Էմիլյա Ֆոգելկլու
| Էմիլյա Ֆոգելկլու շվեդ.՝ Emilia Fogelklou | |
|---|---|
 | |
| Ծնվել է | հուլիսի 20, 1878[1][2] |
| Ծննդավայր | Սիմրիսհամն, Կրիստիանստադ, Շվեդիա |
| Մահացել է | սեպտեմբերի 26, 1972[1][2] (94 տարեկան) |
| Մահվան վայր | Ուփսալա, Շվեդիա |
| Քաղաքացիություն |  Շվեդիա |
| Կրթություն | Ուփսալայի համալսարան և Հյոգրեի ուսուցիչների սեմինարիում |
| Մասնագիտություն | գրող, դասախոս, լրագրող և աստվածաբան |
| Ամուսին | Arnold Norlind? |
| Ծնողներ | հայր՝ Յոհան Ֆոգելկլու |
| Պարգևներ և մրցանակներ | |
 Emilia Fogelklou Վիքիպահեստում | |
Էմիլիա Մարիա Ֆոգելկլու (շվեդ.՝ Emilia Fogelklou, հուլիսի 20, 1878[1][2], Սիմրիսհամն, Կրիստիանստադ, Շվեդիա - սեպտեմբերի 26, 1972[1][2], Ուփսալա, Շվեդիա), շվեդ աստվածաբան, մանկավարժ և գրող։
Շվեդիայի առաջին կինը, որը ստացել է աստվածաբանության գիտական աստիճան։
Կենսագրություն[խմբագրել | խմբագրել կոդը]
Էմիլիա Ֆոգելկլուն ծնվել է 1878 թվականին։ Յոհան և Մարիա Ֆոգելկլուների վեց երեխաներից հինգերորդն է եղել։ Երբ նա տասներկու տարեկան էր, ընտանիքը տեղափոխվել է Կրիստիանստադ։ Աղջիկների դպրոցն ավարտելուց հետո, տասնութ տարեկան հասակում, Էմիլիան ընդունվել է Ստոկհոլմում գտնվող Բարձրագույն մանկավարժական դպրոց (Kungliga Högre lärarinneseminariet), որն ավարտելուց հետո որոշ ժամանակ որպես ուսուցիչ աշխատել է Լանդսկրունայի դպրոցում, այնուհետև՝ Գյոթեբորգում[4]։
1902 թվականին Էմիլիան վերապրել է մի տեսակ կրոնական հայտնություն, որը փոխել է նրա կյանքը[4][5]։ Նա տեղափոխվել է Ուպսալա, որտեղ ընդունվել է համալսարան և ուսումնասիրել կրոնի պատմություն, փիլիսոփայություն և գրականություն։ Նրա վրա մեծ ազդեցություն է ունեցել Անրի Բերգսոնի փիլիսոփայությունը, բացի այդ, նա մոտ է եղել Նաթան Սյոդերբլոմի շրջապատին։ 1909 թվականին Ֆոգելկլուն դարձել է Շվեդիայի առաջին կինը, որը ստացել է աստվածաբանության բակալավրի աստիճան[4]։
1910 թվականին Էմիլիա Ֆոգելկլուն ստացավ կրթաթոշակ, որը նրան թույլ տվեց մեկնել Անգլիա և Փարիզ։ 1911 թվականին մեկնել է Իտալիա՝ Հռոմեական կաթոլիկ եկեղեցում մոդեռնիզմի երևույթը ուսումնասիրելու նպատակով։ 1911 թվականին հրապարակել է «Medan gräset gror» էսսեների ժողովածուն, որտեղ ներկայացրեց իր հիմնական գաղափարները։ Դրա հետ մեկտեղ շարունակել է դասավանդել (նախ` Յուրսհոլմում, այնուհետև՝ Ստոկհոլմում, ապա՝ Կալմարում), ինչպես նաև գրել հոդվածներ տարբեր ամսագրերի և թերթերի համար։ Նրա սոցիալական շփումների շրջանակում ընդգրկված էին այնպիսի մշակութային գործիչներ, ինչպիսիք են Լիդիա Վալստրյոմը, Գերտա Սվենսոնը, Դագնի Տորվալը, Կլարա Յոհանսոնը[4]։
1915 թվականին Ֆոգելկլուն մասնակցել է Հաագայում անցկացվող Կանանց խաղաղության միջազգային կոնգրեսին, որտեղ հանդիպել է Էլին Վագներին, որը հետագայում դարձել է նրա մերձավոր ընկերը։ 1919 թվականին լույս է տեսել նրա «Birgitta» գիրքը՝ նվիրված Սուրբ Բիրջիտային։ 1921 թվականին ամուսնացել է աշխարհագրագետ և գրող Առնոլդ Նորդլինդի հետ։ Զույգը բնակություն է հաստատել Ստոկհոլմի մերձակայքում գտնվող Յակոբսբերգում։ Նրանք երեխաներ չեն ունեցել։ 1928 թվականին Էմիլիա Ֆոգելկլուն ուղևորվել է Լոնդոն, որտեղ սկսել է նյութեր հավաքել 17-րդ դարի անգլիական քվակեր Ջեյմս Նեյլերի մասին և 1929 թվականին նրա մասին հրատարակել է «Kväkaren James Nayler» գիրքը։ 1930-ականներին հեռացել է Շվեդիայի եկեղեցուց և դարձել քվակերիզմի հետևորդ[4]։
52 տարեկան հասակում Էմիլիա Ֆոգելկլուն տեղափոխվել է Միացյալ Նահանգներ՝ Նյու Յորքում և Չիկագոյում սոցիոլոգիա և հոգեբանություն ուսումնասիրելու, ինչպես նաև ՝ շարունակելու քվակերիզմի վերաբերյալ իր ուսումնասիրությունները։ 1930-ականների կեսերին Ֆոգելկլուն վերսկսեց հոգեբանության և սոցիոլոգիայի դասախոսությունները Ստոկհոլմի քոլեջում (այժմ՝ համալսարան)։ Նա առաջին կինն էր, ով 1941 թվականին ստացել է աստվածաբանության պատվավոր դոկտորի աստիճան։ 1940-1950-ական թվականներին լույս է տեսել նրա ինքնակենսագրական եռերգությունը՝ «Arnold» (1944), «Barhuvad» (1950) և «Resfärdig» (1954)[4]:
Էմիլիա Ֆոգելկլուն մահացել է 1972 թվականին, Ուփսալայում[4]։
Ծանոթագրություններ[խմբագրել | խմբագրել կոդը]
- ↑ 1,0 1,1 1,2 1,3 1,4 Emilia Maria Fogelklou 1878-07-20 — 1972-09-26 Teolog, författare, föreläsare
- ↑ 2,0 2,1 2,2 2,3 2,4 GeneaStar
- ↑ https://www.uu.se/om-uu/akademiska-traditioner/priser-utmarkelser/hedersdoktorer/teologiska/
- ↑ 4,0 4,1 4,2 4,3 4,4 4,5 4,6 Svenskt kvinnobiografiskt lexikon
- ↑ The History of Nordic Women's Literature
Արտաքին հղումներ[խմբագրել | խմբագրել կոդը]
- «Emilia Fogelklousällskapet» (շվեդերեն).
- Ingrid Meijling Bäckman. «Emilia Maria Fogelklou». Svenskt kvinnobiografiskt lexikon (անգլերեն).
- «Emilia Maria Fogelklou». The History of Nordic Women's Literature (անգլերեն).
 | Վիքիպահեստն ունի նյութեր, որոնք վերաբերում են «Էմիլյա Ֆոգելկլու» հոդվածին։ |
| ||||||||||||
