Սահակ Մաշալյան

Վիքիպեդիայից՝ ազատ հանրագիտարանից
Jump to navigation Jump to search
Տ. Սահակ եպս. Մաշալյան
Ծնվել է17 մարտ, 1962 թ.
ԾննդավայրՍտամբուլ, Թուրքիա
ՔաղաքացիությունFlag of Turkey.svg Թուրքիա
Ազգությունհայ
Երկեր«Երկու ուխտավոր» (վեպ)
Մասնագիտությունհոգևորական (եպիսկոպոս), Հայաստանյայց Առաքելական Եկեղեցի

Տ. Սահակ եպիսկոպոս Մաշալյան (ավազանի անունը՝ Շահան, ծն. 17 մարտ, 1962 թ., Ստամբուլ, Թուրքիա), Հայաստանյայց Առաքելական Եկեղեցիու սպասավոր՝ եպիսկոպոս։ Հայտնի է իր քարոզչական և գրական գործունեությամբ։ Հատկապես հայ հավատացյալների կողմից ջերմ ընդունելության է արժանացել նրա «Երկու ուխտավոր» վարքագրական վեպը։

Կենսագրություն[խմբագրել | խմբագրել կոդը]

Սահակ եպս. Մաշալյանը ծնվել է 1962 թվականին մարտի 17-ին Ստամբուլ քաղաքում։ 1983 թվականին սկսել է իր հոգևոր ծառայությունը Կ. Պոլսի հայոց պատրիարքարանում։ 1983-1987 թթ. ուսանել է Ստամբուլի համալսարանի փիլիսոփայության ֆակուլտետում։ 1986 թվականին ձեռնադրվել է սարկավագ ձեռամբ Կ. Պոլսի հայոց պատրիարք Ամենապատիվ Տ. Շնորհք արքեպիսկոպոս Գալուստյանի։ 1989-1994 թթ. աստվածաբանություն է ուսանել Լոնդոնի համալսարանում։ 1992 թվականին կուսակրոն քահանա է ձեռնադրվել ձեռամբ Կ. Պոլսի հայոց պատրիարք Ամենապատիվ Տ. Գարեգին արքեպիսկոպոս Գազանճյանի։ 1994-1997 թթ. զբաղեցրել է Երուսաղեմի հայոց պատրիարքության Սրբոց թարգմանչաց վարժարանի տեսչի պաշտոնը, միաժամանակ այնտեղ կրոն դասավանդել։ 1997-1999 թթ. իր աստվածաբանական կրթությունը խորացրել է Դուբլինի համալսարանում (Իռլանդիա)։ 1999-2005 թթ. պաշտոնավարել է Կ. Պոլսի հայոց պատրիարքարանում որպես միջեկեղեցական և միջկրոնական հարաբերությունների բաժնի վարիչը, միաժամանակ նաև հոգևոր հովվություն արել Կ. Պոլսի հայոց եկեղեցիներում։ 2005 - 2010 թթ. Նոր Կտակարանի ներածություն և մեկնություն առարկաներն է դասավանդել Սուրբ Էջմիածնի Գևորգյան հոգևոր ճեմարանում և Սևանի Վազգենյան դպրանոցում։ 2006 թվականի ապրիլի 21-ին Մայր Աթոռում վարդապետական թեզ է պաշտպանել «Հավատք և հրաշք» թեմայով և ապրիլի 22-ին Օշականի Ս. Մեսրոպ Մաշտոց եկեղեցում, Գերաշնորհ Տ. Շահան արքեպս. Սվաճյանի կողմից, ստացել է մասնավոր վարդապետության չորս աստիճանները[1]։ 2007 - 2010 թթ. պաշտոնավարել է որպես Սուրբ Էջմիածնի Գևորգյան հոգևոր ճեմարանի տեսուչ[2]։ 2008 թ. օգոստոսի 24 -ին ձեռամբ Ն.Ս.Օ.Տ.Տ Գարեգին Բ Ամենայն Հայոց Կաթողիկոսի արժանացել է եպիսկոպոսական ձեռնադրության[3]։ 2011 թվականից վերստին պաշտոնավարում է որպես Կ. Պոլսի հայոց պատրիարքարանի միջեկեղեցական և միջկրոնական հարաբերությունների բաժնի վարիչ։

Ծանոթագրություններ[խմբագրել | խմբագրել կոդը]

Արտաքին հղումներ[խմբագրել | խմբագրել կոդը]