Խառնվածք (ֆիլմ)
Անվան այլ կիրառումների համար տե՛ս՝ Խառնվածք (այլ կիրառումներ)
 Karakter | |
|---|---|
 | |
| Երկիր |  Նիդերլանդներ |
| Ժանր | դրամա |
| Թվական | 1997 |
| Լեզու | հոլանդերեն |
| Ռեժիսոր | Մայք վան Դիմ |
| Պրոդյուսեր | «Ամերիկա ֆիլմ» «Ֆըրթ Ֆլոուր Ֆիչըրս» |
| Սցենարի հեղինակ | Մայք վան Դիմ Լաուրենս Խեյլ Ռուդ վան Մեյխեն |
| Դերակատարներ | Յան Դեկլեր Ֆեդյա վան Հուետ Բետտի Շխուրման |
| Օպերատոր | Ռոժե Ստոֆերս |
| Երաժշտություն | Պալայս վան Բում |
| Մոնտաժ | Ջասիկա դե Կոնինգ |
| Պատմվածքի վայր | Նիդերլանդներ |
| Նկարահանման վայր | Ամստերդամ |
| Կինոընկերություն | «Բունե Վիստա Ինթերնեյշնլ» |
| Տևողություն | 125 րոպե |
| Բյուջե | $4,500,000 |
| Շահույթ | $ 2,5 միլիոն |
Խառնվածք (հոլ.՝ Karakter), 1997 թ. նկարահանված հոլանդական ֆիլմ է։ Սցենարը հիմնված է հոլանդացի գրող Ֆերդինանդ Բորդևեյկի համանուն վեպի վրա (1938 թ.), որի առանցքում հոր և որդու բարդ հարաբերություններն են։ Ռեժիսորն է Մայք վան Դիմը, գլխավոր դերերը կատարում են Ֆեդյա վան Հուետը և Յան Դեկլեյրը։
1998 թ. արժանացել է Օսկարի՝ լավագույն ոչ անգլերեն ֆիլմի համար։
Բովանդակություն
Սյուժե[խմբագրել | խմբագրել կոդը]
Իրադարձությունները տեղի են ունենում Ռոտերդամ քաղաքում՝ 20-րդ դարի սկիզբի տնտեսական ու քաղաքական քաոսի ֆոնին։ Երիտասարդ իրավաբան Յակոբ Կատադրոյֆեն այցելում է հորը՝ դատական կատարածու Դրեյվերհավենին։ Այցից կարճ ժամանակ անց գտնում են վերջինիս՝ սպանված։
Կատադրոյֆեն ձերբակալվում է սպանության կասկածանքով։ Ոստիկանության քննասենյակում նա փորձում է պարզաբանել իր և հոր հարաբերությունները՝ սկսելով իր մանկությունից։ Մայրը՝ Յակոբան սպասուհի էր եղել Դրեյվերհավենի մոտ, սակայն օրերից մի օր Յակոբան հայտնում է վերջինիս, որ հղի է և մեկընդմիշտ հեռանում։ Դրեյվերհավենը նրան ուղարկում է ծրար՝ գումարով և ամուսնության առաջարկով, սակայն Յակոբան մերժում է ընդունել այն։ Ծնվելուց հետո Յակոբը կրում է մոր ազգանունը՝ Կատադրոյֆե։ Հոր մասին հարցնելուց մայրը միշտ պատասխանում է՝ «մենք նրանից ակնկալիք չունենք»։
12 տարեկանում Յակոբը փորձում է գտնել հորը, սակայն երբ վերջապես հանդիպում է Դրեյվերհավենին, վերջինս հրաժարվում է նրան ճանաչել։ Կատադրոյֆեն որոշում է այլևս նրանով չհետաքրքրվել։ Ժամանակի ընթացքում սրվում են նաև Յակոբի և մոր հարաբերությունները։ Յակոբը հիմնականում տանն էր լինում և ընթերցում էր իր ոչ ամբողջական հանրագիտարանի հատորները։
Տանից դուրս գալու համար Յակոբը որոշում է ծխախոտի խանութ գնել։ Նա վարկ է վերցնում «Ժողովրդական կրեդիտային բանկից», սակայն գործերը ձախողվում են և ընկնում է պարտքի տակ։ Կատադրոյֆեին սակայն հաջողվում է աշխատանքի ընդունվել փաստաբանական գրասենյակում՝ որպես գրագիր։ Այդ ժամանակ պարզվում է, որ նրա պարտապանը՝ «Ժողովրդական կրեդիտային բանկը», Դրդեյվերհավենին է պատկանում։ Կատադրոյֆեն նորից է վարկ վերցնում՝ ցույց տալու հորը, որ իրեն պարտված չի ճանաչում։ Այդ գումարով Յակոբը լեզուներ և իրավաբանություն է սովորում։
Տարիներ անց Կատադրոյֆեն դառնում է փաստաբանական գրասենյակի կառավարիչ, հանձնում է փաստաբանի երդմնակալություն։ Սակայն հոր նկատմամբ վրեժխնդրությունը նրան հանգիստ չի տալիս։ Մի երեկո նա որոշում է այցելել Դեյվերհավենին, հայտնել որ արդեն երդվյալ փաստաբան է և մեկընդմիշտ հրաժեշտ տալ նրան։ Երկուսի միջև տեղի է ունենում բախում. Դրեյվերհավենը նույնպես տարիներ շարունակ ատելությամբ է լցված եղել նրա նկատմամբ. որդու ծնունդը նա համարում էր իր և Յակոբայի բաժանման պատճառ։
Յակոբի հեռանալուց որոշ ժամանակ անց Դրեյվերհավենը ինքնասպան է լինում՝ թողնելով նամակ, որով ամբողջ ունեցվածքը որդուն է կտակում։
Դերերում[խմբագրել | խմբագրել կոդը]
- Ֆեդյա վան Հուետ - Յակոբ Վիլլեմ Կատադրոյֆե
- Յան Դեկլեր - պր. Դրեյվերհավեն (հայրը)
- Բրետտի Շխուրման - Յակոբա (մայրը)
- Թամար վան դեն Դոպ - Լորնա թե Խեորգե (աշխատակցուհի)
- Վիկտոր Լով - պր. դը Խանկերլար (դատական կատարածու)
- Հանս Կեստլինգ - Յան Ման (կոմունիստ ընկեր)
- Լոու Լանդրեյ - Ռենտենստայն (դատական կատարածու)
- Բերնարդ Դրոուխ - պր. Ստրոմկոնինգ
- Ֆրանս Վորստման - Քննիչ դը Բրեյ
- Ֆրեդ Խուսսենս - պր. Շխուվախթ
- Յասպես Գոթլիբ - Յակոբը 6 տարեկանում
- Մարիուս Գոթլիբ - Յակոբը 6 տարկեանում
- Պավլիկ Յանսեն - Յակոբը 12 տարեկանում
- Մարիսա վան Էյլե - տիկ. Սիբկուլո
Նկարահանումը[խմբագրել | խմբագրել կոդը]
Ինչպես վեպը, այնպես էլ ֆիլմի սյուժեն ծավալվում են Ռոտերդամ քաղաքում՝ 1930-ական թվականներին։ Սակայն քանի որ այս քաղաքը 1940 թ. գրեթե ամբողջովին կործանվել է գերմանացիների ռմբակոծության հետևանքով, նկարահանումների մեծ մասը տեղի են ունեցել Անտվերպեն, Վրոչլավ, Գենտ և Հաագա քաղաքներում։
Նկարահանման բոլոր աշխատանքները կատարվել են 71 օրում՝ 1997 թ. ամռան և աշնան ընթացքում։
Մրցանակներ և անվանակարգեր[խմբագրել | խմբագրել կոդը]
Ֆիլմի մրցանակների է արժանացել բազմաթիվ կինոփառատոններում, որոնցից ամենակարևորը երկուսն են։
- Օսկար.
- Լավագույն օտարալեզու ֆիլմի համար (1998 թ.)
- Նիդերլանդական կինոփառատոն.
- «Ոսկե ցլիկ» լավագույն լիամետրաժ ֆիլմի համար (1997 թ.)
- Ժուրիի գլխավոր մրցանակը ռեժիսորին
- «Grolsch film award» դերասան Յան Դեկլերին
- Փարիզի ֆիլմի փառատոն.
- Lավագույն դերասան (Յան Դեկլեր)
- Գրան պրի (Մայք վան Դիմ)
2011 թ. հոկտեմբերին ֆիլմը ցուցադրվել է Երևանում՝ Հոլանդական կինոյի շաբաթի բացման ժամանակ։
