Շվեյցարիայի ականազերծման գործունեության հիմնադրամ
| Շվեյցարիայի ականազերծման գործունեության հիմնադրամ | |
|---|---|
 | |
| Տեսակ | հասարակական կազմակերպություն |
| Հիմնադրված | 1997 |
| Գլխադասային գրասենյակ | Ժնև, Շվեյցարիա |
| Կայք | fsd.ch |
Շվեյցարիայի ականազերծման գործունեության հիմնադրամ (ֆր.՝ Fondation Suisse de Déminage, հակիրճ՝ FSD), մարդասիրական հասարակական կազմակերպություն, որը հիմնադրվել է 1997 թվականին Ժնևում։ Շվեյցարական «Ականազերծման գործունեության հիմնադրամը» մասնագիտացած է պատերազմի այնպիսի վտանգավոր հետևանքների վերացման մեջ, ինչպիսիք են ականները, չպայթած հրետանային և տանկային արկերը, օդային ռումբերը և ցանկացած տեսակի չպայթած ռազմական զինամթերք։ ՇԱԳՀ-ն չի համարվում քաղաքական, կրոնական կամ կառավարական կազմակերպություն։
2005 թվականին ստեղծվել է FSD Ֆրանսիա ասոցիացիան[1], որը Ֆրանսիայում հիմնված լիովին անկախ կազմակերպություն է, սակայն, FSD-ին փոխկապակցված կազմակերպություն է։ 2007 թվականին ստեղծվել է Crosstech[2], որը Շվեյցարիայում FSD-ի առևտրային դուստր ձեռնարկությունն է և ամբողջությամբ պատկանում է նրան։ 2003 թվականին կազմակերպությունը ստացել է ZEWO հավաստագիր[3]։
Նպատակ[խմբագրել | խմբագրել կոդը]
Շվեյցարական «Ականազերծման գործունեության հիմնադրամի» հիմնական նպատակը ականների և չպայթած զինամթերքի որոնումն ու ոչնչացումն է[4]՝ դժբախտ պատահարները կանխելու համար։ ՇԱԳՀ-ի հիմնական նպատակն է մեղմել և նվազեցնել ականների և չպայթած զինամթերքի սոցիալական, տնտեսական և բնապահպանական ազդեցությունները՝ այդպիսով ստեղծել բարենպաստ պայմաններ ռազմական հակամարտություններից տուժած երկրների վերակառուցման և զարգացման համար։
Ռազմական հակամարտությունների ժամանակ[խմբագրել | խմբագրել կոդը]
Մարդասիրական օգնությունը հաճախ համարվում է միակ «կյանքի ճանապարհը» հազարավոր մարդկանց համար, ովքեր պայքարում են գոյատևելու համար։ Մարդասիրական օգնության մասնագիտացված առաքումները, շահառուների հասանելիությունը և մարդասիրական կազմակերպությունների ու նրանց աշխատողների անվտանգությունը «կյանքի ճանապարհի» հիմնական բաղադրիչներն են։ ՇԱԳՀ-ն տրամադրում է մասնագիտական գիտելիքներ, փորձ և օգնություն գործընկեր կազմակերպություններին և այլ մարդասիրական կազմակերպություններին մարդասիրական արտակարգ իրավիճակներում մարդասիրական օգնություն ցուցաբերելու համար։
Զինված հակամարտություններից հետո անցման և վերականգնման ժամանակաշրջանում[խմբագրել | խմբագրել կոդը]
Բռնի հակամարտությունից դուրս եկած կառավարությունների և ոչ պետական կառույցների առաջնահերթությունը վստահության ձևավորումն է և կայուն վիճակում խաղաղության պահպանումը։ Սա նշանակում է, որ պետական կառույցները և սոցիալական հաստատությունները պետք է հայրենադարձեն փախստականներին և մարդասիրական օգնություն ցուցաբերեն նաև նախկին հակամարտության գոտիներում։
Ականները և պատերազմի այլ պայթունավտանգ մնացորդները (ՊՊՄ) հաճախ խոչընդոտում են պետական պաշտոնյաների, քաղաքական գործիչների, վերադարձողների, օգնության և զարգացման գործակալությունների անձնակազմի տեղաշարժը։ Ականները խոչընդոտում են հետպատերազմյան խաղաղ շինարարության ընթացքը և այդպիսով խորացնում բռնի հակամարտությունների վերադարձի վտանգը։
Համապետական ընտրությունները հետկոնֆլիկտային երկրներում հաշտեցման ևս մեկ կարևոր գործոն են։ Կառավարություններին անհրաժեշտ է օրենքի գերակայություն, և նրանք ցանկանում են, որ հնարավորինս շատ ընտրողներ լինեն ընտրատեղամասերում։ Շատ ընտրողներ, սակայն, կարող են քվեարկել միայն այն դեպքում, եթե նրանք ապահով մուտք ունեն ընտրատեղամասեր։
Տնտեսական զարգացման ընթացքում[խմբագրել | խմբագրել կոդը]
Ականները և պատերազմի այլ պայթունավտանգ մնացորդները շարունակում են սպառնալ, խեղել և սպանել ռազմական գործողությունների ավարտից բավականին ժամանակ անց։ Ականները խոչընդոտում են հետկոնֆլիկտային վերակառուցմանը և տնտեսական զարգացմանը։ Ականազերծումը պետք է իրականացվի նախքան դաշտերը հերկելը և դպրոցներ կառուցելը խմելու ջրի հասանելիություն ապահովելը։
Երկրներ, որտեղ գործում է ՇԱԳՀ-ն[խմբագրել | խմբագրել կոդը]
1998-2002 թվականներին ՇԱԳՀ-ն աշխատանքային գործունեություն է իրականացնում 21 երկրներում և ներկայումս ամբողջ աշխարհում ներգրավված է վեց ծրագրերում (Բոսնիա և Հերցեգովինա, Հայաստան, Տաջիկստան, Շրի Լանկա, Պակիստան, Աֆղանստան, Սուդան և Ֆիլիպիններ, Ալբանիա, Կոսովո, Խորվաթիա, Լիբանան)։ 2001 թվականից ՇԱԳՀ-ն համարվում է Պարենի համաշխարհային ծրագրի (ՊՀԾ) ռեզերվային գործընկերը և համատեղ գործունեություն է ծավալում։
ՇԱԳՀ-ն Ֆրանսիայում[խմբագրել | խմբագրել կոդը]
2005 թվականին Շվեյցարական ականազերծման հիմնադրամին է միացել նրա ֆրանսիացի գործընկերը՝ ՇԱԳՀ Ֆրանսիան։ ՇԱԳՀ Ֆրանսիան անկախ, չեզոք կազմակերպություն է, որը հիմնադրվել է 1901 թվականի Ֆրանսիայի «Հասարակական միավորումների մասին» օրենքի հիման վրա։ Այդ նոր կազմակերպության նպատակն է ընդլայնել ՇԱԳՀ-ի մարդասիրական ականազերծման գործունեությունը այլ ոլորտներում, ինչպիսիք են ականային վտանգի մասին տեղեկատվությունը (ԱՎՏ) և ականներից զոհվածներին օգնությունը։ Ինչպես նաև Եվրոպական հանձնաժողովի մանդատի շրջանակներում նախագծերի իրականացումը և ականազերծման գործողությունների խթանումը ֆրանսիական հատվածում։
Ֆինանսավորման աղբյուրներ[խմբագրել | խմբագրել կոդը]
Ֆինանսավորման հիմնական աղբյուրները պետական և մասնավոր հիմնադրամներն են, ինչպես նաև բազմաթիվ կազմակերպություններ։ Սուդանում ծրագրին աջակցում են ՄԱԿ-ի ականազերծման գործողությունների կազմակերպությունը և CHF International-ը։ 2007 թվականին ՄՕԵՀ-ն (Մարդասիրական օգնության եվրոպական հանձնաժողովը) ֆինանսավորել է ՇԱԳՀ նախագիծը՝ Հարավային Լիբանանում կասետային ռումբերը մաքրելու համար։ Մյուս խոշոր դոնորներից են Պարենի համաշխարհային ծրագիրը, ՄԱԿ-ի Ականազերծման ծառայությունների գրասենյակը, ՄԱԿ-ի Ականազերծման ծառայությունը, ՄԱԿ-ի զարգացման ծրագիրը, Եվրոպայի անվտանգության և համագործակցության կազմակերպությունը, Ավստրալիայի, Միացյալ Նահանգների, Կանադայի, Ճապոնիայի, Շվեյցարիայի, Գերմանիայի, Ավստրիայի, Թայվանի և Հարավային Կորեայի կառավարությունները, Շվեյցարիայի կանտոնները և քաղաքները, հիմնադրամները և մասնավոր հովանավորները։
Հիմնադրամը իր որակական հատկանիշներով համապատասխանում է շվեյցարական օրենսդրությանը։ ՇԱԳՀ-ն գործում է Շվեյցարիայի դաշնային իշխանությունների հսկողության ներքո։ Հաշվապահական հաշվետվությունների աուդիտը իրականացնում է աշխարհահռչակ KPMG աուդիտորական ընկերությունը, որն այդ հարցերով զբաղվում է 2007 թվականից։ Մինչ այդ աուդիտորական ստուգումներն իրականացրել է PricewaterhouseCoopers ընկերությունը։
Ծանոթագրություններ[խմբագրել | խմբագրել կոդը]
- ↑ L'Association Արխիվացված 2023-02-01 Wayback Machine (in French). FSD France. Accessed August 2022.
- ↑ Crosstech: Who we are. Crosstech. Accessed August 2022.
- ↑ «L'Organisation Fondation Suisse de Déminage (FSD) est certifiée Zewo depuis 2003».
- ↑ «Mine action». Արխիվացված է օրիգինալից 2021 թ․ հուլիսի 22-ին. Վերցված է 2023 թ․ փետրվարի 1-ին.
 | Վիքիպահեստն ունի նյութեր, որոնք վերաբերում են «Շվեյցարիայի ականազերծման գործունեության հիմնադրամ» հոդվածին։ |
