Սանյա Իվեկովիչ

Վիքիպեդիայից՝ ազատ հանրագիտարանից
Jump to navigation Jump to search
Սանյա Իվեկովիչ
Sanja Iveković
Sanja Ivekovic.JPG
Ծնվել էհունվարի 6, 1949(1949-01-06) (71 տարեկան)
ԾննդավայրԶագրեբ, ՀՍՖՀ
ՔաղաքացիությունFlag of Croatia.svg Խորվաթիա[1]
Մասնագիտությունլուսանկարիչ և քանդակագործ
Ոճֆեմինիստական արվեստ
Sanja Iveković Վիքիպահեստում

Սանյա Իվեկովիչ (խորվ.՝ Sanja Iveković, 1949, Զագրեբ), խորվաթ նկարչուհի, քանդակագործ, լուսանկարչուհի: Նա համարվում է նախկին Հարավսլավիայի առաջատար նկարչուհիներից մեկը և շարունակում է ոգեշնչել բազմաթիվ երիտասարդ նկարչուհիների[2]:

Կենսագրություն[խմբագրել | խմբագրել կոդը]

1968-1971 թվականներին Սանյա Իվեկովիչը սովորել է Զագրեբի Գերավեստի ակադեմիայում: Նրա՝ նկարչուհու կարիերան սկսվել է Խորվաթական գարնան ժամանակ՝ 1970-ական թվականների սկզբին, երբ մյուս երիտասարդ նկարիչների հետ նա հրաժարվեց հետևել իշխող միտումներին՝ ընտրություն կատարելով հօգուտ նորարարական տեսագրությունների, կոնցեպտուալ ֆոտոմոնտաժների և պերֆոմանսների[3]: Իր աշխատանքների մեջ Իվեկովիչը կենտրոնացնում է ուշադրությունն իր կյանքի և կնոջ դերը ժամանակակից հասարակության մեջ թեմայի վրա: Նա դարձավ առաջին խորվաթ նկարչուհին, որը հայտարարել է իր ֆեմինիստական հայացքների մասին[4]: 1994 թվականին Իվեկովիչը դարձավ Կանանց ուսումնասիրությունների կենտրոնի հիմնադիրներից մեկը Զագրեբում[5]:

Ստեղծագործական կյանք[խմբագրել | խմբագրել կոդը]

Իր կարիերայի հենց սկզբից Իվեկովիչին հետաքրքրում էր կնոջ կերպարը հասարակության մեջ: Նրա աշխատանքների մեջ կարելի է առանձնացնել այնպիսի գործեր, ինչպես «Double Life»-ը (1975), որտեղ նկարչուհին զույգերով դասավորել է 66 լուսանկար՝ իր անձնական կյանքից և նման մոդելների լուսանկարներ` ամսագրային գովազդներից, «Make Up - Make Down»-ը (1978)՝ կազմված նրա ինքնանկարներից, որոնք արվել էին կինո և լուսաժապավենների վրա, «General Alert: Soap Opera» (1995), որը վերաբերում է կանանց կերպարին հեռուստատեսության մեջ, և «Figure & Ground»` կոլաժների շարք, որտեղ պատկերված են կին-մոդելներ, որոնք նման են զինված ահաբեկիչների, ողողված են կեղծ արյունով և կրում են առաջատար դիզայների զինվորական ոճի հագուստ[6]:

Սանյա Իվեկովիչ, Ռոզա Լյուքսեմբուրգ

Իվեկովիչը նաև հայտնի է որպես քանդակագործ: 2001 թվականին նա պատրաստեց արձան, որը կրկնօրինակում էր Ոսկե տիկնոջը` Լյուքսեմբուրգի ազգային խորհրդանիշը, սակայն այն պատկերել է հղի վիճակում: Որոշ ժամանակ արձանը, որը ստացել է «Ռոզա Լյուքսեմբուրգ» անվանումը, գտնվում էր բնօրինակից ոչ հեռու` ցնցելով պատահական անցորդներին: «Women’s House» նախագիծը, որն իրականացվում էր 1998 թվականից, իրենից ներկայացնում է բռնության ենթարկված կանանց դեմքերի` գիպսե ծեփակերտների կիսաշրջանով շարված պատկերասրահ[6]:

2010 թվականին Կվանգջուի բիենալեում Իվեկովիչը ներկայացրեց «On the Barricades» պերֆոմանսը՝ ի հիշատակ 1980 թվականի մայիսի 18-ին Կվանգջուում տեղի ունեցած ապստամբության: Ինչպես և «Rohrbach Living Memorial» (2005) պերֆոմանսում, որը նվիրվել է գնչուների ճակատագրին` Հոլոքոստի զոհերի հիշատակին, նրան օգնեցին կամավորներ, որոնք պատկերում էին զոհերի արձանները: Նրանց վրա 10 մոնիտորներ կային, որոնց վրա հեռարձակվում էր 545 զոհերի լուսանկարների սլայդ-շոուն, որոնց աչքերը նկարչուհին դիտմամբ փակել էր[7]:

Ճանաչում[խմբագրել | խմբագրել կոդը]

2009 թվականին Իվեկովիչը Գրաց քաղաքում դարձավ Camera Austria Award մրցանակակիր, քանի որ լուսանկարը ճանաչվեց նրա կոնցեպտուալ աշխատանքների անբաժանելի մասը: Ժյուրին նշեց նրա աշխատանքների ակտուալությունը և դրա նշանակությունը երիտասարդ սերնդի համար, ինչպես նաև նկարչուհու սոցիալական և քաղաքական ակտիվությունը, որը գրավում է ուշադրությունը հասարակության մեջ կնոջ դերի վրա այնպիսի ստեղծագործությունների միջոցով, ինչպես «Women’s House»-ն է[8]:

Ծանոթագրություններ[խմբագրել | խմբագրել կոդը]

  1. Museum of Modern Art online collection
  2. «Sanja Iveković: General Alert, Selected Works 1974—2007» արխիվացված 9 Սեպտեմբեր 2012. (շվեդ.) Retrieved 25 February 2011.
  3. Roxana Marcoci, «New at MoMA: Sanja Iveković's Double Life», MoMA, April 15, 2010. Retrieved 25 February 2011.
  4. «Sanja Iveković», Media Art Net. Retrieved 25 February 2011.
  5. Katarzyna Pabijanek, «'Women’s House': Sanja Iveković Discusses Recent Projects», ArtMargins. Retrieved 25 February 2011.
  6. 6,0 6,1 Vivian Rehberg, «Sanja Iveković» Archived 2010-10-02 at the Wayback Machine., Frieze Magazine, No 125, September 2009. Retrieved 25 February 2011.
  7. «Sanja Ivekovic at Gwangju Art Biennale 2010», Designboom. Retrieved 26 February 2011.
  8. Camera Austria-Preis der Stadt Graz für zeitgenössische Fotografie 2009 Archived 2011-05-31 at the Wayback Machine.

Արտաքին հղումներ[խմբագրել | խմբագրել կոդը]