Կիմ Ջոնգ Ուն

Վիքիպեդիայից՝ ազատ հանրագիտարանից

Կիմ Ջոնգ Ուն (կորեերեն՝ 김정은), հայտնի նաև «Մեծ Հաջորդող» պատվանունով (ծն. 1983/1984 թ. հունվարի 8), Հյուսիսային Կորեայի գերագույն առաջնորդ։ Նա երկրի նախկին գերագույն առաջնորդ Կիմ Ջոնգ Իլի երրորդ որդին և հաջորդողն է։

Նրա կյանքի մանրամասները գաղտնի էին պահվում ամբողջատիրական վարչակարգի կողմից մինչև 2010 թվականը։ Իննսունական թվականներին Պակ Չոլ ծածկանունով սովորում էր Շվեյցարիայի մի մասնավոր դպրոցում։ 2002 - 2007 թվականներին եղել է Կիմ Իր Սենի անվան Զինվորական Ակադեմիայի ուսանող։ 2010 թվականին ստանձնել է բարձր պաշտոններ կոմունիստական կուսակցությունում և բանակում, ինչի հետևանքով ժառանգորդության փաստը պաշտոնաբար հաստատվել է։ 2011 թ. դեկտեմբերի 29-ին, նրա հոր թաղումից մի օր անց Կիմ Յոնգ Նամի կողմից հայտարարվեց «մեր կուսակցության, բանակի և երկրի գերագույն առաջնորդ»։

Ծննդյան ժամանակ[խմբագրել]

Կիմ Ջոնգ Ունի, ինչպես նաև իր հայր Կիմ Ջոնգ Իլի ծննդյան տարեթիվն անհայտ է։ Տարբեր աղբյուրներ առաջարկում են 1982, 1983 կամ 1984 թվականը։ Ըստ հետախուզական տվյալների, նա ծնվել է 1984 թվականին։ Նրա ծննդյան օրը, հունվարի 8-ը հայտարարվել է Հյուսիսային Կորեայի պետական տոն և նշվել է պաշտոնաբար առաջին անգամ 2011 թվականին։

Դպրոցական տարիները Շվեյցարիայում[խմբագրել]

Կիմ Ջոնգ Ունի կյանքի մանրամասները, անունը և լուսանկարները գաղտնի էին պահվում մինչև ժառանգորդության գործընթացի սկիզբը։ Նա իննսունական թվականներին ուսանում էր Շվեյցարիայում։ Շվեյցարական մամուլը, ինչպես նրա դասընկերները տվյալներ են հայտարարեցին նրա դպրոցական տարիների վերաբերյալ։

Ըստ «Լ'Էբդո» վերնագրով շվեյցարական թերթի, նա Պակ Չոլ ծածկանունով մասնավոր դպրոց էր հաճախում Բեռն քաղաքում մինչև 1998 թ.։ Ուսանում էր անգլերեն, ֆրանսերեն և գերմաներեն։ Ըստ նրա դասընկերների, վախկոտ և քչախոս էր, սակայն սիրում էր դահուկը և բեյսբոլը, ինչպես նաև տարված էր Բասկետբոլի ազգային ասոցիացիայով և Մայքլ Ջորդանով։

Կիմ Ջոնգ Ունը սովորում էր նաև Լիբեֆելդի պետական դպրոցում։ Նա Շվեյցարիայում էր մինչև 1999 թվականի վերջը կամ 2000 թվականի սկիզբը։ Ըստ նրա դասընկերների, անսպասելիորեն անհետացավ։

Ժառանգորդության աստիճանական հայտարարությունը[խմբագրել]

Հյուսիսային Կորեան աշխարհի վերջին կոմունիստական պետություններից է։ Երկիրը դե ֆակտո «գերագույն առաջնորդ» ունի, որը պետք է զբաղեցնի մի քանի բարձր պաշտոններ կոմունիստական կուսակցությունում (Կորեայի բանվորական կուսակցություն), բանակում և պետական ուրիշ մարմիններում։ Գերագույն առաջնորդի պաշտոնը ժառանգական է։ Նախորդ առաջնորդ Կիմ Ջոնգ Իլի ժառանգորդության գործընթացը մոտ քսան տարի տևեց։ Այդ ընթացքում նա նախապատրաստվում էր իր հայր Կիմ Իր Սենի կողմից (հավանաբար 1976 թվականից մինչև 1994 թ.) ու զանազան պաշտոններ ստանձնեց (1980 - 1997 թթ.)։ Իսկ Կիմ Ջոնգ Ունը միայն իր հոր վերջին տարիներին է ընտրվել և ընդամենը 2 տարի տևեց իր նախապատրաստությունը։

Նրա հայրը սկզբից Կիմ Ջոնդ Նամին (իր ավագ որդուն) էր նախընտրում որպես ժառանգորդ։ Սակայն վերջինը 2001 թվականին Ճապոնիայի սահմանապահների կողմից ձերբակալվել է կեղծ անձնագրի պատճառով։ Թեև քիչ անց ազատվել է, Կիմ Ջոնգ Իլը փոխեց իր նախագիծը և հավանաբար իր միջնեկ որդի Կիմ Ջոնգ Չուլին ընտրեց որպես հաջորդ ժառանգորդ։ Բայց ըստ Կիմ Ջոնգ Իլի նախկին խոհարար Կենջի Ֆուջիմոտոյի, Կիմ Ջոնգ Չուլը չափազանց «աղջկաբարո» էր համարվում երկիրը ղեկավարելու համար։

2008 թ. օգոստոսին ու կրկին նոյեմբերին, ըստ հետախուզական տեղեկությունների, Կիմ Ջոնգ Իլը ուղեղի կաթված է ստացել։ Հետագայում պետական տոնակատարություններին ավելի հազվադեպ էր երևում։ Ըստ դիվանագիտական աղբյուրների, 2009 թվականին Կիմ Ջոնգ Իլը Կիմ Ջոնգ Ունին ներկայացրեց երկրի պետական մարմիններին, որպես հաջորդող։ Կիմ Ջոնգ Իլի երրորդ որդին ներկայացվում էր որպես «Ճաճանչավառ Ընկեր» (영명한 동지, Յոնգմյոնգհան Տոնգջի

2010 թ. սեպտեմբերի 28-ին գումարվեց Հյուսիսային Կորեայի կոմունիստական կուսակցության խորհրդաժողովը և Կիմ Ջոնգ Ունն ընտրվել է Կենտրոնական Կոմիտեի անդամ։ 17 տարեկան ընդմիջումից հետո, գումարվեց նաև Կենտրոնական Կոմիտեի լիագումար նիստը, որպեսզի Կիմ Ջոնգ Ունը նշանակվի Կենտրոնական Զինվորական Հանձնաժողովի փոխնախագահ։ 2010 թ. հոկտեմբերի 10-ին Կիմ Ջոնգ Ունը իր հայրի կողքին մասնակցեց կոմկուսի 65-ամյակի տոնակատարմանը, ինչը ժառանգորդության միանշանակ արտահայտություն էր համարվում։

2011 թվականին Կիմ Ջոնգ Ունը ուղեկցում էր իր հորը երկրի տարբեր վայրերում անցկացվող պաշտոնական այցերին։ 2011 թ. ընթացքում Կիմ Ջոնգ Ունի մրցակիցներից շատերը հեռացվել են իշխանությունից։

Կիմ Ջոնգ Իլի մահվանից հետո[խմբագրել]

2011 թ. դեկտեմբերի 17-ին մահացավ Կիմ Ջոնգ Իլը։ Նրա մահվան լուրը հայտարարվեց Հյուսիսային Կորեայի զլմ-ներում դեկտեմբերի 19-ին, ու Կիմ Ջոնգ Ունը ներկայացվեց որպես «Մեծ Հաջորդող»։ Դեկտեմբերի 28-ին նա ղեկավարեց իր հոր թաղման արարողությունը։

Հյուսիսային Կորեայի մամուլը 2011 թ. դեկտեմբերի 24-ին Կիմ Ջոնգ Ունին հիշատակեց որպես Կորեայի Ժողովրդական Բանակի գերագույն հրամանատար։ Դեկտեմբերի 30-ին Կորեայի Բանվորական Կուսակցության Քաղաքական Գրասենյակը հայտարարեց, որ Կիմ Ջոնգ Ունը ստանձնեց Կորեական Ժողովրդական Բանակի գերագույն հրամանատարության պաշտոնը։ 2012 թ. հունվարի 9-ին Հյուսիսային Կորեայի զինված ուժերը տոնական հավաքման ժամանակ արտահայտել են բանակի հավատարմությունը նոր ղեկավարի հանդեպ։

2011 թ. դեկտեմբերի 29-ին Կիմ Յոնգ Նամը հայտարարեց, որ Կիմ Ջոնգ Ունն է երկրի կուսակցական, ռազմական և պետական գերագույն ղեկավարը։ Այնուամենայնիվ, չնայած արդեն զբաղեցնում է զինված ուժերի գերագույն հրամանատարի պաշտոնը, մյուս երկու անհրաժեշտ պաշտոնը (կոմկուսի գլխավոր քարտուղար և Կենտրոնական Զինվորական Հանձնաժողովի նախագահ) դեռ չի ստանձնել, այդտեղ ճանաչված է միայն պաշտոնակատար։ Դա նշանակություն չունի, քանի որ Կիմ Ջոնգ Իլը միայն իր հոր մահից երեք տարի անց կարողացավ ստանձնել այդ երկու պաշտոնը։

2011 թ. դեկտեմբերի 29-ից Կիմ Ջոնգ Ունը համարվում է Հյուսիսային Կորեայի գերագույն առաջնորդ ըստ համաշխարհային դիվանագիտական աղբյուրների։

Կիմ Ջոնգ Ունի պատվանունները[խմբագրել]

Կիմ Ջոնգ Ունի ամենահաճախ կիրառվող պատվանուններն են «Մեծ Հաջորդող», «Ճաճանչավառ Ընկեր»,«ԱրուսյակՀրամանատար»։