Սոցիալական գործողություն

Վիքիպեդիայից՝ ազատ հանրագիտարանից
Jump to navigation Jump to search

Սոցիալական գործողություն, սոցիալական պրոբլեմների և հակասությունների լուծման եղանակ, որը պայմանավորված է հասարակության հիմնական սոցիալական ուժերի փոխհարաբերությամբ։ Սոցիալական գործողության հետևանք է հասարակական շարժումները, որոնք կարող են լինել տարերային կամ կազմակերպված, չկանխատեսված կամ պլանավորված և այլն։ Սոցիալական գործողության լուծում է տնտեսական, քաղաքական և այլ պրոբլեմներ, արտահայտում է տարբեր դասակարգերի և սոցիալական խավերի շահերը, իրագործվում է ռեֆորմի կամ հեղափոխության ձևով։ Սոցիալական գործողության սոցիոլոգիական առումով հասարակական շարժման տարերայնության և գիտակցականության, նպատակի և միջոցի, ցանկալի և անցանկալի հետևանքների փոխհարաբերությունն է։ Անձնավորության Սոցիալական գործողություն, որպես հասարակայնորեն նշանակալի արարքների ամբողջություն, քննում են հոգեբանությունը, սոցիալական հոգեբանությունը, բարոյագիտությունը, քրեագիտությունը, կառավարման սոցիոլոգիան և այլն։ Բուրժուական սոցիոլոգիայում տարածում գտած «Սոցիալական գործողության տեսության» կողմնակիցները գերագնահատում են Սոցիալական գործողություն սուբյեկտիվ անձնային կողմերը (գործող սուբյեկտի պատկերացումները, ակնկալիքները, սեփական արարքին տված նրա գնահատականը և այլն), հասարակական հարաբերություններում անձնային հարաբերությունների դերը և թերագնահատում Սոցիալական գործողության սոցիալ-տնտեսական և քաղաքական գործոններն ու հետևանքները՝ հանգելով սոցիոլոգիական ճանաչողության հոգեբանականացմանը։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 11, էջ 22 CC-BY-SA-icon-80x15.png