Գուրգեն Յանիկյան

Գուրգեն Յանիկյան

Ընդհանուր տեղեկություններ
Ի ծնե	Գուրգեն Յանիկյան
Ծնվել է	Դեկտեմբերի 24, 1895
Ծննդավայր	Էրզրում, Արևմտյան Հայաստան
Մահացել է	Մարտի 27, 1984
Վախճանի վայր	ԱՄՆ
Ազգություն	Հայ
Ժանր(եր)	ճարտարագիտություն, գրականություն
Գործունեություն	ճարտարագետ, գրող
Պորտալ Տեխնոլոգիա

Գուրգեն Յանիկյան (անգլերեն՝ Gourgen Yanikian, դեկտեմբերի 24, 1895, Էրզրում, Արևմտյան Հայաստան - մարտի 27, 1984, ԱՄՆ), հայ գրող և ճարտարագետ, հայկական նորագույն զինյալ ազատագրական պայքարի հերոս։

Կենսագրություն

Մեծ Եղեռնի ականատես։ Սովորել է Մոսկվայի համալսարանում, հետագայում հաստատվել ԱՄՆ-ում, որտեղ ճանաչման է հասել որպես անգլալեզու գրող, արժանացել «Մարկ Տվեն» մրցանակին։

1972 թվականին ԱՄՆ-ից այցելել է Հայաստանի Մարտիրոս Սարյանի անվան տուն-թանգարանը և նվիրաբերել է Սարյանի «Արևելյան սենյակ» նկարը (ստեղծված 1918 թ., 39x59 սմ, թուղթ, ջրաներկ, գուաշ), որը երկար տարիներ համարվում էր անհետ կորած։

77 տարեկան հասակում սպանել է ԱՄՆ-ում Թուրքիայի հյուպատոսին և փոխ-հյուպատոսին, արդարություն պահանջել Հայոց Ցեղասպանության համար: Դատարանում հանդես է եկել թուրքական ժխտողականության դեմ, պաշտպանել Արևմտյան Հայաստանի ազատագրության գաղափարը։

Դատապարտվել է ցմահ բանտարկության: 1981 թվականին, 8 տարվա բանտարկությունից հետո, Յանիկյանը տեղափոխվել է այցելուների համար փակ հիվանդանոց, որտեղ և մահացել է երկարատև հիվանդությունից հետո 1984 թվականի մարտի 27-ին։ 2019 թ. մայիսի 5-ին վերահուղարկավորվել է Եռաբլուր պանթեոնում:

Հայաստանի ազատագրության հայ գաղտնի բանակի հոգևոր հիմնադիրներից է։ «Ես գիտեի, որ անհատս մենակ մնալու չէի», - այդ առիթով ասել է ծերունի Յանիկյանը։

Բուլղարահայ բանաստեղծ Հովհաննես Պարսկունին Գ. Յանիկյանին նվիրված իր պոեմում գրել է.

Այսպես դու դարձար խորհուրդ մը խորին, Բանակի մ'Հայ մեծ կարապետն եղար՝ Վառելանյութով հորդ ու շանթածին, Խոսքով՝ կրակի, ու կոչով՝ պայքար։ - Հ Պարսկունի, Ասք՝ նոր ժամանակներու մեծագույն ուսուցիչ՝ Հերոս-ռահվիրա Գուրգեն Յանիկյանի մասին, Բ., 1990

Գրքեր

Անգլերեն

• The Triumph of Judas Iscariot, Los Angeles։ Research Publ. Co., 1950, 254 p.
• Harem Cross։ A Novel of the Near-East, New York։ Exposition, 1953, 223 p.
• The Resurrected Christ։ A Novel, New York։ Exposition, 1955, 141 p.
• The Voice of an American, 1960, Society for the Science of Living; 147 p., ASIN։ B0007FZ3L4
• Mirror in the Darkness, 1966, with Helen Rettig, New York։ Exposition, 1966, 197 p.

Հայերեն

• «Նպատակ և ճշմարտություն» (հուշեր բանտից), Երևան, Տիգրան Մեծի հր., 1999

Արտաքին հղումներ

• Կենսագրությունը և լուսանկարներ
• Հոդված «Ազգ» օրաթերթում Յանիկյանի մասին