Ժանվալժան Քանքանյան
- Վիքիպեդիայում կան հոդվածներ Քանքանյան ազգանունով այլ մարդկանց մասին։
Ժանվալժան Քանքանյան | |
---|---|
Ծնվել է | օգոստոսի 6, 1927 |
Ծննդավայր | Երևան, Հայկական ԽՍՀ, ԱԽՖՍՀ, ԽՍՀՄ |
Մահացել է | հոկտեմբերի 1, 2011 (84 տարեկան) |
Վախճանի վայրը | Մոսկվա, Ռուսաստան |
Կրթություն | Մոսկվայի Ս. Ստրոգանովի անվան արվեստի և արդյունաբերության ակադեմիա (1955) և Փանոս Թերլեմեզյանի անվան գեղարվեստական ուսումնարան (1947) |
Մասնագիտություն | քանդակագործ |
Պարգևներ և մրցանակներ |
Ժանվալժան Միհրանի Քանքանյան (օգոստոսի 6, 1927, Երևան, Հայկական ԽՍՀ, ԱԽՖՍՀ, ԽՍՀՄ - հոկտեմբերի 1, 2011, Մոսկվա, Ռուսաստան), հայ քանդակագործ, մոլբերտային և դեկորատիվ մոնումենտալ քանդակի վարպետ, նկարիչ, Ռուսաստանի Դաշնության ժողովրդական նկարիչ (2007)։
Կենսագրություն[խմբագրել | խմբագրել կոդը]
Ծնվել է 1927 թվականի օգոստոսի 6-ին, Հայկական ԽՍՀ Երևան քաղաքում։ Նրա հայրը՝ Միհրան Հարությունի Քանքանյանը, բնիկ Վան քաղաքից է եղել։ Վաղ տարիքից Ժանվալժանը հրապուրվել է երաժշտությամբ և կերպարվեստով։ Սովորել է Երևանի կոնսերվատորիայի երաժշտական դպրոցում։ 1943 թվականից աշխատել է Պատանի հանդիսատեսի թատրոնի նվագախմբում՝ նվագելով ջութակ։ Երաժշտությանը զուգահեռ սովորել է կերպարվեստի հիմունքներ՝ կես դրույքով աշխատելով Երևանի Գ. Սունդուկյանի անվան թատրոնի բուտաֆորական արհեստանոցում։ Պրոֆեսիոնալ նկարչի հմտություններն ամրապնդել է Երևանի գեղարվեստի ուսումնարանում սովորելիս, որն ավարտել է 1947 թվականին[1]։ 1948 թվականին մեկնել է Մոսկվա, որտեղ հնարավորություն է ունեցել շարունակելու իր ստեղծագործական ուղին։ 1948 թվականին ընդունվել է Մոսկվայի բարձրագույն գեղարվեստաարդյունաբերական ուսումնարանի (նախկինում՝ Ստրոգանովյան) քանդակագործության ֆակուլտետ, որը հաջողությամբ ավարտել է 1955 թվականին։
1957 թվականին, դառնալով Մոսկվայի նկարիչների միության անդամ (նախկինում՝ ՌՍՖՍՀ նկարիչների միության Մոսկվայի մասնաճյուղ), սկսել է բեղմնավոր գեղարվեստական կարիերա՝ ստեղծելով պլաստիկ արվեստի նմուշներ։
2002 թվականին Քանքանյանը պարգևատրվել է Ռուսաստանի գեղարվեստի ակադեմիայի մեդալով, իսկ ավելի ուշ արժանացել ՌԴ ժողովրդական նկարչի կոչման։
Քանքանյանի մոնումենտալ ստեղծագործությունները տեղադրված են Ռուսաստանի շատ քաղաքներում (օրինակ՝ Մոսկվայի Պոկլոննայա բլրի վրա, Ժուկովսկիում, Ելեցում և այլն) և արտասահմանում (Կալիֆոռնիա, Աալստ)։
Ստեղծագործական ուղի[խմբագրել | խմբագրել կոդը]
Մոսկվայի բարձրագույն գեղարվեստաարդյունաբերական ուսումնարանում (նախկին՝ Ստրոգանովյան) սովորելը մեծ ազդեցություն է ունեցել Քանքանյանի ստեղծագործության վրա։ Նրա ուսուցիչներն են եղել պլաստիկ արվեստի մեծագույն վարպետներ և ռուսական քանդակագործական դպրոցի հիմնադիրներ՝ Գեորգի Մոտովիլովը, Եկատերինա Բելաշովան, Գավրիիլ Շուլցը։ Մտերմիկ հարաբերությունների մեջ է եղել Գավրիիլ Ալեքսանդրովիչ Շուլցի հետ, իսկ հետագայում որպես գործընկերներ միասին ստեղծել են մի քանի մոնումենտալ գործեր։ Նրանց նշանակալի համատեղ աշխատանքներից էր Մոսկվայի Տիեզերագնացության թանգարանի քանդակագործական ձևավորումը[2]։ Թանգարանի պլաստիկ հարդարանքի նշանակալի ձեռքբերումը «տիեզերական ոլորտ» կոմպոզիցիան է (ըստ Յան Հևելիուսի), որը պատրաստվել է առանձին ֆիգուրների տեսքով և կազմում է միջանցիկ ռելիեֆ (Մոսկվա, 1980)։
Ժանվալժան Քանքանյանը համարվում է ժամանակակից նշանավոր քանդակագործներից մեկը, ում ստեղծագործությունները կարևոր երևույթ են դարձել հայրենական պլաստիկ արվեստի զարգացման գործում[փա՞ստ]։ Նրա ստեղծագործությունը ներդաշնակորեն համատեղում է ավանդույթն ու նորարարությունը, դասական ռեալիստական արվեստի շարունակականությունը և նոր ժամանակակից արտահայտչամիջոցների որոնումը[փա՞ստ]։ Քանդակագործի ստեղծագործություններին բնորոշ են բարձր կատարողական հմտությունները, պլաստիկության նուրբ զգացումը և գեղարվեստական կերպարի խորը մշակումը։ Վարպետի ստեղծագործության հիմնական ժանրերից մեկը դիմանկարն է։ Քանդակագործի դիմանկարների պատկերասրահը լցված է բազմաթիվ հրաշալի գործերով, որոնք պլաստիկ ձևի արտահայտիչ միջոցների միջոցով հստակորեն ցուցադրում են մարդու անհատականության տարբեր կողմեր։ Կարելի է առանձնացնել այնպիսի պատմական դեմքերի դիմանկարներ, ինչպիսիք են Կոմիտասը, Ն.Կ. Ռերիխը, Միխայիլ Լերմոնտովը, Ալեքսանդր Պուշկինը, Պետրոս I-ը, Նիկոլայ II-ը և այլն։ Այդ դիմանկարներին միավորում է նկարչի ձգտումը՝ հավատարիմ մնալով բնությանը կամ հայտնի պատկերագրությանը, բացահայտել իր հերոսի մեջ ամենակարևորը, որոշել պատկերված կերպարի հոգևոր արժեքը և միևնույն ժամանակ արտահայտել այն նորությունը, որ բերում է արդիականությունը պատմական անձի ընկալմանը։
Նկարչի ստեղծագործական գործունեությունը բեղմնավոր է նաև մոնումենտալ քանդակագործության բնագավառում։ Առանձնահատուկ ուշադրության են արժանի ավիացիայի գեներալ-գնդապետ Միխայիլ Գրոմովի հուշարձան-կիսանդրու երեք տարբերակները (Սան Ջասինտո, Կալիֆոռնիա, ԱՄՆ, Ժուկովսկի և Մոսկվա), Կենտրոնական աերոհիդրոդինամիկական ինստիտուտի ավիացիոն սարքավորումների գլխավոր կոնստրուկտոր Վ. Մյասիշչևի (Ժուկովսկի), Ռուսաստանի հերոս Վ. Դ. Վոլոշինի (Միտիշչի), Առողջապահության առաջին ժողովրդական կոմիսար Նիկոլայ Սեմաշկոյի Ելեց քաղաքի համար, Ա. Ռուբլյովի և Ֆեոդոր Դոստոևսկու Մոսկվայի համար ստեղծված քանդակները։
Քանդակագործը մասնակցել է Քրիստոս Փրկչի տաճարի քանդակագործական հարդարանքի ստեղծմանը[3], ստեղծել է տաճարի արտաքին դեկորի հիմնական տարրերից մեկը։ Տաճարի կենտրոնական մուտքը զարդարում է վարպետի «Տիրամայր Սմոլենսկի» հարթաքանդակը։
Վարպետի նշանակալից գործերից է ԽՍՀՄ հերոս, փորձարկող օդաչու Միխայիլ Գրոմովի հուշարձանը, որը կանգնած է Գրոմովի անվան թռիչքների հետազոտական ինստիտուտի տարածքում Ժուկովսկի քաղաքում, իսկ Գրոմովի կիսանդրին գտնվում է Սան Ջասինտոյի թանգարանում (Կալիֆոռնիա, ԱՄՆ)։ 1937 թվականին ANT-25-1-ով Միխայիլ Գրոմովն առանց կանգառի չվերթ է կատարել Մոսկվա-Հյուսիսային բևեռ-Սան Ջասինտո (Կալիֆոռնիա, ԱՄՆ)՝ սահմանելով թռիչքների հեռավորության 2 համաշխարհային ավիացիոն ռեկորդ։ Այդ իրադարձության պատվին ԱՄՆ-ում ստեղծվել է հատուկ էքսպոզիցիա, որտեղ ցուցանմուշներից մեկը Միխայիլ Գրոմովի կիսանդրին է։ Ըստ լեգենդար օդաչուի այրու՝ Նինա Գեորգիևնա Գրոմովայի, Միխայիլ Միխայլովիչի Քանքանյանի ստեղծած քանդակագործական դիմանկարն իր ամուսնուն նվիրված լավագույն ստեղծագործությունն է։
Քանքանյանը մասնակցել է ավելի քան 130 գեղարվեստական ցուցահանդեսների ինչպես Ռուսաստանում, այնպես էլ արտերկրում։ Վարպետի ստեղծագործությունները պահվում են թանգարաններում և մասնավոր հավաքածուներում։ Ստեղծագործական ձեռքբերումներն արժանացել են մի շարք մրցանակների և պատվոգրերի[4]։
Հիմնական ստեղծագործություններ[խմբագրել | խմբագրել կոդը]
- Կոմպոզիցիա «Բարեկամություն», փայտ, 1957,
- Մեդալ «Հովհաննես Թումանյան», բրոնզ, 1976,
- Կոմպոզիցիա «Ոլորտ», բրոնզ, 1980, / Տիեզերագնացության հուշահամալիր, Մոսկվա,
- Կենտրոնական աերոհիդրոդինամիկական ինստիտուտի գլխավոր կոնստրուկտոր Վլադիմիր Մյասիշչևի հուշարձանը, բրոնզ, գրանիտ, 1988 / Ժուկովսկի,
- Խորհրդային Միության հերոս, փորձարկող օդաչու Միխայիլ Գրոմովի հուշարձանը, բրոնզ, գրանիտ, 1989 / Ժուկովսկի,
- Կոմպոզիցիա «Կոմիտաս», բրոնզ, 1991,
- Նիկոլայ Սեմաշկոյի հուշարձանը, բրոնզ, 1991 / Յելեց,
- Դոլորես Իբարուրիի հուշատախտակը, գրանիտ, 1991 / Մոսկվա,
- Մ. Մ. Գրոմովի կիսանդրին, բրոնզ, 1993 / Սան Ջասինտո, Կալիֆոռնիա, ԱՄՆ,
- Կոմիտասի դիմանկարը, բրոնզ, 1995,
- Խորհրդային Միության հերոս Վերա Վոլոշինայի հուշարձանը, բրոնզ, գրանիտ, 1995, ք․ Միտիշչի,
- Օդաչու-տիեզերագնաց, Խորհրդային Միության հերոս Բորիս Եգորովի մահարձանը, բրոնզ, գրանիտ, 1996 / Նովոդևիչի գերեզմանատուն, Մոսկվա,
- Կոմպոզիցիա «Մտածողը», բրոնզ, 1997,
- Դիմանկար «Քահանա», գրանիտ, 1998,
- Քրիստոս Փրկչի տաճարի «Սմոլենսկի Աստվածամայր» բարձրաքանդակ, 1998 / Մոսկվա,
- Միխայիլ Լերմոնտովի դիմանկարը, պղինձ, 1998 / Կիզլյար,
- Նիկոլայ Ռերիխի դիմանկարը, բրոնզ, քար, 2000,
- Կոմպոզիցիա «Անդրեյ Ռուբլյով», գիպս, 2000,
- Խորհրդային Միության հերոսների հուշահամալիր Խանտի-Մանսիյսկ քաղաքում, բրոնզ, գրանիտ, 2004։
Թանգարաններ, որտեղ գտնվում են Քանքանյանի քանդակագործական աշխատանքները[խմբագրել | խմբագրել կոդը]
- 1941-1945 թվականների Հայրենական մեծ պատերազմի կենտրոնական թանգարան,
- Տիեզերագնացության հուշահամալիր, Մոսկվա,
- Տոմսկի մարզային արվեստի թանգարան,
- Ուլյանովսկի մարզային արվեստի թանգարան,
- Կիզլյարի Պ. Ն. Բագրատիոնի անվան երկրագիտական թանգարան,
- Ն. Կ. Ռերիխի անվան թանգարան, Ռերիխների միջազգային կենտրոն, Մոսկվա,
- Սան Ջասինտո քաղաքի թանգարան, Կալիֆոռնիա, ԱՄՆ,
- Աալստ քաղաքի թանգարան, Բելգիա։
Պարգևներ[խմբագրել | խմբագրել կոդը]
- Ռուսաստանի Դաշնության ժողովրդական նկարիչ, 2007[5],
- Ռուսաստանի Դաշնության վաստակավոր նկարիչ, 1994[6],
- Ռուսաստանի արվեստի ակադեմիայի արծաթե մեդալ, 2002,
- «ԽՍՀՄ ժողովրդական տնտեսության նվաճումների ցուցահանդեսի (ԺՏՆՑ)» բրոնզե մեդալ, 1969,
- Ն. Կ. Ռերիխի թանգարանի շքանշան «Ս. Ն. Ռերիխի 100 տարի» - 2004,
- Ռուսաստանի նկարիչների միության արծաթե մեդալ «Վարպետություն. ոգեղենություն. ավանդույթներ» - 2009,
- Ռուսաստանի տիեզերագնացության ֆեդերացիայի մեդալ «Ա. Գ. Նիկոլաևի և Պ. Ռ. Պոպովիչի կողմից դեպի տիեզերք աշխարհում առաջին խմբակային թռիչքի 40 տարի», 2002։
Աշխատանքների հիմնական հրապարակումներ[խմբագրել | խմբագրել կոդը]
- Газета «Ленинское Знамя». Статья «Рыцарю пятого океана». И. Модестов. 1989 г.
- Каталог восьмой выставки произведений художников России, М. 1992, cтр. 51
- Газета «Вечерняя Москва». Статья «Проблема в зеркале личности», 1994 г.
- Каталог второй художественной выставки «Защитникам отечества посвящается», к 50-летию Великой Отечественной войны 1941-1945 гг., М. 1995, c. 15
- Газета «Рудники». Статья «Умирая, не сдались». Т. Мелентьева. 1996 г.
- Каталог выставки «Художники России - Москве», к 850-летию города, М. 1997, cтр. 11
- Каталог Всероссийской художественной выставки «Россия - IX», М. 1999, cтр. 194
- Каталог Всероссийской художественной выставки к 2000-летию Рождества Христова «Имени твоему», М. 2000, стр. 56
- Каталог выставки «Москва - Петербург», М. 2001, стр. 78
- Каталог-альбом художественной выставки «Искусство наций», к 10-летию Международной конференции союзов художников, М. 2002 г.
- Каталог художественной выставки «Петербург - открытый город», к 300-летию города, М. 2003 г.
Ծանոթագրություններ[խմբագրել | խմբագրել կոդը]
- ↑ Դանիել Դզնունի, Հայ կերպարվեստագետներ, համառոտ բառարան
- ↑ Цыганов И. Космические реликвии. «Советский Союз». № 9. — 1981. — С. 18, 19.
- ↑ «Богоматерь Храма Христа Спасителя». Արխիվացված է օրիգինալից 2017 թ․ օգոստոսի 14-ին. Վերցված է 2015 թ․ մարտի 3-ին.
- ↑ «Народный художник России Жанвалжан Канканян». Արխիվացված օրիգինալից 2015 թ․ ապրիլի 2-ին. Վերցված է 2015 թ․ մարտի 3-ին.
- ↑ «Указ Президента Российской Федерации от 21 мая 2007 года № 648 «О награждении государственными наградами Российской Федерации»». Արխիվացված օրիգինալից 2020 թ․ սեպտեմբերի 24-ին. Վերցված է 2022 թ․ հունիսի 12-ին.
- ↑ «Указ Президента Российской Федерации от 29 декабря 1994 года № 2227 «О присвоении почётных званий Российской Федерации»». Արխիվացված օրիգինալից 2022 թ․ փետրվարի 4-ին. Վերցված է 2022 թ․ հունիսի 12-ին.
Արտաքին հղումներ[խմբագրել | խմբագրել կոդը]
- Օգոստոսի 6 ծնունդներ
- 1927 ծնունդներ
- Երևան քաղաքում ծնվածներ
- Հոկտեմբերի 1 մահեր
- 2011 մահեր
- Մոսկվա քաղաքում մահացածներ
- Փանոս Թերլեմեզյանի անվան գեղարվեստի պետական քոլեջի շրջանավարտներ
- Ռուսաստանի Դաշնության վաստակավոր նկարիչներ
- Անձինք այբբենական կարգով
- Քանդակագործներ այբբենական կարգով
- Հայ քանդակագործներ
- 20-րդ դարի քանդակագործներ
- Խորհրդային քանդակագործներ