Հովհաննես Մոսոյան
| Հովհաննես Մոսոյան | |
|---|---|
| Ծնվել է | 1920 |
| Ծննդավայր | Ազատան, Ալեքսանդրապոլի գավառ |
| Քաղաքացիություն |  ԽՍՀՄ |
| Մասնագիտություն | մանկավարժ |
| Կուսակցություն | ԽՄԿԿ |
| Պարգևներ և մրցանակներ |  |
Հովհաննես Հակոբի Մոսոյան (1920, Ազատան, Ալեքսանդրապոլի գավառ), հայ մանկավարժ։ Երկրորդ համաշխարհային պատերազմի վետերան։ ԽՄԿԿ անդամ (1944):
Կենսագրություն[խմբագրել | խմբագրել կոդը]
Հովհաննես Մոսոյանը ծնվել է 1920 թվականին, Ախուրյանի շրջանի Ազատան գյուղում։ 1939 թվականին ավարտել է գյուղի միջնակարգ դպրոցը և ընդունվել Լենինականի երկամյա մանկավարժական ինստիտուտը[1]։
Մոսոյանը 1940 թվականին զորակոչվել է կարմիր բանակ, ծառայել Արևմտյան հատուկ ռազմական օկրուգի տանկային զորամասում։ Ավարտել է գնդի սերժանտական դպրոցը և ստացել կրտսեր սերժանտի կոչում։ Մոսոյանը 1941 թվականի հունիսի 22-ին արևմտյան սահմանի վրա է ստացել առաջին մարտական մկրտությունը։ 1942 թվականի հունիսին 85-րդ հատուկ տանկային բրիգադի կազմում մասնակցել է Հարավ-Արևմտյան ռազմաճակատի մարտական գործողություններին, Ստալինգրադի պաշտպանությանը, ապա՝ մեր զորքերի՝ հարձակողական գործողություններին։ Մասնակցել է Հյուսիսային Կովկասում մղված մարտերին, որտեղ վիրավորվել է։ Հոսպիտալում ապաքինվելուց հետո վերադարձել է իր զորամաս և կռվել Ղրիմի ազատագրման համար։ 1944 թվականի հունվարին վիրավորվել է և, որպես Հայրենական պատերազմի հաշմանդամ, զորացրվել է բանակից։ Ռազմաճակատում ընդունվել է կոմունիստական կուսակցության շարքերը։ Ռազմաճակատում ցուցաբերած արիության ու խիզախության համար Մոսոյանը պարգևատրվել է Կարմիր աստղի շքանշանով, «Խիզախության համար», «Ստալինգրադի պաշտպանության համար» և այլ մեդալներով[1]։
Ավարտել է Լենինականի երկամյա մանկավարժական ինստիտուտի պատմության ֆակուլտետը, աշխատել Թալինի շրջանի Մաստարա գյուղի միջնակարգ դպրոցում, 1947-1964 թվականներին եղել է Ախուրյանի շրջանի Բենիամին գյուղի դպրոցի տնօրեն։ 1964 թվականից եղել է Ազատանի միջնակարգ դպրոցի ուսմասվար։ 1949 թվականին, միաժամանակ, սովորել և ավարտել է Երևանի պետական հեռակա մանկավարժական ինստիտուտի պատմության ֆակուլտետը[1]։
Պարգևներ[խմբագրել | խմբագրել կոդը]
- Կարմիր աստղի շքանշան
- «Խիզախության համար» մեդալ
- «Ստալինգրադի պաշտպանության համար» մեդալ