Յուրի Սուվարյան

Յուրի Միքայելի Սուվարյան
Ծնվել է	1943 մայիսի 25 ԼՂՀ, Սղնախ
Բնակության վայր(եր)	Հայաստան
Ազգություն	հայ
Մասնագիտություն	Տնտեսագիտություն
Ալմա մատեր	Երևանի պետական համալսարան
Պարգևներ	Հայաստանի Հանրապետութեան գիտության վաստակավոր գործիչ «Հայրենիքին մատուցած ծառայությունների համար» 1-ին աստիճանի մեդալ և «Հայրենիքին մատուցած ծառայությունների համար» 2-րդ աստիճանի շքանշան

Յուրի Միքայելի Սուվարյան (1943, մայիսի 25, Սղնախ, ԼՂԻՄ), հայ տնտեսագետ, տնտեսագիտության դոկտոր (1984 թ.), պրոֆեսոր (1986 թ.), ՀՀ ԳԱԱ ակադեմիկոս (2010 թ., թղթակից անդամ՝ 2006 թ.)։ Հայաստանի Հանրապետության գիտության վաստակավոր գործիչ (2014 թ.):

Կրթություն

• 1960 թ. ավարտել է Ավետարանոց գյուղի միջնակարգ դպրոցը։
• 1965 թ. ավարտել է Երևանի պետական համալսարանի տնտեսագիտական ֆակուլտետը։
• 1965-1968 թթ. սովորել և ավարտել է Երևանի պետական համալսարանի ասպիրանտուրան։

Աշխատանքային գործունեությունը

• 1991-1992 թթ. - համատեղությամբ աշխատել է Հայաստանի Հանրապետության վարչապետի խորհրդական։
• 1987-1994 թթ. - Երևանի ժողովրդական տնտեսության ինստիտուտի գիտական աշխատանքների գծով պրոռեկտոր, տնտեսագիտական աստիճաններ շնորհող խորհրդի նախագահի տեղակալ։:
• 1994 թվականից բուհի կառավարման ամբիոնի վարիչն է։
• 2006-2011 թթ. - Հայաստանի պետական տնտեսագիտական համալսարանի ռեկտոր։
• 2012 թվականից - Հայաստանի պետական տնտեսագիտական համալսարանի ռեկտորի խորհրդական։
• ՀՊՏՀ-ում գործող գիտական աստիճաններ շնորհող մասնագիտական խորհրդի նախագահն է։
• Մենեջմենթի հայկական ընկերակցության նախագահն է։ Հայերենի բարձրագույն խորհրդի անդամ, տնտեսագիտական եզրաբանության ճյուղային հանձնաժողովի նախագահը։
• Եղել է «Բանբեր ՀՊՏՀ» տեսական հանդեսի գլխավոր խմբագիրը։

Գիտական գործունեությունը

• 1970 թ. պաշտպանել է թեկնածուական ատենախոսություն՝ «Աշխատանքի արտադրողականության և աշխատավարձի աճի տեմպերի հարաբերակցությունը» թեմայով։
• 1983 թ. պաշտպանել է դոկտորական ատենախոսություն՝ «Ամբողջական աշխատանքի արտադրողականությունը Հայաստանի արդյունաբերության մեջ» թեմայով։
• 1984 թ. շնորհվել է պրոֆեսորի կոչում։
• 2006 թ. ընտրվել է Հայաստանի գիտությունների ազգային ակադեմիայի թղթակից անդամ։
• 2010 թ. ընտրվել է Հայաստանի գիտությունների ազգային ակադեմիայի իսկական անդամ (ակադեմիկոս)։

Հեղինակել է ավելի քան 220 հրատարակված գիտական աշխատանք, այդ թվում՝ 30 մենագրություն տնտեսագիտության ու կառավարման հիմնարար խնդիրների վերաբերյալ։: Նրա ընդհանուր խմբագրմամբ և համահեղինակությամբ հրատարակվել են «Մենեջմենթ» հայերեն բնագիր բուհական առաջին դասագիրքը (Եր., 1999 թ., 2002 թ., 2009 թ.), «Հայ կառավարչական մտքի պատմության ուրվագծեր» (Եր., 2005 թ.)` տվյալ ասպարեզին վերաբերող առաջին մեծածավալ հետազոտությունը:

Պարգևներ և կոչումներ

• «Հայրենիքին մատուցած ծառայությունների համար» 1-ին աստիճանի մեդալ (2011 թ.)
• Անանիա Շիրակացու մեդալ (2000 թ.)
• ԼՂՀ «Մայրական երախտագիտություն» մեդալ (2007 թ.)
• Միջազգային փիլիսոփայական ակադեմիայի «Դավիթ Անհաղթ» մեդալ (2010 թ.)

• Հայաստանի Հանրապետության գիտության վաստակավոր գործիչ (2014 թ.)
• «Հայրենիքին մատուցած ծառայությունների համար» 2-րդ աստիճանի շքանշան, 2017 թ.

Աշխատություններ

1. Աշխատանքի արտադրողականության բարձրացման նյութական խթանումը արդյունաբերության մեջ, Երևան, 1976 թ.
2. Աշխատանքի արտադրողականությունը և արտադրության արդյունավետությունը, Երևան, 1976 թ.
3. Հասարակական աշխատանքի արտադրողականությունը. չափումը, վերլուծությունը, խթանումը, Երևան, 1980 թ., ռուսերեն։
4. Աշխատանքի արտադրողականության աճի կառավարումը արդյունաբերությունում, Երևան, 1987 թ., ռուսերեն։
5. Աշխատանքի արտադրողականությունը. տարածաշրջանային հիմնախնդիրներ, համահեղինակությամբ, Մոսկվա, 1988 թ.
6. Էկոնոմիկայի ինտենսիվացման տնտեսական մեխանիզմը, Երևան, 1990 թ.
7. Ռազմավարական կառավարում. մեթոդաբանությունը և արդի հիմնախնդիրները, Երևան, 1996 թ.
8. Հանրային կառավարման տեսության և պատմության ուրվագծեր, Երևան, 2004 թ.
9. Մենեջմենթ» հայերեն բնագիր բուհական առաջին դասագիրքը, Երևան, 1999 թ., 2002 թ., 2009 թ.
10. Հայ կառավարչական մտքի պատմության ուրվագծեր, Երևան, 2005 թ.
11. Գիտակրթական համակարգը և տնտեսական զարգացումը, Երևան, 2011 թ.