Հրաշք 34-րդ փողոցում (ֆիլմ, 1947)

Հրաշք 34-րդ փողոցում (ֆիլմ 1947թ.) անգլ.՝ Miracle on 34th Street
Երկիր	ԱՄՆ
Ժանր	ֆենթեզի ֆիլմ, դրամա, կինոկատակերգություն և սուրբծննդյան ֆիլմ
Թվական	1947
Լեզու	անգլերեն
Ռեժիսոր	Ջորջ Սիտոն
Պրոդյուսեր	Ուիլյամ Պերլբերգ
Սցենարի հեղինակ	Ջորջ Սիտոն
Դերակատարներ	Մորին Օ’Հարա, Ջոն Փեյն, Նատալի Վուդ, Էդմունդ Գվեն, Փորթեր Հոլ, Ջին Լոքհարթ, Ուիլյամ Ֆրոուլի, Ֆիլիպ Թոնջ, Հարրի Էնթրիմ, Հերբերտ Հեյս, Ջեք Ալբերտսոն, Ջերոմ Քաուեն, Մերի Ֆիլդ, Փերսի Հելթոն, Ռոբերտ Գիսթ, Թելմա Ռիթեր, Թերեսա Հարրիս, Դորոթի Քրիսթի և Ռիչարդ Իրվինգ
Օպերատոր	Չարլզ Գ. Քլարք
Երաժշտություն	Սիրիլ Ջ. Մոքրիջ
Մոնտաժ	Ռոբերտ Լ. Սիմփսոն
Պատմվածքի վայր	Նյու Յորք
Նկարահանման վայր	Նյու Յորք
Կինոընկերություն	20th Century Studios
Տևողություն	96 րոպե
Բյուջե	630 000 $
Miracle on 34th Street (film) Վիքիպահեստում

«Հրաշք 34-րդ փողոցում» (անգլ.՝ Miracle on 34th Street), սուրբծննդյան թեմատիկայով ամենահայտնի ֆիլմերից մեկը ԱՄՆ-ում։ Սցենարը ռեժիսոր Ջորջ Սիթոնի՝ ըստ Վալենտին Դևիսի պատմվածքի։ 1955 թվականին ընդգրկվել է Նշանավոր ֆիլմերի ազգային ռեգիստրի ցանկում։ Ֆիլմի մոտիվներով նկարահանվել են չորս ռիմեյքներ և բեմադրվել է բրոդվեյյան մյուզիքլ։ Ժամանակակից հանդիսատեսի համար ֆիլմը հասանելի է երկու տարբերակով՝ բնօրինակ (սև ու սպիտակ) և գունավոր։

Ֆիլմն արժանացել է երեք «Օսկարի»՝ այդ թվում՝ առաջին պլանում տղամարդու դերի լավագույն կատարման համար (Էդմունդ Գվեն) և երկու «Ոսկե գլոբուսի»

Սյուժե

Շքեղ տոնախմբության նախօրեին, որն ամեն տարի Գոհաբանության տոնի առթիվ կազմակերպվում է Մանհեթենի 34-րդ փողոցում Մեյսիզ հանրախանութի կողմից, ծերունին, որը պետք է կատարեր Սանտա Կլաուսի դերը, հարբում է։ Անցորդ ծերուկին՝ Քրիս Քինգլին համոզում են զբաղեցնել նրա տեղը սահնակի վրա։

Քրինգլը սիրվում է երեխաների կողմից և հանրախանութում աշխատանք է ստանում։ Սակայն, երբ նրա ղեկավարը պահանջում է, որ Քրիսը երեխաներին առաջարկի գնել չվաճառված և հնացած խաղալիքները, ծերունին այլայլվում է։ Երեխաներին անհրաժեշտ խաղալիքները գնելու համար նա ծնողներին ուղարկում է այն խանութները, որոնցում դրանք առկա են։ Խանութի ղեկավարությունը որոշում է աշխատանքից ազատել կամակոր ծերունուն, սակայն փոխում է որոշումը, երբ պարզվում է, որ Քրիսի ազնվության շնորհիվ հանրախանութը նորանոր գնորդներ է ձեռք բերել։

Հետզհետե պարզ է դառնում, որ Քրիս Քրինգլն իրեն իրական Սանտա Կլաուս է համարում։ Նրա երդվյալ թշնամի հոգեբույժը կազմակերպում է Քրինգլի հոսպիտալացումը հոգեբուժարանում։ Այժմ քաղաքային դատարանը պետք է որոշում կայացնի՝ Քրիս Քրինգլը իրական Սանտա Կլաուս է, թե՞ ոչ։

Դերերում

• Մորին Օ’Հարա — Դորիս Ուոլքեր
• Ջոն Փեյն — Ֆրեդերիկ Մ. Գեյլի
• Էդմունդ Գվեն — Քրիս Քրինգլ
• Նատալի Վուդ — Սյուզան
• Պորտեր Հոլլ — հոգեբույժ Գրենվիլ Սոյեր
• Ֆիլիպ Տոնգ — Ջուլիան Շելխամմեր
• Ջին Լոկհարթ — դատավոր Հենրի Հարպեր
• Ուիլյամ Ֆրուլի — Չառլի Գալլորեն
• Ջերոմ Քոուեն — շրջանային դատախազ Թոմաս Մարրա
• Թելմա Ռիթթեր — «Մեյսիզ» հանրախանութի հաճախորդուհի
• Ջեք Ալբերտսոն — փոստի ծառայող
• Թերեզա Հարրիս — Կլեո (տիտրերում նշված չէ)

Կրոնական ենթատեքստ

Քրիս Քրինգլի պատմությունը զուգահեռվում է Հիսուս Քրիստոսի երկրային կյանքի պատմությանը։ Այնպես, ինչպես Հիսուս Քրիստոսը, ծերուկը տոնի նախօրեին հայտնվում է փողոցում, քննադատում է չարչիությունը, փորձում է բոլորին հավատ ներշնչել։ Սակայն, հայտնվում է դատարանում, որտեղ պետք է ապացուցի, որ ինքն ինքնակոչ չէ։ Ֆիլմում դատավորն ուղղակիորեն համեմատվում է Պիղատոս Պոնտացու հետ։

Պրեմիերա

Դերիլ Զանուկը, ով զբաղվում էր ֆիլմի սեղծման աշխատանքներով, որոշում է ֆիլմի պրեմիերան ամանորյա արձակուրդների փոխարեն կազմակերպել մայիսին՝ առավել եկամուտ ստանալու ակնկալիքով։ Այս նպատակին հետամուտ լինելով՝ ֆիլմի անձնակազմը չի հիշատակել Սանտա Կլաուսի կամ Սուրբ ծննդի մասին։ Ֆիլմի ազդագրում Քրիս Քրինգլը պատկերվել է հետին պլանում՝ սովորական ծերուկի կերպարով, որը գրկել է աղջնակին։ Չնայած նկարի սենտիմենտալ լինելուն՝ մամուլի արձագանքը դրական էր։

Ճանաչում

• Արժանացել է «Օսկարի» հետևյալ անվանակարգերում.
  • «լավագույն սցենար»,
  • «գրական լավագույն սկզբնաղբյուր»,
  • «երկրորդ պլանում տղամարդու լավագույն դերակատար» (Էդմունդ Գվենն)
• ներկայացվել է «Օսկարի» տարվա լավագույն ֆիլմ անվանակարգում
• ամերիկյան կինոինստիտուտի կողմից ներկայացված լավագույն ընտանեկան ֆիլմերի ցանկում զբաղեցրել է 5-րդ տեղը
• գրանցված է ֆիլմերի ազգային ռեգիստրում (1995)։

Արտաքին հղումներ

• «Հրաշք 34-րդ փողոցում»(անգլ.) ֆիլմը allmovie կայքում:
• «Հրաշք 34-րդ փողոցում»(անգլ.) ֆիլմը Internet Movie Database կայքում

Վիքիպահեստն ունի նյութեր, որոնք վերաբերում են «Հրաշք 34-րդ փողոցում (ֆիլմ, 1947)» հոդվածին։