Մարիա Նաումովա

Մարիա Նաումովա; լատիշ․՝ Marija Naumova
Ծնվել է	հունիսի 23, 1973 (51 տարեկան)
Ծննդավայր	Ռիգա, Լատվիական ԽՍՀ, ԽՍՀՄ
Քաղաքացիություն	Լատվիա
Կրթություն	Լատվիայի համալսարան
Մասնագիտություն	երգչուհի և կոմպոզիտոր
Զբաղեցրած պաշտոններ	ՅՈՒՆԵՍԿՕ-ի բարի կամքի դեսպան
Կայք	marijanaumova.lv
	Marie N Վիքիպահեստում

Մարիա Նաումովա (լատիշերեն՝ Marija Naumova, հունիսի 23, 1973(1973-06-23)^[1]^[2], Ռիգա, Լատվիական ԽՍՀ, ԽՍՀՄ^[3]), ռուսական ծագումով լատվիացի երգչուհի, հանդես գալով Marie N բեմական անունով՝ կատարել և կատարում է ամենատարբեր երաժշտական ոճերի երգեր՝ փոփից մինչև թատերական և ջազ։ Բացի այդ, լատիշերեն, ֆրանսերեն, անգլերեն, ռուսերեն ու պորտուգալերեն երգերի ձայնագրություններով մի շարք երաժշտական ալբոմներ է թողարկել։ 2002 թվականին, Եվրատեսիլի երգի մրցույթում ներկայացնելով Լատվիան, կատարել է իր իսկ հեղինակած I Wanna («Ուզում եմ») երգը և երաժշտական այդ հեղինակավոր ստուգատեսում գրավել առաջին տեղը։

Կենսագրություն

Մարիայի երաժշտական ձիրքը առաջինը նկատել ու գնահատել է լատիշ հանրահայը երգահան Ռայմոնդ Պաուլսը։ 1994 թվականից սկսած՝ նրանք համագործակցել են, և մեկ տարի անց երգչուհին մասնակցել է հեռուստատեսային «Փնտրում ենք տաղանդներ» շոու-մրցութային նախագխին ու թեև չի հաղթել, բայց արժանացել է հանդիսատեսի համակրանքին։

1998 թվականին Նաումովան մասնակցել է Ջորջ Գերշվինի ծննդյան 100-ամյակին նվիրված համերգին, այդ նույն տարվա մարտ ամսին տարբեր բեմերից ելույթ ունեցել լատվիացի ճանաչված երաժիշտների հետ։ Այդ համերգներից մեկը ձայնագրվել ու թողարկվել է խտասկավառակի տեսքով՝ խթան դառնալով երգչուհու կարիերայի համար. նրան հրավիրել են մասնակցելու երաժշտական կարևոր միջոցառումների, հեռուստատեսային ու ռադիոշոուների, հարցազրուցներ են անցկացրել տարբեր թերթերի համար։

1999 թվականին Նաումովան թողարկել է իր առաջին անհատական՝ սոլո երաժշտական ալբոմը, որտեղ միայն ռուսերեն երգեր էին ձայնագրված։ Հաջորդ տարի, առաջին անգամ, մասնակցել է Եվրատեսիլի հանրապետական փուլին և զբաղոցրել երկրորդ տեղը՝ զիջելով միայն «Բրեյնսթորմ» երաժշտախմբին, որն էլ իրավունք է նվաճել Լատվիան ներկայացնելու Եվրատեսիլի եզրափակիչում։ 2001 թվականին "Hey Boy Follow Me" երգի կատարումով արժանացել է հանդիսատեսի համակրանքին, բայց փորձագետների խումբը այնքան էլ բարձր չի գնահատել, և Մարիան դարձյալ զրկվել է Եվրատեսիլի եզրափակիչ փուլին Լատվիան ներկայացնելու պատվից ու հնարավորությունից։ Հաջորդ տարի, բարեբախտաբար, հաղթանակը ուղեկցել է նրան. և՝ ոչ միայն հանրապետական մրցույթում, այլ նաև Եվրատեսիլի եզրափակիչում, որտեղ նա, իր իսկ հեղինակած "I Wanna" երգի կատարումով, նվաճել է առաջին տեղը՝ առաջին (և առայժմ՝ նաև միակ) նման հաղթանակը պարգևելով Լատվիային։ Սակայն այն էլ պետք է ասել, որ դա Եվրատեսիլում հաթանակ տարած միակ երգն է, որը չի արժանացել հայրենի երկրի սահմաններից դուրս ձայնագրվելու պատվին։ Եվ հենց Լատվիայում էլ "I Wanna"-ն չի մտել նույնիսկ լավագույն երգերի երեսնյակի մեջ^[4]։

2001 թվականին երգչուհու թողարկած «Ieskaties acīs» ալբոմը վաճառքի հանվելուց երկու շաբաթ անց դարձել է «ոսկե», իսկ տասնմեկ ամիս անց՝ «պլատինե»։ Այդ նույն տարում Մարիան ձայնագրել է ֆրանսերեն երգերի «Ma Voix, Ma Voie» ալբոմը, «Ասիայի ձայնը» երգի մրցույթում արժանացել ,,Հանդիսատեսի համակրանք,, մրցանակին։

2003 թվականին նա վարել է Եվրատեսիլ երգի մրցույթի եզրափակիչ փուլը, որ անց էր կացվում Լատվիայում՝ Ռիգայում։ 2004-ին հանդես է եկել «Երաժշտության հնչյունները» մյուզիքլում՝ գլխավոր դերի կատարումով։ Նա լավագույնն է ճանաչվել նաև «Քույր Քերրի» մյուզիքլի գլխավոր հերոսուհու դերում։ 2007-ի վերջին և 2008-ի սկզբներին կատարել է Ֆատինայի դերը Վիկտոր Հյուգոյի «Թշվառները» վեպի հիման վրա բեմականացված մյուզիքլում։

Մարիան ավարտել է Լատվիայի համալսարանի իրավաբանական ֆակուլտետը։ 2005 թվականին նա դարձել է ՅՈՒՆԻՍԵՖ-ի «Բարի կամքի» առաջին դեսպանը Լատվիայում։

Սկավառակագրություն

1998: До светлых слёз
2000: Ieskaties acīs
2001: Ma Voix, Ma Voie (LV:Gold certification^[5])
2002: On A Journey
2002: Noslēpumi
2004: Nesauciet sev līdzi
2005: Another Dream
2010: Lullabies
2016: Uz Ilūziju Tilta

Ծանոթագրություններ

↑ ^1,0 ^1,1 Discogs — 2000.
↑ ^2,0 ^2,1 ČSFD (չեխերեն) — 2001.
↑ ^3,0 ^3,1 ^3,2 Deutsche Nationalbibliothek Record #135310962 // Gemeinsame Normdatei (գերմ.) — 2012—2016.
↑ O'Connor, John Kennedy (2007). The Eurovision Song Contest – The Official History. UK: Carlton Books. ISBN 978-1-84442-994-3.
↑ «Marijai Naumovai Zelta disks».

Արտաքին հղումներ

Official Website

Վիքիպահեստն ունի նյութեր, որոնք վերաբերում են «Մարիա Նաումովա» հոդվածին։

[_ce23ef221b60554e-1] 1,0 ^1,1 Discogs — 2000.

[_f8767c1b519453e4-2] 2,0 ^2,1 ČSFD (չեխերեն) — 2001.

[_5fa7cb05f424bced-3] 3,0 ^3,1 ^3,2 Deutsche Nationalbibliothek Record #135310962 // Gemeinsame Normdatei (գերմ.) — 2012—2016.

[4] O'Connor, John Kennedy (2007). The Eurovision Song Contest – The Official History. UK: Carlton Books. ISBN 978-1-84442-994-3.

[5] «Marijai Naumovai Zelta disks».

[1]

[2]

[3]

[4]

[5]