Կարմրան Մեյերի
| Կարմրան մեյերի | |
 Կարմրան մեյերի | |
| Դասակարգում | |
| Թագավորություն | Բույսեր (Plantae) |
| Վերնաբաժին | Բարձրակարգ բույսեր (Embryophyta) |
| Տիպ/Բաժին | Անոթավոր բույսեր (Tracheophyta) |
| Ենթատիպ | Սերմնավոր բույսեր (Spermatophytes) |
| Կարգ | Մեխակածաղկավորներ (Caryophyllales) |
| Ընտանիք | Կարմրանազգիներ (Tamaricaceae) |
| Ցեղ | Կարմրան (Tamarix) |
| Տեսակ | Կարմրան մեյերի (T. meyeri) |
| Միջազգային անվանում | |
| Tamarix meyeri | |
Կարմրան Մեյերի (լատին․՝ Tamarix meyeri), կարմրանազգիների ընտանիքի, կարմրան ցեղի բույս։
Նկարագրություն[խմբագրել | խմբագրել կոդը]
Տերևաթափ թուփ է՝ մինչև 6 մ բարձրությամբ, բունը և բազմամյա ճյուղերը ծածկված են մոխրագույն, միամյա շիվերը՝ ծիրանագույն, դեղնավուն կամ կանաչավուն կեղևով։ Միամյա շիվերը մեծ մասամբ աշնանը թափվում են։ Դրանց տերևները նշտարաձև են, սրտաձև հիմքով, մինչև 4 մմ երկարությամբ, գորշավուն։ Կանաչ ընձյուղների վրա գտնվող տերևները գծանման են կամ գծա-նշտարաձև, մինչև 8 մմ երկարությամբ, նստադիր։ Ծաղկային բողբոջները հիմնադրվում են աշնանից, խոշոր են, մինչև 6 մմ երկարությամբ, կոնաձև և սրված, բաց դեղնավուն, ծածկված մոմային խավով։ Տերևաբողբոջները խոշոր են, ծածկված կղմինդրաձև դասավորված դեղնավուն թեփուկներով։ Ողկույզները առաջանում են միամյա ճյուղերի վրա և ծաղկում են գարնանը, երբեմն՝ աշնանը, հասնելով մինչև 16 սմ երկարության և 1,5 սմ լայնության։ Ունեն լավ արտահայտված ծաղկակիր։ Ծաղիկը 4 անդամանի է։ Ունի ծաղկակից։ Բաժակաթերթիկները լայն-օվալաձև են, կանաչ, կեռիկով։ Պսակաթերթիկները սպիտակ են, բաց վարդագույն, բաց մանուշակագույն, հակառակ-ձվաձև կամ էլիպսաձև, մինչև 4 մմ երկարությամբ, ծաղկաթափի ժամանակ թափվում են։ Ենթավարսանդային սկավառակը չորսաբաժան է։ Փոշանոթները բաց դեղնավուն են կամ վարդագույն, փոշեհատիկը սպիտակ է։ Սերմնարանը լայն է՝ 4 բոլլավանման սռնակներով։ Տուփիկը ունի 6 մմ երկարություն և պարունակում է մոտ 50 սերմ։
Տարածվածություն[խմբագրել | խմբագրել կոդը]
Բնական պայմաններում տարածված է Կովկասում, Հարավային Եվրոպայում, Միջին Ասիայում, Միջերկրական ծովի ափերին։ Հայաստանի պայմաններում հանդիպում է Արարատյան դաշտում և Մեղրիում, անապատային աղուտներում, գետափնյա ավազներում, ծովի մակերևույթից 900-1000 մ բարձրության վրա։
Կիրառություն[խմբագրել | խմբագրել կոդը]
Բունը և ընձյուղները ընդունակ են արագ կերպով արմատակալելու։ Պիտանի է միջին և ստորին լեռնային գոտիների կանաչապատման և անտառապատման համար[1]։
Ծանոթագրություններ[խմբագրել | խմբագրել կոդը]
- ↑ Հարությունյան Լ․ Վ․, Հարությունյան Ս․ Լ․, Հայաստանի դենդրոֆլորան, հ. 1, Երևան, «Լույս հրատարակչություն», 1985, էջ 239։
 | Վիքիպահեստն ունի նյութեր, որոնք վերաբերում են «Կարմրան Մեյերի» հոդվածին։ |
|
