Խորեոգրաֆիայի պետական թատրոն
 | |
|---|---|
| Տեսակ | թատրոն |
| Երկիր |  Հայաստան |
| Գտնվելու վայրը | Երևան |
| Հիմնադրման ամսաթիվ | մարտի 1, 1997 |
Խորեոգրաֆիայի պետական թատրոն, Հայաստանի մշակույթի նախարարության ենթակայության տակ գործող ՊՈԱԿ (պետական ոչ առևտրային կազմակերպություն)[1]։ Հիմնադրվել է 1997 թ. մարտի 1-ին՝ հայկական ազգային, դասական պարարվեստի ավանդույթները պահպանելու, ժամանակակից պարարվեստը Հայաստանում ներմուծելու և զարգացնելու նպատակով։ Թատրոնի գեղարվեստական ղեկավար է նշանակվել անվանի պարուսույց, ՌՍՖՍՀ ժողովրդական արտիստ Մաքսիմ Սահակի Մարտիրոսյանը։
Գործունեություն[խմբագրել | խմբագրել կոդը]
Թատրոնի նպատակն է հանդիսանալ միջնաբեմ պարարվեստի ուսումնարանի սաների համար դեպի Ալ. Սպենդիարյանի անվան Օպերայի և բալետի ակադեմիական թատրոն։ Իր գործունեության ընթացքում թատրոնում բեմադրվել են մոնումենտալ ստեղծագործություններ, ինչպիսիք են «Սբ. Հռիփսիմե և Տրդատ», «Նարեկացի. Ձայն առ Աստված», «Ա. Խաչատրյանի ջութակի կոնցերտ» գործերը։ Վերը նշվածից զատ թատրոնն իր գերխնդիրն է համարել մատաղ և երիտասարդ սերնդի դաստիարակությունը՝ թելադրելով ճաշակ դեպի բարձր արվեստ, սերմանելով սեր դեպի ազգային երաժշտություն և պարարվեստ։ 2005 թվականին բեմադրվեցին «Մոխրոտը», «Բարբի», «Էտյուդներ», «Կարմիր գլխարկ» մանկական ստեղծագործությունները։ 2010 թվականի մարտ ամսից թատրոնի տնօրեն նշանակվեց Գայանե Կարապետյանը, որը սեփական միջոցներով և թատրոնի կոլեկտիվի աջակցությամբ հիմնովին վերանորոգեց տարածքը, ստեղծելով նորմալ աշխատանքային պայմաններ, որն էլ տվեց իր արդյունքը։ Կազմավորվեց նոր ստեղծագործական խումբ, թատրոն հրավիրվեցին տաղանդաշատ բեմադրիչներ, երաժիշտներ և դերասաններ, ինչպես նաև երիտասարդ պարուսույցներ և պարողներ։ Թատրոնը որդեգրեց նոր ուղղվածություն, համադրելով պարային, դրամատիկ, երաժշտական ժանրերը։ Արդյունքում բեմադրվեց Քիփլինգի «Մաուգլի» պիեսը՝ բեմադրությունը արվեստի վաստակավոր գործիչ Ռաֆայել Գրիգորյան, երաժշտական հենքը՝ Բամբիռ համույթի՝ գեղարվեստական ղեկավար Գագիկ Բարսեղյան։ 2012 թ. «Մաուգլին» ՀՀ մշակույթի նախարարության կողմից ճանաչվեց տարվա ձեռքբերում։ Այժմ վերականգնվում է «Մաուգլի» ներկայացումը, քանի որ պարախմբի 8 տղաները մեկնել են զինվորական ծառայության։
Միջազգային համագործակցություն[խմբագրել | խմբագրել կոդը]
Ջանի Ռոդարիի «Չիպոլինո», Իվան Կռիլովի «Ճպուռն ու մրջյունը»[2][3], «Մանկական հեքիաթներ», «Այսիդորա Դունկան», «Հեքիաթ չար կուզիկի և մանուկի մասին», «Չարի վերջը», «Մոխրոտը» և բազմաթիվ այլ ներկայացումներով թատրոնը հանդես է եկել ՀՀ տարբեր մարզերում[4], ինչպես նաև ՌԴ-ում, Կանադայում, Վրաստանում, Ուկրաինայում՝ նպաստելով արվեստի և մշակույթի զարգացմանը։
Ծանոթագրություններ[խմբագրել | խմբագրել կոդը]
- ↑ «ՀՀ մշակույթի նախարարության ենթակայության թատրոններում մանուկների համար նախատեսված են մի շարք ներկայացումներ - Media-inform.com». Վերցված է 2017 թ․ հունիսի 4-ին.(չաշխատող հղում)
- ↑ One, Studio. ««Ճպուռն ու մրջյունը»` խորեոգրաֆիայի պետական թատրոնի ներկայացմամբ». www.yerkir.am. Արխիվացված է օրիգինալից 2015 թ․ օգոստոսի 5-ին. Վերցված է 2017 թ․ հունիսի 4-ին.
- ↑ «Խորեոգրաֆիայի պետական թատրոնը կներկայացնի «Ճպուռն ու մրջյունը» մանկական երաժշտական հեքիաթը». armenpress.am. Վերցված է 2017 թ․ հունիսի 4-ին.
- ↑ «Խորեոգրաֆիայի պետական թատրոնը հանդես է եկել սահմանամերձ բնակավայրերում». Culture.AM. 2017 թ․ հունիսի 1. Արխիվացված է օրիգինալից 2017 թ․ հունիսի 4-ին. Վերցված է 2017 թ․ հունիսի 4-ին.