Մասնակից:MariamMxitaryan/Ավազարկղ
Աչքի ֆարմակոլոգիա[խմբագրել | խմբագրել կոդը]
Աչքի ֆարմակոլոգիան զբաղվում է ակնաբուժական խանգարումների բուժումով՝ դեղորայք ընդունելու կամ համակարգային եղանակով: Եզակի է նրանով, որ ակնաբուժության համար նախատեսված դեղամիջոցներից շատերը, հատկապես նրանք, որոնք իջեցնում են ներակնային ճնշումը, նախատեսված են եղջերաթաղանթի և աչքի այլ հյուսվածքների, ներակնային հեղուկի մեջ ներծծվելու համար: Վերջինս թափանցիկ հեղուկ է, որը սննդարար նյութեր և դեղամիջոցներ է փոխանցում աչքին, ոչ թե անոթային հյուսվածքներին: Օգտագործելուց հետո աչքի դեղամիջոցները դուրս են գալիս աչքից, մտնում արյան շրջանառություն և տեղափոխվում լյարդ, որտեղ տեղի է ունենում նյութափոխանակություն: Դեղամիջոցի մետաբոլիտները այնուհետև արտազատվում են օրգանիզմից՝ մեզի կամ կղանքի միջոցով: Սակայն դեղորայքի նշանակումից առաջ կարևոր է հաշվի առնել դրա կլանումը աչքի տարբեր կառուցվածքների կողմից, դեղերի նյութափոխանակությունը և հնարավոր վտանգները օրգանիզմ ներթափանցելուց հետո, քանի որ կարող են առաջացնել թունավորումներ։
Գլաուկոմայի ֆարմակոլոգիա[խմբագրել | խմբագրել կոդը]
Գլաուկոման աչքի հիվանդություն է, որի ընթացքում տեսողական նյարդը, որը կապում է աչքը ուղեղին, վնասվում է։ Սովորաբար առաջանում է աչքի առջևի մասում հեղուկ կուտակվելու պատճառով, որը մեծացնում է ներակնային ճնշումը։ Գլաուկոման կարող է հանգեցնել տեսողության մշտական կորստի վաղաժամ չախտորոշվելու և չբուժվելու դեպքում։ Կարող է ախտահարել բոլոր տարիքի մարդկանց, սակայն առավել հաճախ հանդիպում է 70-80 տարեկան անձանց մոտ։
Ներակնային հեղուկն արտադրվում է թարթչային ելունների կողմից հետին խցիկում։ Արտադրված հեղուկը հոսում է բբի միջով դեպի առաջնային խցիկ: Այստեղից տրաբեկուլյար ապարատը դրենավորում է հեղուկը սկլերալ երակային ծոցով դեպի սկլերալ ելուն, ապա ընդհանուր շրջանառություն: Կան գլաուկոմայի մի քանի տեսակներ։ Ամենատարածված տեսակը բացանկյուն գլաուկոման է, որի ընթացքում ներակնային հեղուկի արտահոսքը կրճատվում է տրաբեկուլյար ապարատի դեգեներացիայի և խցանման պատճառով, որի գործառույթը հեղուկի ներծծումն էր: Ներակնային հեղուկի արտահոսքի նվազումը բերում է քրոնիկական, անցավ ներակնային ճնշման առաջացման։ Փականկյուն գլաուկոմայի ժամանակ ծիածանաթաղանթի և եղջերաթաղանթի միջև գտնվող դրենաժային տարածությունը դառնում է չափազանց նեղ։ Հետին խցիկի հեղուկը չի կարողանում անցնել դեպի առաջնային խցիկ։ Ներակնային հեղուկի կուտակումն առաջացնում է սուր ներակնային ճնշման բարձրացում, որն ուղեկցվում է ցավով։ Ավելի քիչ տարածված տեսակներից է երկրորդային գլաուկոման, որն առաջանում է, երբ մեկ այլ պայման, օրինակ՝ կատարակտը կամ շաքարախտը, դառնում են ներակնային ճնշման բարձրացման պատճառ։ Նորմալ լարվածության գլաուկոման առաջանում է, երբ տեսողական նյարդը վնասված է, սակայն ներակնային ճնշումը շարունակում է մնալ նորմայի սահմաններում։ Պիգմենտային գլաուկոմայի ընթացքում պիգմենտի փոքր կտորները ծիածանաթաղանթից մտնում են ներակնային հեղուկ և խցանում են դրենաժային տարածությունը։ Բոլոր տեսակի գլաուկոմաների վերջին փուլը բացարձակ գլաուկոման է, որի ժամանակ աչքը զրկված է լինում տեսողությունից, բացակայում է բբերի լուսային ռեֆլեքսը։ Հիվանդը գանգատվում է աչքի խիստ ցավից։
Պատճառներ[խմբագրել | խմբագրել կոդը]
Գլաուկոմայի առաջացման պատճառները մի քանիսն են։ Գլաուկոմայի առաջացման վտանգը մեծանում է տարիքի հետ զուգընթաց։ Մյուս պատճառը էթնիկ պատկանելիությունն է, քանի որ աֆրիկյան, կարիբյան ու ասիական ծագում ունեցող մարդիկ ավելի բարձր ռիսկի գոտում են։ Հիմնական պատճառը գենետիկական փոխանցումն է և տարբեր գեների մուտացիաները։ Երկրորդային գլաուկոմայի դեպքում մեկ այլ հիվանդություն, վնասվածք, դեղամիջոց կամ միջամտություն առաջացնում են աչքի ճնշման բարձրացում, ինչը հանգեցնում է տեսողակայն նյարդի վնասման և տեսողության կորստի։ Առաջանում է դիաբետիկ ռետինոպաթիայի, ցանցաթաղանթի կենտրոնական երակի խցանման, աչքի վնասվածքների, անոթաթաղաթի միջին շերտի բորբոքման, կատարակտի պատճառով, քանի որ դրանք խիստ սահմանափակում են ներակնային հեղուկի արտահոսքը։ Վիտամին D-ի անբավարարությունը դեռ մնում է հիվանդության պատճառների վարկածներից մեկը, հետևաբար վիտամին D-ի ընդունումը արդյունավետ չէ գլաուկոմայի բուժման համար։ Կաֆեինը կարող է մեծացնել ներակնային ճնշումը, սակայն ոչ մի ազդեցություն չի ունենում առողջ մարդկանց վրա։
Ախտանիշներ[խմբագրել | խմբագրել կոդը]
Բացանկյուն գլաուկոման անցավ է, ուստի կարևոր է անցկացնել աչքի կանոնավոր ստուգումներ հիվանդությունը հայտնաբերելու համար։ Հնարավոր ախտանիշներ կարող են լինել տեսողության աստիճանաբար կորուստը և տեսողական նյարդի փոփոխությունները, որոնք կարող են հայտնաբերվել ակնագնդի հետազոտման ժամանակ։ Փականկյուն գլաուկոմայի դեպքում ունենում են աչքի միջային շրջանի ցավ, աչքերի արտահայտված կարմրածություն, անտանելի գլխացավեր, սրտխառնոց, փսխում, տեսողության կտրուկ վատացում, շատ բարձր ներակնային ճնշում։
Ախտորոշում[խմբագրել | խմբագրել կոդը]
Գլաուկոմայի սկրինինգն իրականացվում է ակնաբույժի կողմից ատանդարտ ակնային հետազոտությամբ։ Սկզբում ստուգում են ընդհանուր տեսողությունը, ապա կաթիլների միջոցով լայնացնում են բբերը և անցկացնում են զննում։ Հետազոտությունը ներառում է տոնոմետրիան կամ ներակնային ճնշման չափումը, գոնիոկոպիան կամ առաջնային խցիկի հետազոտությունը և տեսողակայն նյարդի հետազոտում՝ հնարավոր փոփոխությունները հայտնաբերելու համար։ Հետազոտության ժամանակ ուշադրություն են դարձնում նաև հետազոտվողի սեռին, ռասսային, դեղորայքի օգտագործման պատմությանը, գենետիկային։
Բուժում[խմբագրել | խմբագրել կոդը]
Վաղ շրջանում դեղորայքի, լազերային կամ վիրահատական մեթոդներով բուժումը հնարավորություն է տալիս դադարեցնել կամ դանդաղեցնել հիվանդության հարաճումը։ Բուժման նպատակներն են խուսափել նյարդերի վնասումից, ինչպես նաև պահպանել տեսողությունը և հիվանդի կյանքի ընդհանուր որակը՝ նվազագույն կողմնակի ազդեցություններով։ Տարբեր դեղաբանական և վիրաբուժական միջոցներով ներակնային ճնշումը իջեցնելը հանդիսանում է բուժման հիմքը։
Դեղորայքային[խմբագրել | խմբագրել կոդը]
Ներակնային ճնշումը կարելի է իջեցնել դեղորայքով, սովորաբար աչքի կաթիլներով։ Դեղերը կարող են ունենալ կողմնակի ազդեցություններ, որոնց առաջացման դեպքում հիվանդը պետք է պատրաստ լինի հանդուրժելու դրանք կամ բժշկի հետ բուժումը վերանայելու։ Կաթիլների կիրառման դեպքում կարող է առաջանալ թարթիչների աճ և կոպերի հիպերպիգմենտացիա։ Կարող է նշանակվել նաև խմելու համար նախատեսված դեղորայք, որոնցից են բետա-ադրենոպաշարիչները կամ կարբոանհիդրազիինհիբիտորները, որոնք բարելավում են ակնային հեղուկի հեռացումը կամ դանդաղեցնում են ներակնային հեղուկի առաջացումը։ Կան մի շարք դեղերի խմբեր, որոնք կիրառվում են գլաուկոմայի բուժման համար։ Դրանք են.
- Պրոստոգլանդինների ագոնիստներ, ինչպիսիք են` latanoprost, bimatoprost, travoprost դեղերը։ Սրանք բարձրացնում են ներակնային հեղուկի արտահոսքը, իսկ Bimatoprost-ը նաև մեծացնում է տրաբեկուլյար արտահոսքը։ Tafluprost-ը պրոստագլանդինի անալոգ է առանց կոնսերվանտների: Կախված անհատից և դեղորայքի ապրանքանիշից կարող է լինել ավելի արդյունավետ և ավելի քիչ կողմնակի ազդեցություններ առաջացնել։ Պրոստագլանդինի անալոգներն ընդունում են աչքի կաթիլների տեսքով (բացառությամբ Durysta™-ի, որը իմպլանտ է): Դեղաչափի ընդունման օպտիմալ ռեժիմը օրական մեկ կաթիլ 50միկրոգ/մլ-ից, որը նվազեցնում է ներակնային ճնշումը 30 տոկոսով։ Հիմնական կողմնակի ազդեցությունը ծիածանաթաղանթի պիգմենտացիայի ավելացումն է, որը պայմանավորված է ծիածանաթաղանթի ստրոմայի մելանոցիտներում մելանինի սինթեզի ավելացմամբ։ Առավել հաճախ հանդիպում է կանաչ կամ շագանակագույն աչքեր ունեցող մարդկանց մոտ։ Մյուս կողմնակի ազդցեություններից են թարթիչների աճը, կոպերի մաշկի մգացումը, աչքերի կարմրությունը, քորը, կոպերի անկառավարելի թարթումը։
- Բետտա-ադրենապաշարիչներ, ինչպիսիք են timolol-ը, levobunolol-ը և betaxolol-ը։ Նվազեցնում են ներակնային հեղուկի քանակը՝ հանդես գալով որպես ադրենոընկալիչների ինհիբիտորներ։ Պաշարելով թարթչային մարմնի էպիթելի ադրենոընկալիչները՝ բետա-ադրենապաշարիչները կարող են կանխել բջջի այն ազդանշանը, որը ստիպում է արտադրել ավելի շատ ներակնային հեղուկ։ Արդյունքում նվազում է ներակնային ճնշումը։ Ուսումնասիրությունները ցույց են տվել, որ այս դեղամիջոցների սիստեմատիկ օգտագործումը իջեցնում է ներակնային ճնշումը 25 տոկոսով։ Timolol-ը ամենաշատ նշանակվող բետա-ադրենապաշարիչն է, քանի որ արդյունավետ է, մատչելի և չի պարունակում կոնսերվատներ։ Այլընտրանքային տարբերակ է Լevobunolol-ը, որը կարելի է կիրառել օրական մեկ անգամ, քանի որ կողմնակի ազդեցությունների մեծ հավանականություն ունի։ Սրտային կամ շնչառական հիվանդությունների դեպքում խորհուրդ է տրվում օգտագործել Betaxolol, չնայած նրան, որ ավելի քիչ արդյունավետ է։ Կողմնակի ազդեցություններից են ցածր արյան ճնշումը, անոթազարկի հաճախության նվազումը, հոգնածությունը, ընդհանուր թուլությունը, գլխացավը, գլխապտույտը, դիաբետիկների դեպքում արյան գլյուկոզի փոփոխությունները, աչքի ալերգիան կամ գրգռվածությունը, կարող են առաջացնել շնչահեղձություն այն մարդկանց մոտ, որոնք ունեն ասթմա կամ շնչառական այլ խանգարումներ։ Բացի դրանից կարող է հանգեցնել սրտի գործունեության խանգարման, ֆիզիկական ակտիվության ընթացքում սրտի աշխատանքը դանդաղում է, որը պայմանավորված է սրտի կողմից օրգանիզմ մղվող արյան քիչ քանակությամբ։ Ավելի քիչ հանդիպող կողմնակի ազդեցություններ են լիբիդոյի նվազեցումը և դեպրեսիան։
- Ալֆա-2 ադրենոմիմետիկներ, ինչպիսիք են brimonidine-ը և apraclonidine-ը։ Այս խմբի դեղերը նվազեցնում են ներակնային հեղուկի արտադրությունն ու ավելացնում են արտահոսքը։ Apraclonidine-ը կանխում է նորադրենալինի արտազատումը աչքի նյարդային տերմինալներոմ։ Արդյունքում նվազում է ներակնային հեղուկի արտադրությունը, մեծանում է դրենաժը, և նվազում է ներակնային ճնշումը։ Օգտագործվում է ակնաբուժական լազերային թերապիայից հետո սուր ներակնային ճնշման բարձրացումը կանխելու կամ բթացնելու համար։ Խորհուրդ չի տրվում երկարատև օգտագործումը, քանի որ ունի մի շարք կողմնակի ազդեցություններ։ Brimonidine-ը նվազեցնում է ներակնային հեղուկի սեկրեցիան: Օգտագործվում է գլաուկոմայի ինչպես սկզբնական շրջանում այնպես էլ երկարաժամկետ բուժման համար։ Կողմնակի ազդեցություններն այս դեղորայքի դեպքում ավելի քիչ են արտահայտվում, քանի որ ունի ալֆա-2 ընտրողականություն։ Ունի նեյրոպաշտպանիչ, հիպոտենզիվ ազդեցություններ։ Այն ազդեցություն չի ունենում սիրտ-թոքային համակարգի վրա։ Հիմնականում խորհուրդ է տրվում օգտագործել այն անձանց, որոնք ունեն բետա-ադրենապաշարիչների հակացուցումներ։ Այս դասին պատկանող դեղերի հիմնական կողմնակի ազդեցություններից են այրվածքի, խայթոցի զգացումը, մշուշոտ տեսողությունը, կոնյուկտիվային անոթների սպիտակեցումը, բերանի չորությունը, գլխացավը, հոգնածությունը, քնկոտությունը։ Որոշ դեպքերում կարող են առաջանալ նաև արյան ճնշման և անոթազարկի նվազում։ Հակացուցված են մոնոամին օքսիդազի ինհիբիտորների ընդունող հիվանդներին, ծայրահեղ ծանր սրտանոթային հիվանդություններ ունեցող անձանց, փոքր երեխաներին։
- Ալֆա-ագոնիստներ, ինչպիսին է epinephrine-ը։ Նվազեցնում են ներակնային հեղուկի արտադրությունը թարթչային մարմնի անոթների վազոկոնստրիկցիայի հաշվին։ Կիրառվում են բացանկյուն գլաուկոմայի բուժման համար, քանի որ էպինեֆրինն ունի միդրիատիկ (բբի լայնացում) ազդեցություն, փակում է տրաբեկուլյար ապարատը, որը պատասխանատու է ներծծման համար, հետևաբար հակացուցված է փականկյուն գլաուկոմայով հիվանդներին։ Խորհուրդ չի տրվում օգտագործել նրանց, որոնք ունեն ասթմա, շաքարային դիապետ, սիրտ-անոթային խնդիրներ, բարձր արյան ճնշում, վահանաձև գեղձի խանգարում, կատարակտի վիրահատություն։ Մնացած կողմնակի ազդեցությունները, որոնցից են մշուշոտ տեսողությունը, արցունքոտ աչքերը, աչքերի ցավը, գլխացավը կամ ցավը հոնքերի շրջանում, լուրջ չեն և կարող են վերանալ դեղամիջոցի ընդունումը դադարեցնելուց անմիջապես հետո։
- M-խոլինոմիմետիկներ, ինչպիսիք են pilokarpin-ը,echothiophate iodide-ը։ Pilokarpin-ը օգատգործվում է քրոնիկ բացանկյուն գլաուկոմայի և սուր փականկյուն գլաուկոմայի բուժման համար։ Այն ազդում է ծիածանաթաղանթի սֆինկտերի մուսկարինային ընկալիչների վրա՝ առաջացնելով մկանների կծկում, բբի նեղացում։ Առաջացնում է նաև թարթչային մարմնի կծկում, որի միջոցով մեծանում է լարվածությունը սկլերալ ելունի վրաև բացվում է տրաբեկուլյար ցանցը։ Սրա միջոցով հեշտանում է ներակնային հեղուկի արտահոսքը աչքից և նվազում է ներակնային ճնշումը։ Կողմնակի ազդեցություններից են թքարտադրությունը, քրտնարտադրությունը, բրոնխիալ ասթման, բրոնխակծկանքը, փորլուծությունը, միոզը, գլխացավը։ Echothiophate iodide-ը, որն ացետիլխոլինէսթերազի արգելակիչ է, օգագործվում է քրոնիկական գլաուկոմայի ժամանակ։ Այն փոքրացնում է բիբը, ազդում է աչքի մկանների վրա, որի միջոցով նվազում է ներակնային հեղուկի քանակը և նվազում է ներակնային ճնշումը։ Կողմնակի ազդեցություններից է աչքի ժամանակավոր գրգռումը, խայթոցը, տեսողության մշուշումը, կոպերի մկանների կծկումը, թույլ լուսավորության դեպքում վատ տեսողությունը, գլխացավը, ցավը հոնքերի շրջանում։
- Կարբոանհիդրազի արգելակիչները, ինչպիսիք են dorzolamide-ը, brinzolamide-ը, acetazolamide-ը։ Նվազեցնում են ներակնային հեղուկի արտադրությունը՝ ընկճելով կարբոանհիդրազը թարթչային մարմնում։ Ներակնային հեղուկի արտազատումը կախված է բիկարբոնատի արտադրությունից, որը գտնվում է թարթչավոր մարմնի ոչ պիգմենտային էպիթելում։ Կարբոանհիդրազի արգելակիչները տեղային հյուսվածքներում նվազեցնում են բիկարբոնատ իոնների ձևավորումը՝ նվազեցնելով հեղուկի տեղափոխումը։ Acetazolamide-ը առաջին սերնդի կարբոանհիդրազի արգելակիչներից է և հաճախ օգատոգծվում է երկարաժամկետ գլաուկոմայի բուժման համար։ Այն ունի նվազագույն կողմնակի ազդեցություններ։ Dorzolamide-ը և brinzolamide-ը ունեն ավելի ուժեղ ազդեցություն։ Քանի որ միանգամից ճեղքում են եղջերաթաղանթը և հասնում թարթչային մարմին, հաճախ օգատգործվում են այլ դեղամիջոցների հետ միասին։ Այս խմբի դեղամիջոցների ունեն մի շարք լուրջ կողմնակի ազդեցություններ, որոնցից են թուլությունը, հոգնածությունը, դեպրեսիան, մետաղական համի զգացումը, սրտխառնոցը, լիբիդոյի նվազումը։
Վիրահատական միջամտություն[խմբագրել | խմբագրել կոդը]
Լազերային վիրահատության միջոցով բարձրացնում են ներակնային հեղուկի արտահոսքը բացանկյուն գլաուկոմայի դեպքում և դադարեցնում են հեղուկի խցանումը փականկյուն գլաուկոմայի դեպքում։ Միկրովիրահատության ընթացքում տրաբեկուլեկտոմիա կոչվող պրոցեդուրայով նոր ալիք են ստեղծում հեղուկը արտահոսելու և աչքի ճնշումը թուլացնելու համար։ Կարող է հանգեցնել արյունահոսության, վարակի կամ տեսողության կորստի։ Գլաուկոմայի բուժման վիրահատական մեթոդները հիմնականում կիրառում են այն դեպքում, երբ բուժման այլ մեթոդներն անարդյունավետ են։
Ամբլիոպիայի ֆարմակոլոգիա[խմբագրել | խմբագրել կոդը]
Տեսողության խանգարման տեսակ է, որի ընթացքում աչքն ու ուղեղը չեն համագործակցում միմյանց հետ։ Սովորաբար վնասվում է մեկ աչքը, սակայն կան նաև երկկողմանի ամբլիոպիայի դեպքեր։ Հիվանդության ընթացքում ուղեղը չի ընկալում տեղեկությունը մեկ աչքից, որի պատճառով ժամանակի ընթացքում ուղեղը փոխազդում է ավելի ուժեղ տեսողություն ունեցող աչքի հետ, որի ընթացքում ավելի ու ավելի է վատանում մյուս աչքի տեսողությունը։ Սկսվում է մանկությունից, այդ պատճառով երեխաների տեսողության կորստի ամենատարածված պատճառներից մեկն է։ Վաղաժամ բուժումը կանխում է տեսողության երկարատև խանգարումը։ Կան ամբլիոպիայի երեք հիմնական տեսակներ՝ ռեֆրակտիվ, ստրաբիզմային կամ շլությամբ պայմանավորված և կորուստային կամ օկլյուզիոն։ Ռեֆրակտիվ ամբիլոպիան պայմանավորված է չուղղված անիզոմետրիայով կամ երկու աչքերի միջև ռեֆրակցիոն զգալի տարբերությամբ՝ կարճատեսությամբ, հեռատեսությամբ, աստիգմատիզմով կամ երկու աչքերում գումարային ռեֆրակցիայի նշանակալի տարբերությամբ։ Գոյություն ունեն ռեֆրակցիոն ամբլիոպիայի երկու հիմնական տեսակ։ Անիզոմետրիկ ամբլիոպիան միակողմանի է, քանի որ առաջանում է յուրաքանչյուր աչքի հստակ ռեֆրակցիոն սխալի պատճառով։ Աչքը, որն ուղեղին ուղարկում է ավելի հստակ պատկեր, դառնում է դոմինանտ, իսկ մյուս աչքով պատկերը մշուշոտ է։ Իզոամետրոպիկ ամբիլոպիան առաջանում է, երբ երկու աչքերն էլ ամբլիոպիկ են։ Ստրաբիզմային ամբլիոպիան առաջանում է շեղվող աչքի ճնշումից։ Շլություն առաջանում է դոմինանտ աչքում և արդյունքում ուղեղում լինում է երկու աչքերից եկած ինֆորմացիայի տարբերություն։ Ուղեղը նեյրոպլաստիկ լինելու պատճառով հարմարվում է՝ ճնշելով աչքերից մեկից ստացած պատկերը։ Այս ամենը խոչընդոտում է ուղեղի նորմալ զարգացումը, որն էլ առաջացնում է ամբլիոպիա։ Կորուստային ամբլիոպիան առաջանում է վաղ տարիքում տեսողության կորստի կամ տեսողությունը խցանող հիվանդությունների պատճառով, ինչպիսին է բնածին կատարակտը, պտոզը։ Առաջանում է, երբ աչքի օպտիկական միջավայրը դառնում է անթափանցելի։ Պղտորումները արգելակում են լուսային ճառագայթի նորմալ թափանցումը՝ խանգարելով տեսողական ֆունկցիայի զարգացումը։ Պտոզի ընթացքում վերին կոպի մեխանիկորեն անկումը փակում է երեխայի տեսողության մի մասը, ինչն էլ բերում է արագ ամբլիոպիայի։
Պատճառներ[խմբագրել | խմբագրել կոդը]
Այն ամենը, ինչը խաթարում է երեխայի տեսողությունը կարող է հանգեցնել ամբլիոպիայի։ Դրանցից են՝ մկանային անհավասարակշռությունը, տեսողական մյուս խանգարումները, որոնցից են կարճատեսությունը, հեռատեսությունը, աստիգմատիզմը, կատարակտը։ Այս ամենը կարող է առաջանալ վաղաժամ ծնունդի, զարգացման խանգարումների պատճառով, ինչպես նաև կարող է փոխանցվել գենետիկորեն։
Ախտանիշներ[խմբագրել | խմբագրել կոդը]
Թույլ տեսակի դեպքում ախտանշաններ չեն արտահայտվում հիվանդի մոտ, քանի որ ուժեղ աչքի տեսողությունը բավարար է լինում տեսնելու համար։ Հետագայում ունենում են պատկերի թույլ ընկալողունակություն, դետալները տեսնելու ցածր կարողություն, տարածական աղավաղումներ, ուրվագծի խեղաթյուրված ընկալում։ Հիմնականում ունենում են թույլ բինօկուլյար տեսողություն, քանի որ այն պահանջում է երկու աչքերի և ուղեղի համագործակցված աշխատանք։ Ամբիլոպիայով հիվանդ երեխաները շատ են բախվում կոնկրետ մի կողմի իրերին, հիմնականում օգտագործում են մարմնի մի կողմը, ունենում են կախված կոպեր, մի կողմ թեքված գլուխ։
Ախտորոշում[խմբագրել | խմբագրել կոդը]
Վաղ ախտորոշումը մեծացնում է լիարժեք վերականգման հնարավորությունը։ Հիմնականում ախտորոշում են տեսողության մյուս խանգարումները բացառելու եղանակով։ Մանկահասակների մոտ դժվար է ախտորոշվում, բայց հնարավոր է գնահատել՝ հետևելով պացիենտի առարկաներին հետևելու ունակությանը մեկ բաց աչքով։ Բինօկուլյար սքանավորումը կարող է բացահայտել հիվանդությունը, եթե հիվանդի մոտ առկա է շլություն, միկրոշլություն կամ ֆիքսացիոն ունակության խանգարում։ Ամբլիոպիայի սկրինինգը խորհուրդ է տրվում իրականացնել 3-5 տարեկան անձանց շրջանում։
Բուժում[խմբագրել | խմբագրել կոդը]
Շատ կարևոր է հիվանդության վաղաժամ բուժումը, քանի որ կարող է հանգեցնել տեսողության լուրջ խնդիրների, որոնք շտկելի չեն։ Բուժումը ավելի քիչ արդյունավետ է մեծահասակների մոտ, քան երեխաների։ Ռեֆրակտիվ ամբլիոպիայի դեպքում ավելի շատ կենտրոնանում են այն խնդրի բուժման վրա, որը պատճառ է դարձել այս հիվանդության։ Բուժումը ներառում է օպտիկական ակնոցների կրումը կարճատեսության կամ հեռատեսության դեպքում կամ վիրահատական միջամտությունը կատարակտով հիվանդների դեպքում։ Հաջորդ բուժումը առողջ աչքի տեսողության ժամանակավոր թուլացումն է, որն իրականացնում են առողջ աչքի վրա դրվող հատուկ վիրակապերի կամ դեղամիջոցների միջոցով։ Այս ամենն իրականացնելու համար վիրակապի նման հարմարանքով փակում են առողջ աչքը և ուղեղը ստիպված է լինում օգտագործել հիվանդ աչքը։
Դեղորայքային բուժում[խմբագրել | խմբագրել կոդը]
Այլընտրանքային տարբերակ է դեղամիջոցների օգտագործումը։ Ատրոպինի օրական մեկ կաթիլը դոմինանտ աչքին թույլ է տալիս ժամանակավորապես պղտորել տեսողությունը։ Կաթիլները թուլացնում են աչքի թարթչավոր մկանը, քանի որ արգելակում են խոլինընկալիչները, ինչը բուժման ընթացքում մթագնում է առողջ աչքի տեսողությունը։ Կաթիլները նաև հանգըստացնում են աչքի այն մկանները, որոնք պատասխանատու են բբի մեծացման համար։ Արդյունքում նկատելի է դառնում բբի լայնացումներ օգտագործումից հետո։ Այս ամենը ստիպում է ուղեղին օգտագործել ավելի թույլ տեսողություն ունեցող աչքը։ Արդյունքում ամբլիոպիկ աչքը ուժեղանում է և որոշ ժամանակ անց հավասարվում է դոմինանտ աչքին։ Դեղորայքի օգտագործման ավարտից հետո մինչև 2 շաբաթ հիվանդը կարող է ունենալ մշուշոտ տեսողություն, լույսի նկատմամբ զգայունություն, որը պայմանավորված է բբի լայնացմամբ, աչքի կծկումներով։ Հազվադեպ հանդիպող հետևանքներից մեկը առողջ աչքի ամբլիոպիկ դառնալն է, սակայն դեղորայքի ճշգրիտ օգտագործման դեպքում հավանականությունը փոքր է։ Այլ կողմնակի ազդեցություններից են թեթև խայթոցը, աչքի կարմրությունը, ալերգիկ ռեակցիաները, ներակնային ճնշման բարձրացումը այն դեպքում, եթե աչքը նախկինում ունեցել է ճնշման խնդիր։ Երբ դեղամիջոցի քանակության մի մասը աչքից ներծծվում է օրգանիզմ կարող է լինել բերանի և մաշկի չորություն, այտերի կարմրություն, խնդիրներ քնի հետ, բարձր ջերմություն, փորկապություն, փսխում, սրտի զարկերի արագացում։ Նման հետևանքներից խուսափելու համար առաջարկվում է կաթիլները օգտագործելուց հետո մեկ րոպե սեղմած պահել կոպերի ներքին կողմի արցունքաբեր խողովակները։ Հակացուցված է օգտագործել սրտի խնդիրներ ունեցողներին կամ բարձր ջերմության ժամանակ։ Մի քանի շաբաթ անց նկատելի են փոփոխություններ, բայց վերականգնման համար պահանջվում են ամիսներ։
Աղբյուրներ[խմբագրել | խմբագրել կոդը]
- Human eye anatomy, Edward S. Perkins
- Eye Anatomy: Parts of the Eye and How We See, Kierstan Boyd, David Turbert
- Eye Anatomy, Exeter eye
- Chapter 64: Ocular Pharmacology, Jeffrey D. Henderer; Christopher J. Rapuano
- Overview-Glaucoma, NHS
- Glaucoma, Mayo Clinic Staff
- At a glance: Glaucoma, Natioanal eye institute
- Glaucoma, Cleveland clinic
- Glaucoma Medications and their Side Effects, SUNITA RADHAKRISHNAN, ANDREW G. IWACH
- Glaucoma drugs, Drugoffice
- Which Medicines Treat Glaucoma?, Whitney Seltman
- Glaucoma, Whitney Seltman
- Know all the types of amblyopia that exist and their most common causes, Elena Jurado González
- Types of Amblyopia, Rebecca Sands Braverman
- Lazy eye (amblyopia), Mayo Clinic Staff
- Lazy Eye (Amblyopia), Edward Kuwera
- All About Amblyopia, Stockdale optometry
- Pharmacological therapy for amblyopia, Taiwan J Ophthalmol
- Amblyopia (Lazy Eye), Cleveland clinic
- At a glance: Amblyopia, National eye institute
- Carbidopa-Levodopa - Uses, Side Effects, and More, WebMdRx
- Atropine treatment for Amblyopia, Eye hospital NHS
- Amblyopia: Atropine, John D. Ferris
- Treating amblyopia (‘lazy eye’) with atropine drops, The Ophthalmology Department in collaboration with the Child and Family Information Group.