Տարիֆա

Վիքիպեդիայից՝ ազատ հանրագիտարանից
Jump to navigation Jump to search
Տարիֆա
2009 Tarifa panorama-view of the town.jpg
ՏեսակԻսպանիայի մունիցիպալիտետ
ԵրկիրFlag of Spain.svg Իսպանիա
ՎարչատարածքԿադիս
ԲԾՄ7±1 մետր
Մակերես419,67 կմ²
Ջրլիցի ափինԱտլանտյան օվկիանոս և Միջերկրական ծով
Անվանված էTarif ibn Malik?
Կոորդինատներ: 36°0′55.10000010159″ հս․ լ. 5°36′20.40000010012″ ամ. ե. / 36.0153055555837724° հս․. լ. 5.6056666666944777° ավ. ե. / 36.0153055555837724; 5.6056666666944777
Mapa de Tarifa (Cádiz).svg

Տարիֆա (իսպ.՝ Tarifa), քաղաք և համայնք Իսպանիայի հարավում՝ Անդալուսիայի մաս հանդիսացող Կադիսի պրովինցիայի Կամպո դե Խիբրալթար շրջանում: Զբաղեցնում է 419 կմ² տարածք: Բնակչության թիվը 2010 թվականի տվյալներով եղել է 17 768 մարդ: Պրովինցիայի վարչական կենտրոնից՝ Կադիս քաղաքից հեռավորությունը 101 կիլոմետր է:

Պատմություն[խմբագրել | խմբագրել կոդը]

Ուսումնասիրողներից շատերի կարծիքով՝ Տարիֆայի տեղում ժամանակին եղել է հին հռոմեական Մելարիա բնակավայրը[1][2]: Տարիֆայի մերձակա Բոլոնիա գյուղի տեղում նույնպես հին հռոմեական բնակավայր է եղել՝ Բաելո Կլաուդիան, որի ավերակները պահպանվել են գյուղի մոտ: Իսկ Տարիֆան իր ներկայիս անվանումն ստացել է ի պատիվ արաբական Ումայադյան խալիֆայության զորահրամանատար Թարիֆ իբն Մալիքի[3], ով 710 թվականին գրոհել է այս բնակավայրը և համարվում է Իսպանիայի հողին ոտք դրած առաջին մահմեդականը[4]:

XI դարում բնակավայրը գտնվել է նախ՝ Ալխեսիրասի, այնուհետև՝ Սևիլյայի թայֆայում: 1292 թվականին Կաստիլիայի թագավոր Սանչո Չորրորդն ազատագրել է այն: 1296-ին մավրերը փորձել են գրոհով տիրանալ ամրոցին, բայց պաշտպանները, Մեդինա-Սիդոնիա ազնվականական տոհմի հիմնադիր Գուսման Բարիի հրամանատարությամբ, ետ են շպրտել նրանց: 1340 թվականին մավրերը Տարիֆան նվաճելու ևս մեկ փորձ են ձեռնարկել, սակայն դարձյալ անհաջողության են մատնվել:

XV—XVII դարերում Տարիֆայի տերերը Էնրիկեսների տոհմի մարկիզներն էին: 1810—11 թվականներին այդ բնակավայրը հայտնվել է իսպանա-ֆրանսիական պատերազմի թեժ մարտերի կենտրոնում:

Տեսարժան վայրեր[խմբագրել | խմբագրել կոդը]

Տարիֆայի միջնադարյան ամրոցը, որ կրում է Գուսմանի անունը, հիմնադրվել է դեռ Աբդ առ Ռահման Երրորդի օրոք և հետագայում վերակառուցվել: Նրա պարիսպներից՝ Ջիբրալթարի նեղուցի մյուս կողմում երևում են Մարոկկոյի լեռները:

Քաղաքի միջնադարյան երեք դարպասներից պահպանվել է միայն մեկը: Զբոսաշրջիկներին գրավում են նաև Կույս Մարիամի և Մատթեոս առաքյալի եկեղեցիները, որոնք կառուցվել են նախկին մզկիթների տեղում:

Անընդհատ փչող քամիների շնորհիվ Տարիֆայի ափամերձ ջրերում լավ պայմաններ են ստեղծված վինդսերֆինգով և օդապարուկային սերֆինգով զբաղվելու համար: Քաղաքում մինչև անգամ կա օդապարուկային պարապմունքներ կազմակերպող դպրոց:

Լաստանավային կանոնավոր հաղորդակցություն է կազմակերպվում Տարիֆայի և աֆրիկյան ափին գտնվոր Տանժեր նավահանգստի միջև: Սկսած 2004 թվականից՝ ամեն տարի Տարիֆայում անց է կացվում աֆրիկյան ֆիլմերի փառատոն:

Տարիֆայում է գտնվում մայրցամաքային Եվրոպայի ծայր հարավային կետը՝ Մարոկիի հրվանդանը: Քաղաքի մերձակայքում են հին հռոմեական Բաելո Կլաուդիա բնակավայրի ավերակները, Մոլինո դե Գվադալմեզի (Molino de Guadalmesi) ինտերնացիոնալ համայնքը, որը Global Ecovillage Network նախագծի մաս է կազմում[5]:

Գրականության մեջ[խմբագրել | խմբագրել կոդը]

Տարիֆա քաղաքը գեղարվեստորեն նկարագրված է անվանի գրող Պաուլո Կոելիոյի «Ալքիմիկոսը» վեպում, որը 1986 թվականին աշխարհում լայնորեն հրատարակված բեսթսելլերներից է:

Տես նաև[խմբագրել | խմբագրել կոդը]

Արևային ժամացույց Բաելո Կլաուդիայից

Ծանոթագրություններ[խմբագրել | խմբագրել կոդը]

  1. Gozalbes Cravioto Enrique (December 1996)։ «La ubicación de la Mellaria romana»։ Revista de Estudios Tarifeños VI (23 Fourth Quarter)։ Վերցված է 2013-03-20 
  2. Gozalbes Cravioto Enrique (1995)։ «Aspectos de la crisis del Bajo Imperio romano en la comarca del Campo de Gibraltar»։ Almoraima (Spanish) (13)։ ISSN 1133-5319։ Արխիվացված է օրիգինալից 19 January 2012-ին 
  3. Gibbon Edward (1776)։ The History of the Decline and Fall of the Roman Empire, vol. 9 
  4. Naturalis Historia, 3,7
  5. «Molino de Guadalmesí | GEN sites»։ sites.ecovillage.org։ Վերցված է 2016-05-11 

Պատկերասրահ[խմբագրել | խմբագրել կոդը]

Արտաքին հղումներ[խմբագրել | խմբագրել կոդը]

Wikivoyage has travel information related to: Tarifa