Պահարե

Վիքիպեդիայից՝ ազատ հանրագիտարանից
Պահարե
Հայկ Սեդրակի Պետրոսյան
Պահարե.jpg
(բանաստեղծ, դերասան)
Ծնվել է փետրվարի 15, 1895
Ծննդավայր Նոր Բայազետ (Հայաստան)
Մահվան վայր Երևան (Հայաստան)

Պահարե (Հայկ Սեդրակի Պետրոսյան, փետրվարի 15, 1895 - նոյեմբերի 1, 1968), Նոր-Բայազետցի նշանավոր բանաստեղծ, դերասան, Վրաստանի Խորհրդային Հանրապետության վաստակավոր արտիստ 1943, ԽՍՀՄ գրողների միության անդամ 1934-ից։

Կենսագրություն[խմբագրել]

Ծնվել է 1895 թ. Նոր Բայազետում, վաղ հասակից ծնողների հետ տեղափոխվել Թիֆլիս, սովորել Ներսիսյան դպրոցում, նկարչական ակադեմիայում, խաղացել Հայոց դրամատիկական թատրոնում։ Որոշ ժամանակ աշխատել է Բաքվի հայկական թատրոնում որպես դերասան և դրամատիկական ստուդիայի ղեկավար։ Այնուհետև երկար տարիներ աշխատել է Թբիլիսիի Ստեփան Շահումյանի անվան Դրամատիկական Թատրոնում։ Նա կոմիկ դերասան էր, որի ուսուցիչները եղել են անվանի կոմիկներ Դավիթ Թուրյանը, Արամ Վրույրը, Արշակ Մամիկոնյանը և ուրիշներ։

50-ամյա աշխատանքային գործունեության ընթացքում նա խաղացել է շուրջ 300 դեր՝ Նազար («Քաջ Նազար»), Մարտիրոս («Նամուս»)։ Նա միաժամանակ զբաղվել է գրականությամբ, առանձին գրքերով լույս են տեսել նրա «Գյուղերի կանչը», «Գեղարքունիք», «Հայրենիք» բանաստեղծությունների ժողովածուները, գրել է «Կոմերիտ վաղում» պոեմը, դրամատիկական գործեր, «Չաղ-չաղ թագավորը» պիեսը, որը բեմադրվել է Թիֆլիսի պատանի հանդիսատեսի թատրոնում և Ստ. Շահումյանի անվան հայկական դրամատիկական թատրոնում։ Պահարեն պահանջկոտ, աշխատասեր դերասան էր, որի շնորհիվ դասվում է հայ թատրոնի տաղանդավոր կոմիկ դերասանների շարքը։ 1943 թ. Խորհրդային Վրաստանի գերագույն Սովետի նախագահությունը նրան շնորհել է վաստակավոր արտիստի բարձր կոչում։ Նա խաղացել է Լևոն Քալանթարի, Հովհաննես Աբելյանի, Օլգա Մայսուրյանի, Ժասմենի, Վահրամ Փափազյանի, Հասմիկի, Սիրանույշի և շատ նշանավոր ու մեծատաղանդ դերասանների հետ։ 1966-1968 թթ. ապրել է Երևանում, երբեմն-երբեմն եղել Նոր-Բայազետում։ Մահացել է Երևանում, թաղվել Կամոյում։

Հրատարակված գրքեր[խմբագրել]

  • Գյուղերի կանչը / Պահարե. 1925
  • Կոմյերիտ Վաղոն։ (Կենցաղային պոյեմ) / Պահարե. 1926
  • Գեղարքունիք։ Բանաստ. ժող. 1912-1928 / Պահարե. 1928
  • Հայրենիք / Պահարե; Առաջաբ.՝ Ս. Ավչյան. 1958
  • Թատերական հուշեր / Պահարե ; Խմբ.՝ Ս. Պայազատ. 1960 Ազգ
  • Ստեփան Քափանակյան / Պահարե ; ՀԹԸ. 1962