ծնվել է Սանտյագոյում։ Հայրը չիլիացի էր, մայրը իսպանուհի։ 1973 թ. Չիլիում քաղաքական իրավիճակի սրման պատճառով նրա ընտանիքը տեղափոխվում է Իսպանիա։

1990 թ. ընդունվում է Մադրիդի Կոմպլուտենսե համալսարանի ինֆորմացիոն գիտությունների ֆակուլտետրը։ Սակայն չկարողանալավ շարունակել ուսումը, նա թողնում է համալսարանը և հետաքրքրվում ռեժիսուրայով։ Սկզբնական շրջանում նկարահանում է կարճամետրաժ ֆիլմեր։

Կարիերա

Նկարահանել է ընդհանուր թվով 8 ֆիլմ՝ 3 կարճամետրաժ և 5 լիամետրաժ։ 9 ֆիլմերի սցենարի հեղինակ է, 12 ֆիլմերի համար երաժշտություն է գրել, 4 ֆիլմի պրոդյուսեր է, խաղացել է 6 ֆիլմերում։

Կարճամետրաժ ֆիլմեր

Իր առաջին իսկ «Գլուխ» կարճամետրաժ ֆիլմի համար 1991 թ. ստանում է իր առաջին մրցանակը՝ Սիրողական կինոգործիչների անկախ ասոցիացիայից (AICA)։ Մեկ տարի անց նրա մյուս՝ «Թաղանթապատ թևիկներ» ֆիլմը Էլչե և Կարաբանչելե կինոփառատոնում ստանում է մրցանակ։ 1994 թվականին երրորդ կարճամետրաժը՝ «Լուսին», ստանում է 2 մրցանակ՝ (AICA)-ի մրցանակ լավագույն երաժշտության համար և Լուիս Գարսիա Բեռլանգի մրցանակ լավագույն սցենարի համար։

Լիամետրաժ ֆիլմեր

«Թեզ»

Ալեխանդրո Ամենաբարի առաջին լիամետրաժ ֆիլմի՝ «Թեզ», պրոդյուսերը դարձավ Խոսե Լուիս Քուերդը, ում հետաքրքրել էր ֆիլմի սցենարը։ Ֆիլմը պատմում է Ամենաբարի սովորած համալսարանի մասին, իսկ ֆիլմի բացասական հերոսներից մեկը նա կոչում է իր դասախոսներից մեկի անունով, ում մոտ նա չէր կարողացել հանձնել քննությունը։ Ֆիլմը Իսպանիայում ստանում է 7 «Գոյա» կինոմրցանակ, այդ թվում լավագույն ֆիլմ, օրիգինալ սցենար և ռեժիսորական դեբյուտ անվանակարգերում, ցուցադրվում է Բեռլինի կինոփառատոնում, արժանանալով կինոքննադատների դրական կարծիքներին։

«Բացիր աչքերդ»

Երկրորդ լիամետրաժ ֆիլմը՝ «Բացիր աչքերդ» մեծ հաջողություն է ունենում Բեռլինի և Տոկիոյի կինոփառատոններում։ Հայտնի կինոդերասան Թոմ Քրուզը գնում է ֆիլմի սցենարի իրավունքը, իսկ հետագայում ֆիլմի սցենարի հիման վրա նկարահանված «Վանիլային երկինք» ֆիլմում խաղում է գլխավոր դեր։

«Ուրիշները»

Երրորդ ֆիլմի՝ «Ուրիշները» պրոդյուսերը դառնում է Թոմ Հենքսը, իսկ ֆիլմում գլխավոր դերում հանդես է գալիս Նիկոլ Կիդմանը։ Ֆիլմի պրեմիերան կայանում է Վենետիկի կինոփառատոնում 2001 թվականին, ուր ֆիլմը ընդգրկվում է մրցութային ծրագրում։ Ֆիլմը մեծ հաջողություն է ունենում ամբողջ աշխարհում, դառնում Իսպանիայի այդ տարվա ամենահայտնի ֆիլմը, ստանալով 8 «Գոյա», այդ թվում լավագույն ֆիլմ և օրիգինալ սցենար անվանակարգերում, նաև առաջադրվում է եվրոպական կինոակադեմիայի «լավագույն ֆիլմ» մրցանակին։

«Ծովը ներսում»

2004 թվականին էկրան է բարձրանում Ամենաբարի չորրորդ ֆիլմը՝ «Ծովը ներսում», որը հիմնված է իրական փաստերի վրա։ Գլխավոր հերոսը Ռամոն Սամպեդրոն է, ում մեծ վարպետությամբ մարմնավորել է մեր ժամանակների իսպանացի հայտնի դերասան Խավիեր Բարդեմը, ով հաշմանդամ է և, չցանկանալով այդպես ապրել, ուզում է վերջ տալ իր տանջալից կյանքին ու պայքարում է էյտանազիայի իրավունքի համար։ Ֆիլմը շատ մեծ հաջողություն է ունենում ամբողջ աշխարհում՝ արժանանալով կինոքննադատների բարձր գնահատականներին։ Վենետիկի կինոփառատոնում ստանում է ժյուրիի հատուկ մրցանակ, Խավիեր Բարդեմը ստանում է «Վոլպի գավաթ» որպես լավագույն դերասան։ 2005 թվականին ֆիլմը ստանում է «Օսկար» «Օսկար լավագույն օտարալեզու ֆիլմի համար» հեղինակավոր անվանակարգում ստանում է նաև Ոսկե Գլոբուս։

«Ագորա»

Ամենաբարի վերջին ֆիլմը 2009 թվականին նկարահանված «Ագորա» պատմական ֆիլմն է, որը պատմում է Եգիպտոսի Ալեքսանդրիա քաղաքի բնակչուհի Հիպատիայի մասին, ով փլիսոփայություն, աստղագիտություն և մաթեմատիկա ուսումնասիրած պատմությանը հայտնի առաջին կին գիտնականն է։ Ֆիլմը ստացել է 7 «Գոյա»։

Ֆիլմագրություն

տարի	ֆիլմի անվանում	բնօրինակ անվանում	դերասաններ
1991	«Գլուխ»	La Cabeza
1992	«Թաղանթապատ թևիկներ»	Himenóptero
1994	«Լուսին»	Luna
1996	«Թեզ»	Tesis	Անա Տորրենտ Էդուարդո Նորեգա Ֆելե Մարտինես
1997	«Բացիր աչքերդ»	Abre los ojos	Պենելոպե Կրուս Էդուարդո Նորեգա Ֆելե Մարտինես
2001	«Ուրիշները»	The Others	Նիկոլ Կիդման
2004	«Ծովը ներսում»	Mar adentro	Խավիեր Բարդեմ
2009	«Ագորա»	Ágora	Ռեյչել Վայս Մաքս Մինգելլա Օսկար Այզեկ Մայքլ Լոնսդեյլ
2015	«Խավարում»	Regresión	Էմմա Ուոթսոն Իթան Հոուք
2019	«Պատերազմի ժամանակ»	Mientras dure la guerra	Կարրա Էլեխալդե Էդուարդ Ֆեռնանդես

Մրցանակներ

Մրցանակներ ստացել է որպես ռեժիսոր, սցենարի հեղինակ, կոմպոզիտոր և պրոդյուսեր։ Ընդհանուր թվով ստացել է մոտ 48 կինոմրցանակ, ներկայացված է եղել ևս 32-ի, որոնց թվում՝

8 «Գոյա», ներկայացվել է ևս 7-ի.
Վենետիկի կինոփառատոնի 2 մրցանակ, ևս 2-ի ներկայացված.
ներկայացվել է 1 «BAFTA»-ի.
ներկայացվել է 1 «Սեզար»-ի.
Բեռլինի կինոփառատոնի 1 մրցանակ.
Դավիդ դի Դոնատելլի անվան 1 մրցանակ.
Եվրոպական կինոակադեմիայի 1 մրցանակ, ներկայացված ևս 2-ի, և այլն

Ծանոթագրություններ

↑ ^1,0 ^1,1 Բրոքհաուզի հանրագիտարան (գերմ.)
↑ ^2,0 ^2,1 Munzinger Personen (գերմ.)
↑ https://web.archive.org/web/20190720124302/https://www.europeanfilmacademy.org/European-Film-Awards-Winners-2004.69.0.html

Արտաքին հղումներ

Վիքիպահեստն ունի նյութեր, որոնք վերաբերում են «Ալեխանդրո Ամենաբար» հոդվածին։

[_a37cb287b1e4a2a2-1] 1,0 ^1,1 Բրոքհաուզի հանրագիտարան (գերմ.)

[_0cabf121ec5d0b2e-2] 2,0 ^2,1 Munzinger Personen (գերմ.)

[_c686fc1b72f559b3-3] ttps://web.archive.org/web/20190720124302/https://www.europeanfilmacademy.org/European-Film-Awards-Winners-2004.69.0.html

[1]

[2]

[3]