Հովհաննես Բոստանջյան
Հովհաննես Բոստանջյան | |
---|---|
Ծնվել է | 1924 |
Ծննդավայր | Նոր Բայազետ, Հայկական ԽՍՀ, ԱԽՖՍՀ, ԽՍՀՄ |
Մահացել է | անհայտ |
Քաղաքացիություն | ԽՍՀՄ |
Կրթություն | Հայկական պետական մանկավարժական համալսարան |
Մասնագիտություն | մանկավարժ |
Պարգևներ և մրցանակներ |
Հովհաննես Նիկոլայի Բոստանջյան (1924, Նոր Բայազետ, Հայկական ԽՍՀ, ԱԽՖՍՀ, ԽՍՀՄ - անհայտ), հայ մանկավարժ, Երկրորդ համաշխարհային պատերազմի Արևելյան ռազմաճակատի («Հայրենական մեծ պատերազմ», 1941-1945) մասնակից։
Կենսագրություն[խմբագրել | խմբագրել կոդը]
Հովհաննես Բոստանջյանը ծնվել է 1924 թվականին, Կամո քաղաքում։ Մանկավարժական ուսումնարանն ավարտելուց հետո Հովհաննեսն անցել է ուսուցչական աշխատանքի։ 17 տարեկան է եղել, երբ սկսվել է պատերազմը[1]։
Իր նախկին ուսուցիչների հետ նա զինվորագրվել է 408-րդ Հայկական դիվիզիային։ Ծառայել է առանձին սակրավորների գումարտակում և աչքի ընկել գերազանց ծառայությամբ։ 1943 թվականին մասնակցել է Ուկրաինայի Սումի քաղաքի ազատագրման մարտերին և ծանր վիրավորվել։ Ապաքինվելուց հետո ուղարկվել է 18-րդ բանակ։ Շարքային զինվորը կռվել է Նովոռոսիյսկի, Թամանի ազատագրման մարտերին։ 1943 թվականին Կերչ քաղաքի մատույցներում 2-րդ գվարդիական դիվիզիայի մարտիկների շարքերում սերժանտ Հովհաննեսը մասնակցել է № 115 բարձունքի գրավմանը։ Մյուս ստորաբաժանումների փոխգործողությամբ դասակը գրավել է բարձունքը։ Մարտերի ժամանակ Հովհաննեսը վիրավորվել է։ Բուժվելուց հետո, 1944 թվականի ապրիլին, իր դիվիզիայի կազմում մասնակցել է Յալթա, Սևաստոպոլ քաղաքների ազատագրմանը։ Ցուցաբերած արիության և խիզախության համար Հովհաննեսը պարգևատրվել է Կարմիր աստղի շքանշանով և արժանացել է գերագույն գլխավոր հրամանատարի շնորհակալագրին։ Այնուհետև Բոստանջյանը կռվել է 1-ին Մերձբալթյան ռազմաճակատում, մասնակցել Լատվիայի ազատագրմանը և երկրորդ անգամ ծանր վիրավորվելուց հետո, 1944 թվականի դեկտեմբերին վերադարձել է տուն[1]։
1944 թվականին վերադառնալով տուն Բոստանջյանը անցել է մանկավարժական աշխատանքի։ Բոստանջյանը Կամո քաղաքի ճանաչված ուսուցիչներից էր։ Նա աշխատանքին զուգընթաց սովորել և ստացել է բարձրագույն կրթություն։ Վերջին տարիներին Բոստանջյանը վարել է քաղաքային ժողկրթբաժնի դպրոցական տեսչի պաշտոնը և իր հարուստ գիտելիքներն է հաղորդել երիտասարդ ուսուցիչներին[1]։
Պարգևներ[խմբագրել | խմբագրել կոդը]
- Կարմիր աստղի շքանշան