Ռանի Մուքհերջի
 բենգալերեն՝ রাণী মুখার্জী | |
|---|---|
.jpg) | |
| Ծնվել է | մարտի 21, 1978[1] (46 տարեկան) |
| Ծննդավայր | Մումբայ, Հնդկաստան |
| Կրթություն | SNDT Women's University? և Միթիբայ քոլեջ |
| Քաղաքացիություն |  Հնդկաստան |
| Կրոն | հինդուիզմ |
| Մասնագիտություն | դերասանուհի, մոդել և կինոդերասանուհի |
| Ծնողներ | հայր՝ Ռամ Մուխերջի, մայր՝ Krishna Mukherjee? |
| Ամուսին(ներ) | Ադիտյա Ջոպրա |
| Պարգևներ և մրցանակներ | |
Ռանի Մուքհերջի (հինդի` रानी मुखर्जी, բենգալ.` রানী মুখোপধ্যায়, մարտի 21, 1978[1], Մումբայ, Հնդկաստան), հնդիկ դերասանուհի։ Յոթ անգամ արժանացել է Filmfare Awards կինոմրցանակին։
Կենսագրություն
[խմբագրել | խմբագրել կոդը]Ռանի Մուքհերջին ծնվել է բենգալյան ընտանիքում, որի անդամներից շատերը կինոգործիչներ էին։ Նրա հայրը՝ Ռամ Մուքհերջին նախկինում ռեժիսոր էր, իսկ մայրը՝ Կրիշնա Մուքհերջին, արտակադրային երգչուհի։ Եղբայրը՝ Ռաջ Մուքհերջին պրոդյուսեր է, մորաքույրը՝ Դեբաշրի Ռոյը, բենգալյան հայտնի դերասանուհի էր։ Ռանի Մուքհերջիի ազգականուհիներից է նաև բոլիվուդյան հայտնի դերասանուհի Կաջոլը։
Ռանի Մուքհերջիի կինոդեբյուտը կայացել է 1996 թվականին՝ «Biyer Phul» կինոնկարում։ 1997 թվականին նկարահանվել է «Հարսանեկան շքախումբ» ֆիլմում, որը հաջողություն չի ունեցել։ Սակայն նրա հաջորդ երկու ֆիլմերը՝ «Ճակատագրին անհնազանդ» (1998 թ.) և «Կյանքում ամեն ինչ պատահում է» (1998 թ.), դարձան հիթեր։ Այդպիսի հաջողություններից հետո նա սկսեց նկարահանվելու բազմաթիվ առաջարկներ ստանալ։
Չնայած «Ակամա մարդասպանը» (2000 թ.) կինոնկարը, որտեղ նա նկարահանվել էր, ամենաշահութաբեր ֆիլմերի ցանկում զբաղեցնում էր վեցերորդ հորիզոնականը, այնուամենայնիվ նրա ֆիլմերի մեծ մասը դեռևս անհաջողակ էին։ 2002 թվականին նկարահանված «Սիրո անատոմիան» ֆիլմով Ռանի Մուքհերջին կրկին վերականգնեց իր երբեմնի համբավը։ Ֆիլմը վաստակեց քննադատների դրական գնահատականը։ 2003 թվականին նա նկարահանվել է բավականին հաջողված «Սիրո ճանապարհներով» կինոնկարում, որտեղ նրա խաղընկերը Շահրուխ Խանն էր։ Հաջորդ՝ 2004 թվականին Ռանի Մուքհերջին շահել է երկու Filmfare Awards-ի մրցանակ՝ կանացի լավագույն երկրորդ պլանի դերի և կանացի լավագույն դերակատարման համար։ Այդ ֆիլմերն էին «Ճակատագրերի խաչմերուկում» և «Դու և ես» կինոնկարները։ Պակիստանցի փաստաբանի դերը «Վիրն ու Զառան» (2004 թ.) կինոնկարում, նրան նույնպես բազմաթիվ մրցանակների արժանացրեց։ Այդ ժամանակ էլ նա դարձավ բոլիվուդյան խոշորագույն Yash Raj Films կինոկազմակերպության ամենապահանջված դերասանուհին։
Հաջողությունը Ռանիին ուղեկցում էր նաև 2005 թվականին։ Նրա «Բանտին և Բաբլին», ինչպես նաև «Ապստամբություն» կինոնկարները նշված տարվա ամենաշահութաբեր ֆիլմերն էին։ Սակայն նույն թվականին նկարահանված «Վերջին հույսը» կինոնկարը նրան բերեց տարվա ամենագլխավոր մրցանակները։ Այդ հաջողությունները Ռանիին դարձրին Բոլիվուդի ամենապայծառ աստղերից մեկը։ 2006 թվականին նա նկարահանվել է Կարան Ջոհարի «Երբեք մի ասա` «Մնաս բարով»» և Ռավի Չոպրայի «Հայրիկ» կինոնկարներում։ Սակայն «Հայրիկ» ֆիլմում նրա կերտած այրի կնոջ կերպարը չընդունվեց հանդիսատեսի կողմից և ֆիլմը մատնվեց անհաջողության։ 2009 թվականին Ռանի Մուքհերջին Շահիդ Կապուրի հետ միասին նկարահանվել է «Սիրտն ասում է - Առաջ» կինոնկարում։
2004 թվականին Ռանի Մուքհերջին մասնակցել է Temptations համերգային հանդիսությանը, որին մասնակցում էին նաև Շահրուխ Խանը, Սաիֆ Ալի Խանը, Պրեիտի Զինտան, Արջուն Ռամպալը և Պրիյանկա Չոպրան։ 2005 թվականից մինչև 2007 թվականը Ռանի Մուքհերջին գլխավորում էր «Բոլիվուդյան տասը լավագույն դերասանուհիներ»-ի ցանկը։ 2006 թվականի փետրվարին Filmfare ամսագիրը Ռանի Մուքհերջիի անունը մտցրել էր «Բոլիվուդի տասը մեծագույն անունները» ցուցակի մեջ։ 2012 թվականին Ռանին ստացել է իր յոթերորդ Filmfare Awards-ի արձանիկը «Ոչ ոք չի սպանել Ջեսիկային» ֆիլմի համար և դարձել է առաջին դերասանուհին, ով ստացել է այդ մրցանակի նշված քանակի արձանիկ։
Անձնական կյանքը
[խմբագրել | խմբագրել կոդը]2014 թվականին Ռանի Մուքհերջին ամուսնացել է ռեժիսոր Ադիտյա Չոպրայի հետ։ 2015 թվականին ծնվել է նրանց դուստրը։
Մասնակի ֆիլմագրություն
[խմբագրել | խմբագրել կոդը]| Թվական | Անվանում | Բնօրինակ անվանում | Կերպար |
|---|---|---|---|
| 1997 | Հարսանեկան շքախումբ | Raja Ki Ayegi Baraat | Մալա |
| 1998 | Ճակատագրին անհնազանդ | Ghulam | Ալիշա |
| 1998 | Կյանքում ամեն ինչ պատահում է | Kuch Kuch Hota Hai | Տինա Մալհոտրա |
| 1998 | Սիրո փշերը | Mehndi | Պուջա |
| 1999 | Ողջույն անտեսանելի եղբորից | Hello Brother | Ռանի |
| 2000 | Ակամա մարդասպանը | Badal | Ռանի |
| 2000 | Ժամանակի շնչառությունը | Hey Ram | Ապառնա Ռամ |
| 2000 | Ամուսնալուծություն հնդկական ձևով | Hadh Kar Di Aapne | Անջալի Կհաննա |
| 2000 | Կարիճ | Bichhoo | Կիրան Բալի |
| 2000 | Յուրաքանչյուր սիրող սիրտ | Har Dil Jo Pyar Karega | Պուջա Օբերոյ |
| 2000 | Հանկարծ չսիրահարվել | Kahin Pyaar Na Ho Jaaye | Պրիյա Շարմա |
| 2001 | Ուրիշի երեխան | Chori Chori Chupke Chupke | Պրիյա Մալհոտրա |
| 2001 | Անուրջների աշխարհում | Bas Itna Sa Khwaab Hai | Պուջա Շրիվաստավ |
| 2001 | Առաջնորդը | Nayak: The Real Hero | Մանջարի |
| 2001 | Եվ թախծի, և ուրախության մեջ | Kabhi Khushi Kabhie Gham | Նաինա Կապուր |
| 2002 | Այս խելահեղ սերը | Pyaar Diwana Hota Hai | Պայալ Կհուրանա |
| 2002 | Ինձ հետ ընկերություն կանե ՞ս | Mujhse Dosti Karoge! | Պուջա Սահանի |
| 2002 | Սիրո անատոմիան | Saathiya | Սուհանի |
| 2002 | Աներես երկրպագուն | Chalo Ishq Ladaaye | Սապնա |
| 2003 | Սիրո ճանապարհներով | Chalte Chalte | Պրիյա Չոպրա |
| 2003 | Ճակատագրական հանդիպում | Calcutta Mail | Ռիմա, Բուլբուլ |
| 2003 | Ինքնակոչուհին | Chori Chori | Կհուշի |
| 2004 | Ճակատագրերի խաչմերուկում | Yuva | Շաշի Բիսվաս |
| 2004 | Դու և ես | Hum Tum | Ռեա Պրակաշ |
| 2004 | Վիրն ու Զառան | Veer-Zaara | Սամիա Սիդիկի |
| 2005 | Վերջին հույսը | Black | Միշել ՄակՆելլի |
| 2005 | Բանտին և Բաբլին | Bunty Aur Babli | Վիմի Սալուջա, Բաբլի |
| 2005 | Հանելուկ | Paheli | Լաչի |
| 2005 | Ապստամբություն | The Rising: Ballad of Mangal Pandey | Հիրա |
| 2006 | Երբեք մի ասա` «Մնաս բարով» | Kabhi Alvida Naa Kehna | Մայա Տալվար |
| 2006 | Հայրիկ | Baabul | Մալվիկա «Միլի» Տալվար |
| 2007 | Ամեն ինչ լավ կլինի (Տա-ռա-ռամ-պամ) | Ta Ra Rum Pum | Ռադհիկա |
| 2007 | Ցած ընկած հրեշտակը | Laaga Chunari Mein Daag: Journey of a Woman | Վիբհավարի Սահայ |
| 2007 | Սիրեցյալը | Saawariya | Գուլաբջի |
| 2008 | Մի քիչ սեր, մի քիչ մոգություն | Thoda Pyaar Thoda Magic | Գիտա |
| 2009 | Սիրտն ասում է` «Առաջ» | Dil Bole Hadippa! | Վիրա Կաուր, Վիր Պրատապ Սինգհ |
| 2011 | Ոչ ոք չի սպանել Ջեսիկային | No One Killed Jessica | Միրա Գայտի |
| 2012 | Օ, Տեր Աստված | Aiyyaa | Մինակշի Դեշպանդե |
| 2013 | Խոսում և ցուցադրում է Բոմբեյը | Bombay Talkies | Գայատրի |
| 2014 | Խիզախը | Mardaani | Շիվանի Շիվաջի Ռոյ |
Ծանոթագրություններ
[խմբագրել | խմբագրել կոդը] | Վիքիպահեստն ունի նյութեր, որոնք վերաբերում են «Ռանի Մուքհերջի» հոդվածին։ |
| ||||||||||||||||
