Անահիտ Թարխանյան

Անահիտ Թարխանյան;
Ծնվել է	մարտի 5, 1959 (65 տարեկան)
Ծննդավայր	Երևան, ՀԽՍՀ, ԽՍՀՄ
Քաղաքացիություն	ԽՍՀՄ և Հայաստան
Ազգություն	Հայ
Կրոն	Հայ Առաքելական եկեղեցի
Կրթություն	Հայաստանի ազգային պոլիտեխնիկական համալսարան և Հայաստանի ամերիկյան համալսարան
Մասնագիտություն	Ճարտարապետ, Բիզնեսի կառավարման մագիստրոս
Գործունեություն	«Ա3 Ճարտարապետներ» ՍՊԸ հիմնադիր և տնօրեն, Հայ FM 105.5 և Ռադիո Հայ 104․1 ռադիոկայանների հիմնադիր
Աշխատավայր	«Ա3 Ճարտարապետներ» ՍՊԸ
Ամուսին	Անդրիաս Ղուկասյան
Ծնողներ	Հայր՝ Արթուր Թարխանյան, մայր՝ Գուբիևա Զառեմա
Կուսակցություն	Անկուսակցական
	Anahit Tarkhanyan Վիքիպահեստում

Վիքիպեդիայում կան հոդվածներ Թարխանյան ազգանունով այլ մարդկանց մասին։

Անահիտ Արթուրի Թարխանյան (մարտի 5, 1959(1959-03-05), Երևան, Հայկական ԽՍՀ, ԽՍՀՄ), հայ ճարտարապետ։ 2018 թվականին «Երևանի հանրություն» դաշինքի կողմից առաջադրվել է Երևանի քաղաքապետի թեկնածու^[1]^[2]։ Անկուսակցական է։ Արթուր Թարխանյան կենտրոնի հիմնադիր տնօրենն է։ Հայաստանի ճարտարապետների պալատի վարչության անդամ է։

Կենսագրություն[խմբագրել | խմբագրել կոդը]

Անահիտ Թարխանյանը ծնվել է Երևանում, ճարտարապետ Արթուր Թարխանյանի ընտանիքում։ 1981 թվականին ավարտել է Երևանի պոլիտեխնիկական ինստիտուտի ճարտարապետության ֆակուլտետը, 1993 թվականին՝ Հայաստանի ամերիկյան համալսարանի բիզնեսի կառավարման ֆակուլտետը, 1994 թվականին՝ Մեծ Բրիտանիայի Լիդսի համալսարանի դիվանագիտության ֆակուլտետի միջազգային հարաբերություններ մասնագիտությամբ վերապատրաստման դասընթացները։

1981-1989 թվականներին եղել է «Հայպետնախագիծ» ինստիտուտի գլխավոր ճարտարապետ, 1989-1992 թվականներին՝ «Վեմ» ճարտարապետական արվեստանոցի տնօրեն, 1992-1994 թվականներին աշխատել է ՀՀ արտաքին գործերի նախարարության ԱՊՀ երկրների և կառույցների հետ համագործակցության վարչությունում՝ պետի տեղակալ (երկրորդ դասի խորհրդականի դիվանագիտական աստիճան)։ 1994-1998 թվականներին եղել է Հայ FM – 105.5 ռադիոկայանի տնօրեն, 1997-1998 թվականներին ՀՀ կառավարությանն առընթեր տեղեկատվության և գրահրատարակչության վարչության հեռուստառադիո ոլորտի հարցերով պետի տեղակալ, 1998-2004 թվականներին՝ «Ա3 Ճարտարապետներ» ՍՊԸ տնօրեն, 2004-2007 թվականներին ՝ Մայր Աթոռ Սուրբ Էջմիածնի գլխավոր ճարտարապետ, 2007-2018 թվականներին՝ «Ա3 Ճարտարապետներ» ՍՊԸ տնօրեն։

1994 թվականի աշնանը հիմնադրել է ՀԱՅ FM 105.5 Երևանը, 1996 թվականին՝ Ռադիո Հայ ռադիոկայանը (Երևանում 104.1 հաճախականությամբ)։

Ստեղծագործական գործունեություն[խմբագրել | խմբագրել կոդը]

Ճարտարապետական գործունեության ընթացքում Անահիտ Թարխանյանը մշակել է բազմաթիվ նախագծեր՝ մանկապարտեզներ, դպրոցներ, բժշկական կենտրոններ, եկեղեցիներ, բանկեր, հյուրանոցներ, սպորտային և մշակութային համալիրներ, բնակելի թաղամասեր, շենքեր, մենատներ և այլն, ինչպես նաև Բագարան քաղաքը Արցախում։ Նախագծել է՝ Գյումրու, Վանաձորի, Իջևանի, Բերդի, Հրազդանի, Արարատի, և Արմավիրի բժշկական կենտրոնները, երեք սանէպիդկայան՝ Երևանում, Իջևանում և Գյումրիում, ԱԺ նիստերի դահլիճը, Հայաստանում Մեծ Բրիտանիայի դեսպանատունը, ՄԱԿ-ի դահլիճը ՀՀ-ում, Զվարթնոց օդանավակայանի բեռնային տերմինալը և այլն^[փա՞ստ]։ Առաջին կին ճարտարապետն է, ով նախագծել է հայկական եկեղեցիներ^[փա՞ստ]։ Արթուր Սարգսյանի՝ «Հաց բերողի» հուշակոթողի նախագծի հեղինակն է։

Շուրջ 4 տարի Անահիտ Թարխանյանը եղել է Հայ առաքելական եկեղեցու գլխավոր ճարտարապետը, որի ընթացքում ղեկավարել է 60 ճարտարապետական ծրագրերի նախագծումն ու կառուցումը ինչպես Հայաստանում, այնպես էլ արտերկրում։

Հիմնադրել է «Մեր քաղաքը» հասարակական կազմակերպությունը, մասնակցել Երևանի պատմական շինությունների և հուշարձանների պաշտպանության բոլոր շարժումներին, այդ թվում` Երիտասարդության պալատի, Զվարթնոց միջազգային օդանավակայանի հին համալիրի, Մոսկվա կինոթատրոնի բացօթյա դահլիճի, Հայոց ցեղասպանության զոհերի հուշահամալիրի, Երևանի փակ շուկայի և այլն։