Երգող կեռնեխ

Անվան այլ կիրառումների համար տե՛ս՝ Երգող կեռնեխ (այլ կիրառումներ)

Turdus philomelos

* Բնադրումը՝ դեղին; * Ձմեռումը՝ կապույտ; * Կլոր տարին՝ կանաչ

Բույնը ձվերով

Ձագերին կերակրելիս

Երգող կեռնեխ (լատին․՝ Turdus philomelos), կեռնեխների ընտանիքի պատկանող թռչուն։

Նկարագրությունը

Երգող կեռնեխի մարմնի վերին մասը ձիթապտղագույն է, թևերի թափահարող փետուրները մուգ դարչնագույն են, մարմնի ստորին մասը սպիտակ է՝ շիկավուն երանգով կլոր պտերով։ Պտերը որովայնի հատվածում նոսր են և գունաթափված, կտուցը մոխրասև է։ Ոտքերը դեղին են։ Զգալիորեն փոքր է մյուս կեռնեխներից։ Քաշը՝ 57-77 գ, թևի երկարությունը՝ 109-120 մմ, բացվածքը՝ 340-350 մմ։

Դասակարգում

Թագավորությունը՝	Կենդանիներ
Դասը՝	Թռչուններ
Կարգը՝	Ճնճղուկազգիներ
Ընտանիքը՝	Կեռնեխազգիներ
Ցեղը՝	Կեռնեխներ
Տեսակը՝	Երգող կեռնեխ

Կենսակերպը

Հայաստանում բնադրվող, չվող թռչուն է։ Գարնանը վերադառնում է ապրիլ ամսին։ Բնակության համար նախապատվություն է տալիս անտառների թփուտավոր հատվածներին, հաճույքով բնակվում է նաև կաղնու և բոխու անտառներում։ Սնվում է հիմնականում միջատներով, ձմռանը՝ նաև հատապտուղներով։

Երգը

Երգում է շատ գեղեցիկ, անշտապ, զրնգուն և երկարատև։ Արձակում է սուլոցներ։ Երբեմն նմանակում է այլ թռչունների որոշ ձայներ։ Սովորաբար երգում են ծառերի կատարներին նստած, համարյա ամբողջ ցերեկը, սակայն առավել ակտիվ են առավոտյան և երեկոյան։ Երգում են մինչև բնակալման ավարտը։ Հունիսի սկզբում երգում են սովորականից մի քիչ պակաս չափով, սակայն, հետո նախկին ակտիվությունը վերականգնվում է։ Երգելը դադարեցնում են հուլիսի սկզբում։

Բազմացում

Բույնը սարքում է չոր խոտերից՝ ծառերի ճյուղերին կամ թփերի վրա, բնի ներսը սվաղում է ցեխով։ Մայիս ամսին դնում է 4-7 երկնագույն, սև պտիկներով ձու, հաճախ տալիս է երկու սերունդ։

Տարածվածություն

Տարածված է Եվրոպայում, Փոքր Ասիայում, Իրանի հյուսիսում, Պեչորա և Օբ գետերի ավազաններում, Ալթայում, Մոլդովայում, Դոնի ստորին հոսանքներում, Ղրիմում, Կովկասում։

Երգասեր կեռնեխի պատկերը որպես տարբերանշան

Անգլիայի Փրեմյեր լիգայում հանդես եկող Ուեսթ Բրոմուիչ Էլբիըն թիմի տարբերանշանին պատկերված է երգասեր կեռնեխ։

Աղբյուրներ

Վիքիցեղերն ունի նյութեր, որոնք վերաբերում են «Երգող կեռնեխ» հոդվածին։

Վիքիպահեստն ունի նյութեր, որոնք վերաբերում են «Երգող կեռնեխ» հոդվածին։